Milli komanda
Azərbaycan millisi: Beşincilər arasında 5-ci
Avropa Çempionatının seçmə mərhələsi finiş xətti…
Avropa Çempionatının seçmə mərhələsi finiş xəttinə yaxınlaşıb. Doqquz qurpda mübarizə aparan komandalardan dördü – İngiltərə, İslandiya, Çexiya və Avstriya final mərhələsini təşkil edəcək meydan sahibi – Fransaya qoşulmaq hüququnu təmin edib.
Millimiz cari seçmə tsikldə də əlahiddə heç nəylə yadda qalmayıb. Robert Prosineçkinin yetirmələri 8 turdan sonra 6 komanda arasında yalnız Maltanı qabaqlaya bilir.
Bəs digər qruplarla müqayisədə yığmamızın göstəriciləri necədi? Qruplardan yalnız birində 5 yığma mübarizə aparır ki, belədə, 6 komandalılarla müqayisə aparmaq düzgün olmaz. Beləliklə, İ qrupunu kənara qoyub, digərləri ilə paralellər aparaq.
A qrupunda gözlənilmədən İslandiyanın parlaması, Türkiyə və Hollandiya kimi yığmaları arxa plana keçirdi. İndi İslandiya və Çexiyanın Eyfel qülləsi barədə düşündükləri zaman, “narıncılar” qardaş ölkənin büdrəməsinə ümid edir. Qrupdakı 5-ci pillənin sahibinə gəlincə, bu, Latviya yığmasıdı. Həmin Latviya ki, bir müddət öncə Türkiyə səfərində əsl fədakarlıq göstərərək, evə 1 xalla gəlməyi bacardı. Ümumilikdə isə, latişlar 4 xal toplayıb.
Maraqlıdı ki, B qrupunda 5-ci yerdə qərarlaşan Kipr millisi AÇ-2016-ya getmək şansını hələ də itirməyib. Adalılar qrup mərhələsinin sonuna 2 tur qalmış 9 xalla 3-cü yerdəki İsraildən 4 xal geri qalırlar. Doğrudu, onlar yalnız nəzəri cəhətdən Fransaya yollanmaq şanslarını qoruyurlar. Amma bu şans hələ ki, qalmaqdadı.
C qrupunda ilk üçlük məlum olsa da, rəsmən hələ ki, nə İspaniya, nə də Slovakiyə vəsiqəni təmin etməyiblər. Hər halda onları təqib edən Ukrayna yığması da, ən azından pley-offda oynamaq hüququnu rəsmiləşdirib. O ki qaldı müqayisə apardığımız 5-ci pillənin sahibinə, burda Lüksemburq yığması qərarlaşıb. Amma onlar hansısa Maltanı yox, Makedoniya millisini arxada qoyurlar. Ərazisi 2500 kvadrat kilometr olan bu ölkənin yığmasının aktivində 4 xal var.
D qrupunun sakinləri arasında sensasiya baş verməyib. Almaniya və Polşa yığmaları inamla Fransaya doğru irəliləyirlər. Qrupda 5-ci yerdə qərarlaşan isə Gürcüstandı. “İnter”in sabiq baş məşqçisi Kaxaber Tsxadadzenin yetirmələrinin aktivində 6 xal var.
E qrupunda İngiltərə “at oynadır”. 5-ci yerdə məskən salan Litva 9 xalla 3-cü yerdə gedən Sloveniyadan cəmi 3 xal geri qalır.
Püşkatmadan sonra F qrupunda favorit kimi göstərilən Yunanıstan əsl qapazaltına çevrilib. İş o yerə çatıb ki, Farer adaları da onları qabaqlayır. Aktivində 6 xal olan adalılar üçün həm nəticə, həm də qərarlaşdıqları 5-ci pillə, tarixi uğurdu.
G qrupunda Avstriya rəqiblərinə meydan oxumağı bacarıb. Rusiya və İsveç isə kimin bir başa Fransaya yollanacağına dair sual ətrafında pərvanə kimi fırlanırlar. Üstəlik arxadan Çernoqoriyanın nəfəsini də hiss edirlər. Qrupda 5-ci yerdə qərarlaşan Lixtenşteynin 5 xalı var.
H qrupundakı vəziyyət haqda isə geniş yazmağa ehtiyac yoxdu. “Həmişəbahar” Azərbaycan yenə də ənənəvi 5-ci pillədən bərk-bərk yapışıb… hələlik 6 xalla.
Sonda 5-ci yerlərin sakinlərinin turnir cədvəlini diqqətinizə çatdırmaq istəyirik:
Kipr 8 3 0 5 12-13 9
Litva 8 3 0 5 6-14 9
Farer 8 2 0 6 5-12 6
Gürcüstan 8 2 0 6 5-14 6
AZƏRBAYCAN 8 1 3 4 6-13 6
Lixtenşteyn 8 1 2 5 2-21 5
Lüksemburq 8 1 1 6 4-19 4
Latviya 8 0 4 4 4-16 4
Litva 8 3 0 5 6-14 9
Farer 8 2 0 6 5-12 6
Gürcüstan 8 2 0 6 5-14 6
AZƏRBAYCAN 8 1 3 4 6-13 6
Lixtenşteyn 8 1 2 5 2-21 5
Lüksemburq 8 1 1 6 4-19 4
Latviya 8 0 4 4 4-16 4