Premyer-liqa
İlk məğlubiyyət, “infarkt futbolu”, 6 xal və Aylton
Topaz Premyer Liqasının 4-cü turu arxada qaldı. Bu turdan sonr…
Topaz Premyer Liqasının 4-cü turu arxada qaldı. Bu turdan sonra ölkə çempionu vahid lider kürsüsünü ələ keçirdi. “Qarabağ” “Xəzər Lənkəran”ı minimalhesablı qələbəylə keçərək, “Qəbələ”nin paytaxtda büdrəməsindən maksimum yararlandı.
İlk oyun günündə meydana çıxan Qurban Qurbanovun yetirmələri klub prezidenti Mais Mənsimov və vitse-prezident Tuyqun Nadirovun idarəetmənin öhdəsindən gələ bilməmələri səbəbindən yeniyetmələrin ümidinə qalmış “Xəzər Lənkəran”la üz-üzə gəlirdi. Yunis Hüseynovun məşqçi bacarığı, meydana çıxan futbolçuların bütün fədakarlıqlarına baxmayaraq, çempion istədiyi nəticəni əldə etdi. Lideri sevindirən daha bir məqam ondan ibarətdi ki, matçda yeganə qolun müəllifi ikinci hissədə meydana daxil olan Samuel Armenteros olub. Avropa Liqasının qrup mərhələsinin ilk turu öncəsi debüt oyunundaca fərqlənən futbolçu üçün də bu, əlavə stimul ola bilər.
“İnter” çempionatda ən yaxşı oyununu keçirdi. Paytaxt təmsilçisi “Qəbələ”nin çempionatda ilk məğlubiyyəti alması üçün əlindən gələnin ən yaxşısını etdi. Meydan sahiblərinin əldə etdiyi fürsətlərdən maksimum yararlanması, müdafiədə inamlı təsir bağışlaması, Zaur Svanadzenin millinin AÇ-nin seçmə tsiklində çıxışıyla bağlı yaranmış fasilədən əla yararlanmasından xəbər verir. Amma unutmayaq ki, cümə axşamı “Qəbələ” tarixində ilk dəfə Avropa Liqasının qrup mərhələsi oyununa çıxacaq. Doğrudu, baş məşqçi Roman Qriqorçuk matçsonrası mətbuat konfransında komandasının fikrinin qitəmiqyaslı yarışlarda olmadığını bildirdi. Amma fakt göz qabağında idi. Futbolçular həmişəkindən fərqli idilər. Bu da bilavasitə psixoloji yanaşma ilə bağlı idi. Komanda “İnter”lə görüşə lazımınca köklənə bilməmişdi. Bütün hallarda final fiti səslənərkən, tabloda ədalətli nəticə əks olunrdu – 2:1.
“Nəhayət” Gəncəyə də bayram gəldi. İlk 3 turda qələbə üzünə həsrət qalan “Kəpəz” mövsümdə ən zəif oyununu keçirsə də, hətta bu da AZAL-la matçda 3 xal qazanmağa kifayət etdi. AZAL isə “tarix yazmaq”da davam edir. “Təyyarəçilər” çempionatda xal üzünə həsrət qalan yeganə komandadı. Üstəlik, Tərlan Əhmədovun yetirmələri arxada qoyduqları 360 dəqiqədə bir dəfə də olsun rəqib komandaların qapılarının torunu silkələyə bilməyib. Əlbəttə, Premyer Liqanın tərk etmək barədə danışmaq hələ tezdi. Amma bu gedişlə AZAL 1-ci diviziona yuvarlanmağa ən real namizəd olacaq.
Dünən baş tutan “Sumqayıt” – “Zirə” oyunu barədə yazılası bir şey yoxdu. 90 dəqiqə ərzində vur-tut cəmi 1 dəfə qapı qarşısında real qol imkanı yaradılırsa, “vur-qaç”dan danışmağa dəyməz. Amma çatışmazlıqlar barədə bəzi qeydlərimizi aparmalıyıq. Əvvəla, media üçün yerin az sayda olması anlaşılan deyil. Belə təəssürat yaranır ki, “Sumqayıt” ev oyunlarına KİV təmsilçilərinin gəlməsində maraqlı deyil. Üstəlik, həmin yerlərin azarkeşlər arasında quraşdırılması da anlaşılan deyil. Ümumiyyətlə, AFFA-nın nəyə görə bu cür şəraitdə komandaya sözügedən stadionda ev oyunlarını keçirməsinə icazə verməsi müzakirə mövzusudu. Tribunalarda yer alan 1500 azarkeşin böyük əksəriyyətinin azyaşlılar olması isə şəhərdə futbola marağın olmamasından xəbər verir. Tək-tük yaşlı nəslin nümayəndələrinə rast gəldik ki, bunu da daha çox “Sovet qalıqları” kimi səciyyələndirə bilərik. Elə həmin yaşlı fanatlardan ən fəalının ürək ağrısı ilə səsləndirdiyi bir ifadə ilə dünənki matçın şərhinə dair abzasa son qoymaq istəyirik: “Oynayın da. Futbol, futbol oynayın! İstəyirsiniz burda infrakt keçirim”?!
Turun son matçında “Neftçi” səfərdə “Rəvan”a şans tanımadı. Ardıcıl 2-ci oyunda qələbəni bayram edən “ağ-qaralar”da işlərin tam düzəlməsi barədə danışmaq hələ çox tezdi. Hər halda bu 6 xal medallar uğrunda mübarizə aparan komandalara qarşı yox, “Sumqayıt” və “Rəvan” la oyunlarda əldə edilib. Diqqətçəkən və “Neftçi” rəhbərliyini düşündürən məqam barədə də bir neçə kəlmə yazmağa zərurət var. Avropa Liqasının 1-ci təsnifat mərhələsində “Mladost”la səfər qarşılaşmasında meydandan qovulan Aylton, yenə qırmızı vərəqə alıb. Braziliyalıya “qulaqburması” verilməsə, hələ “Neftçi”nin başını çox ağrıdacaq. Özü də “Rəvan”la matçda bu, nəticədə öz əksini tapmadısa, daha ciddi rəqiblərlə oyunda eyni hal baş versə, çətin ki, “ağ-qaralar” “az qanla” bu çatışmazlıqdan qurtula bilsin.
CEYHUN ƏLİYEV