Ölkə futbolu
Start üçün “professor” qiyməti: “ PAOK-u çox da şişirtmək lazım deyil”
Bildiyiniz kimi, sabah Avropanın ikinci böyük klub turnirin…
Bildiyiniz kimi, sabah Avropanın ikinci böyük klub turnirində qrup mərhələsinə start veriləcək. Azərbaycan futbolu tarixində ilk dəfədir ki, qrup mərhələsində iki komandamız mübarizə aparacaq. “Qəbələ” və “Qarabağ” ölkəmizi bu nüfuzlu turnirdə təmsil edəcəklər. “Qarabağ” ilk oyununu səfərdə “Tottenhem”ə, “Qəbələ” isə evdə PAOK-a qarşı keçirəcək.
Oyunlardan öncə Azərbaycan futbolunun ən titullu nümayəndəsi və ən çox oyun keçirmiş futbolçusu, hazırda milli komandanın məşqçilər korpusunda yer alan Mahmud Qurbanov futbolinfo.az saytına danışıb: “Futbolda start çox vacibdi. Yaxşı başlayanda komandada ruh yüksəkliyi olur. Bunu deməklə yanaşı, anlayıram ki, hər iki komandamızın adlı-sanlı rəqibləri var. Amma qrupda zəif komanda olmur. Yəni “Qarabağ”la “Qəbələ” də zəif deyil. “Qarabağ” ilk dəfədir ki, İngiltərə Premyer Liqasının komandasına qarşı oynayacaq. Rəqib adlı-sanlı, köklü, azarkeşi olan bir komandadır. Amma “Qarabağ”ın da öz oyun stili, liderləri var. “Qarabağ” öz oyununu “Tottenhem”ə qarşı matçda da dəyişməyəcək. Ümidvaram ki, “Qarabağ” yaxşı nəticə qazanacaq. “Qəbələ” isə ilk oyununu evdə keçirəcək. Öz torpağımızda başlamaq “Qəbələ” üçün üstünlükdür. PAOK klubunu çox da şişirtmək lazım deyil. Unutmayaq ki, “Qəbələ” buna qədər PAOK-dan güclü, adlı-sanlı rəqiblə qarşılaşıb. “Qəbələ”nin rəqibi yaxşı analiz etdiyini düşünürəm. Öz oyununu sərgiləyəcəyi təqdirdə “Qəbələ”nin də yaxşı nəticə qazanmaq şansı artacaq”.
Qeyd edək ki, “professor” ləqəbli Qurbanov sabah “Qəbələ” – PAOK oyununu stadiondan izləyəcək.