Premyer-liqa
Rail Məlikov: “Ruslan hələ uşaqdı”
AZAL-ın “Neftçi” üzərində qələbəsi şifa…
AZAL-ın “Neftçi” üzərində qələbəsi şifahi müharibənin əsasını qoyub. Əvvəlcə, Aqil Məmmədovun məlum açıqlamasına dair futbolinfo.az saytına “təyyarəçilər” rəsmi mövqe bildirdilər. İndi də AZAL-ın kapitanı Rail Məlikov ölkə mətbuatında Ruslan Qurbanovun “gör kimə uduzuruq” sözünə sərt reaksiya verib. Buna cavab özünü çox gözlətməyib. Qurbanov öz facebook səhifəsində uzun illər “Neftçi”nin kapitanı olmuş və Ruslanla çiyin-çiyinə oynamış Məlikova ismarıc yollayıb.
Millinin də şərəfini qoruyan Qurbanovun statusunun tərcüməsini təqdim edirik: “Qoy mən heç kiməm və futbolda bacarıqsızam. Yaxşı kapitan olmusan, vəzifənin öhdəsindən yaxşı gəlmisən və bu münasibətlə səni təbrik edirəm. Ancaq sən də unutma ki, “Neftçi”dən necə ayrılmısan və indi hardasan. Yığmadakı çıxışıma isə sən yox, qoy baş məşqçi qiymət versin. Heç vaxt ulduz xəstəliyyinə tutulmaram. Hələ üzərimdə çox çalışmalıyam ki, başımı qaldıra bilim. Bunu da edirəm. Sənə və komandana uğurlar arzulayıram. Əgər düzgün başa düşməmisənsə, bu, artıq mənim problemim deyil. AZAL-ı təhqir etməmişəm. Cənab Məlikov, bu sözləri ona görə demişəm ki, komandanızın büdcəsi bizimki ilə müayisəolunmazdı. Nə isə, sənə uğurlar arzulayıram, Kapitan”!
Rail Məlikovla əlaqə saxlayaraq, məsələyə aydınlıq gətirmək cəhdlərimiz təcrübəli müdafiəçinin qısa cavabı ilə yekunlaşdı: “Bu məsələyə şərh bildirmək istəmirəm. Çünki bu, mənə yaraşmaz, Ruslan uşaqdı . Başından böyük danışmasın, özünə hörmət etsin, özünə də hörmət etmirsə, böyüklərə sayqı göstərsin”.
ELMAR ABDULLA-ZADƏ