Premyer-liqa
Ramil Diniyevin "qara zurna"sı
Dünən “Bakcell Arena”da baş tutan “Neft&ccedi…
Dünən “Bakcell Arena”da baş tutan “Neftçi” – “Zirə” matçının baş hakiminə hansı qiymətin verildiyini deyə bilmərik. Bunu Xaqani Məmmədov sirr olaraq, saxlayır. Amma futbolun görünməyən üzünü gizlətmək heç kimə nəsib olmur. Söhbət Ramil Diniyevin yararsız idarəçiliyindən gedir. Nəyə görə görünməyən? Çünki ədalət təmsilçisi barədə təqdim edəcəyimiz materialda onun “əlifba”ya riayət etməməsindən tutmuş, heç vaxt sanballı hakim olmayacağına dair bütün detallara toxunacağıq…
İlk yarıda oyun neçə dəfə dayandırılmışdı, meydançaya neçə dəfə həkimlər daxil olmuşdu? Bunun dəqiq sayını hesablamasaq da, fakt budu ki, 1-ci 45 dəqiqəyə ən azından 2 dəqiqə əlavə olunmalı idi. Etdimi bunu Diniyev? Xeyr! Fikir formalaşdırmağa tələsməyin, hörmətli oxucular. Bəli, referi ilk 45 dəqiqədəki əlavə vaxtı 2-ci hissənin əsas vaxtı bitdikdən sonrakı dəqiqələrə əlavə edə bilər. Diniyev isə oyuna vur-tut 3 dəqiqə əlavə etdi. Hansı hesablamalara görə? Elə tək Nicat Qurbanova 2 hücum arasında 2 dəfə meydançada həkimlər tərəfindən yardım edilmişdi. Özü də ikinci halda yarımmüdafiəçini kənara çıxarmaq üçün xərəyə zərurət duyulmuşdu. Başqa sözlə, tək Qurbanova görə oyun ən azından 3 dəqiqəlik dayandırılmışdı. Bəs sarı vərəqələr göstərilərkən, baş verən fasilələr, bəs 1-ci hissəyə görə əlavə edilməli olan vaxt, bəs fasilədən sonra baş verən 5 əvəzetmə? Hanı həmin dəqiqələr, ey Hakimlər Komitəsinin “15 dənə verirlər” deyən sədri?
Diniyevin biabırçı idarəçiliyi tək bununla bitmir. Azərbaycanlı futbolçuların əksəriyyətindən fərqli olaraq, “Neftçi”nin Kauesi hakimliklə bağlı verilən suala çox nəvazişlə cavab verdi. Amma o da Diniyevin payladığı sarı vərəqələri anlamadığını bildirdi. Bir tərəfdə qırıb-çatan “Zirə”, digər yanda “ağ-qaralar”a paylanan rəsmi xəbərdarlıqlar. Heç bir çərçivəyə sığmasa da, adım kimi əminəm ki, HK sədrindən soruşsaq, “idarəçilik normal idi” deyəcək. Əslində isə idarəçilik anormal idi və növbəti abzaslarda daha bir neçə məqama toxunacağıq.
Dünənki görüşdə hakimin fiti sanki toyda qara zurna idi: insan nə qədər yersiz fit çalar?! Ay başına dönüm, bir imkan ver, camaat futbola da baxsın da! Bir abstrakt müqayisə aparaq. Üç dəfə yerə yıxılaraq, inanılmaz səslə çığırtıya, Ramil Diniyev ən azından 2 dəfə fit çalır və 1 dəfə “müqəssir”ə sarı vərəqə göstərir. Baş hakim İngiltərədən olsaydı, həmin 3 çığır-bağırın 2-də fitini səsləndirərdi və ən azından birində “zərərçəkmiş”ə simulyasiyaya görə sarı vərəqə göstərərdi.
Diniyevin yararsız idarəçiliyi ilə sonuncu məqam isə fiziki durumu ilə bağlıdı. Bunu da misalla sübuta yetirək. Tərəflərdən biri hücum qurur və rəqib komandanın oyunçusu xırda fol hesabına bunun qarşısını alır. Amma top hücum edən komandada qalır. Nə xeyri, Diniyevin “qara zurna”sı imkan vermir ki, hücum kəsərli alınsın. Mütləq fit səsləndirilir və oyunun tempi aşağı salınır. Niyə? Çünki sürətli futbol baş hakimə sərf etmir. Axı belədə, hadisə yerinə çata bilmir. Və yenə də ritorik sual: hakimlər üçün təşkil edilən bu təlim-məşq toplanışları hansı effekti verir? Pullar havaya sovrulur, Elvin Əsgərov, Ramil Diniyev və əksər digər “qarapaltarlı”larnın bərbad fiziki forması dəyişmir ki, dəyişmir.
Yekunlaşdıraq. Ölkə futbolunun normal inkişaf etməsinə hakimlərin faciəvi durumu birbaşa təsir edir. Çünki daxili çempionatda hər oyunda onlarla simulyasiyaya göz yuman hakimlərimiz, faktiki olaraq, avrokubok iştirakçılarımızın və milli üzvlərimizin beynəlxalq arenada etdikləri simulyasiyalara görə sarı vərəqələr almalarını şərtləndirir, onların hər təmas zamanı mübarizəni davam etdirmək əvəzinə yerə sərilmələrinin səbəbkarı olur. Konkret dünənki oyuna gəlincə, bir başa ittiham etməsək də, dolayısı ilə belə görünürdü ki, baş hakim meydan sahiblərinin qələbə qazanmaması üçün əlindən gələni etdi.
P.S. Ölkəmizdə məhz sərt mübarizəyə imkan yaradan, daim özünü hadisə yerinə çatdırmağı bacaran hakimlərimiz var. İlk sırada Əliyar Ağayevlə Orxan Məmmədov dayanır.
CEYHUN ƏLİYEV