I Liqa
"Bakı"da "mədəni üsyan", Mingəçevir bayram içində
13 dekabr, saat 15:50. Mingəçevir bayram edir. Birinci divizio…
13 dekabr, saat 15:50. Mingəçevir bayram edir. Birinci divizionda mübarizə aparan, ilk 11 turda qapısında orta hesabla 5 top görən (ümumilikdə 55 qol buraxmışdılar) “Energetik” çempionatda ilk qələbəsini paytaxtda qazandı. Özü də “Bakı” üzərində! Həmin “Bakı” ki, yaxın keçmişdə qapısında futbolçu növbələri düzülürdü. Həmin “Bakı” ki, Madrid “Atletiko”suna sponsorluq edirdi. Həmin “Bakı” ki, ölkəmizi Avropa Liqasının pley-offunda təmsil edirdi…
Bu gün isə “Bakı” öz yetirmələrinin ümidinə qalıb. Həmin yetirmələrinin ki, klubun bugünkü durumuna ağız büzürlər. “Energetik”lə qarşılaşmada isə bunu nəticədə də əks etdirdilər.
Komandanı sanki şallaqlaya-şallaqlaya meydançaya buraxmışdılar. Futbolçuları ayırmaq istəmirəm. Çünki hamısı bir bezin qırağıdı. Bu cür komandanın yaşamasının məqsədi də anlaşılmır. Nəyə lazımdı bu futbolçuları saxlamaq? Kimə lazımdı bu cür oyun?
Yox, bu yazıda Mingəçevir təmsilçisinin əziyyətini aşağılamaq məqsədi güdmürük. Ancaq bir sıra məqamlara toxunmaya bilmirik. Əvvəla, “Energetik”in həkiminin olmaması ən çox diqqətçəkən məqam idi. Doğrudu, çempionatın əsasnaməsində həkimin yoxluğuna görə nə cəza tətbiq edilir, nə də oyunun başlanmasına icazənin verilməməsi nəzərdə tutulmayıb. Ancaq fakt budu ki, qonaqlar Bakıya yarımcan halda gəlmişdi. Təsəvvür edin ki, protokolda rəsmi şəxslərin adı qeyd olunan yerdə yalnız baş məşqçinin adı göstərilib. Başqa sözlə, Ənvər Nəsibov komandanın həm məşqçisi, həm həkimi, həm inzibatçısı, həm rəhbəri idi. Hətta ehtiyat oyunçular kimi protokola 8 futbolçunun adının daxil edilməsinə icazə verilsə də, Mingəçevir təmsilçisinin cəmi 4 oyunçusunun adına rast gəlmək mümkün idi.
“Bakı”nın əlavə olunmuş 2-ci dəqiqədə qapısında gördüyü qolu Səbuhi Əliyev hədiyyə etdi. Həmin Əliyev ki, bir neçə gün öncə “Bakılı”yla görüşdə ehtiyatda qalmasına etiraz edərək, baş məşqçi Novruz Əzimovu komandadan gedəcəyi ilə hədələmişdi. Qərəz, Səbuhiyə şans verildi və o, Əzimova nəyə qadir olduğunu əyani nümayiş etdirdi.
… “Bakı”nın işi Allaha qalıb. Klub sanki koma vəziyyətindədi. Nəfəsi gəlir, ancaq ətrafda başverənlərə reaksiya göstərə bilmir. Bəzən komadan ayılanlar olur. Amma klub ayağa qalxsa, bu gün mədəni şəkildə üsyan edən futbolçulardan kimlərəsə “müalicə”dən sonra çətin ki, rast gələcəyik.
CEYHUN ƏLİYEV
- Ölkə futbolu2024-04-16 13:19
AFFA-da fırtınaqabağı sakitlik: maliyyə yoxlaması davam edir
- Ölkə futbolu2024-04-15 08:00
Hakim kömək etmədi, “Səbail” yenə qələbəsiz qaldı
- Ölkə futbolu2024-04-15 10:17
“Qarabağ” üçün daha iki potensial rəqib
- Ölkə futbolu2024-04-15 10:03
Musanın oynamamasının səbəbi – baş məşqçi açıqladı