Premyer-liqa
Fərqli dövrələrin reallığı
Topaz Premyer Liqasında mövsüm yarılanmaq üzrədi. Ar…
Topaz Premyer Liqasında mövsüm yarılanmaq üzrədi. Artıq komandaları qış fasiləsindən cəmi 2 tur ayırır. Ancaq ötən müddətdə elə fərqli şeylər yaşanıb ki, bunu yalnız turnir cədvəlinə baxmaqla bilmək olar. Bir çox komandaların iki dövrəni fərli keçirməsi belə deməyə əsas verir.
Başlayaq uğursuzlardan: Bu mənada ən çox gözəçarpan komanda “Qəbələ”di. İlk dövrədə topladığı 20 xalla “Qarabağ”la zirvəni bölüşən komanda indi 3 xala həsrətdi. Komandanın bu iki dövrədə qazandığı nəticələr arasında kəskin fərq var. Belə ki, onlar mövsümün geridə qalan hissəsinin ilk yarısında 20, 2-ci hissəsində isə hələ ki, 7 xal toplayıb. Roman Qriqorçukun yetirmələrinin 2-ci dövrədə cəmi 1 qələbəsi var, onu da “Xəzər Lənkəran” üzərində qazanıb. Bu, o “Xəzər Lənkəran”dı ki, sözügedən müddətdə keçirdiyi 7 görüşün 6-da xala həsrət qalıb.
Faciəvəi olan budu ki, “qırmızı-qaralar” evdə keçirilən 6 oyunda qalibiyyətin nə olduğunu bilmir. Əyalət təmsilçisi doğma meydanda hətta AZAL və “Rəvan” kimi komandaların da müqavimətini qıra bilməyib. 2-ci dövrənin turnir cədvəlini çıxarmalı olsaq, “Qəbələ” qazandığı 7 xalla siyahıda “İnter”lə birlikdə 8-9-cu yerləri bölüşər. Hətta topların daha yaxşı fərqini nəzərə alsaq, “bankirlər” bu rəqibini üstələyir.
Elə “İnter” də bitiminə 2 tur qalan ikinci dövrənin ən zəiflərindəndi. Komanda indiyə kimi cəmi 7 xal toplayıb. “Ağ-göylər” də “Qəbələ” kimi dövrədə cəmi qələbə qazanıb. Halbuki Zaur Svanadzenin yetirmələri dövrəni 17 xalla 3-cü bitirmişdi. Paytaxt təmsilçisi də eynən “Qəbələ” kimi qarşıdakı 2 görüşdə qalib gəlsə belə, ilk hissədəki nəticəsini heç təkrarlaya da bilməyəcək.
İkinci dövrənin ən zəif komandası isə “Xəzər Lənkəran”dı. Cənublular geridə qalan 7 tur ərzində cəmi 3 xal qazanıb, onu da səfərdə “Rəvan”la görüşdə əldə edib. Dövrəni 7-ci pillədə başa vuran “gəmiçilər” hazırda 9-cu yerdədi. Onları son sıradan cəmi 1 xal ayırır.
9-cu turdan sonra uğursuzluq zolağından çıxıb, yüksəlişə qalxan komandalar da var. Bunlar “Neftçi” və “Rəvan”dı. Maraqlıdı ki, hər iki komandanın irəliləməsinə təkan verən müxtəlif amillər var. İlk olaraq, baş məşqçi dəyişikliyini qabartmaq olar. Sözügedən komandaların nəticələrini müsbətə doğru dəyişməsində elə bu dövrədə bir-birlərinə qarşı keçirdiyi oyunun da faydası dəydi. Belə ki, “sarı-qırmızılılar”ın səfərdə 3:2 hesablı qələbəsi onların 8 turluq xalsızlıq seriyasına son, hələ də davam edən 5 matçlıq məğlubiyyətsizlik seriyasına isə start verdi. İlk dövrədə 2 xal qazanan Bəhmən Həsənovun komandası, indi bu xallarının üzərinə daha 9-nu əlavə edib. Onlar 2-ci dövrənin nəticələrinə görə, 4-cü pillədədi. İlk yarıda ən yaxın izləyicisindən 6 xal geri qalan bakılılar hazırda bu fərqi minumuma endirib.
Dövrənin ən çox “artıran”ı olan “Neftçi”nin yüksəlişə qalxmasına səbəb “Rəvan”məğlubiyyətindən sonra komandanın başına keçən Əsgər Abdullayevdi. Belə ki, son 4 görüşdə Samir Əliyevi əvəzləyən təcrübəli mütəxəssis bu müddətdə “ağ-qaralar”a 10 xal qazandırıb. Bakılılar hazırda “Qarabağ”dan sonra dövrədə ən çox xal toplayan komandadı – 14.
İlkində olduğu kimi, 2-ci dövrədə də ən çox xalı “Qarabağ” toplayıb. Ağdam təmsilçisi sabit oyun nümayiş etdirməklə liderliyini qoruyur. Onlar mövsümün ilk hissəsində bu pilləni “Qəbələ” ilə şərikli bölüşürdülərsə, hazırda ən yaxın izləyicisini 9 xal qabaqlayır. Qurban Qurbanovun komandasından savayı “Zirə”, AZAL, “Kəpəz” və “Sumqayıt”ın da çıxışı ilk dövrədəkindən elə də çox fərqlənmir.
ÜMUMİ CƏDVƏL |
XAL |
1. Qarabağ |
36 |
2. Qəbələ |
27 |
3. Zirə |
26 |
4. İnter |
24 |
5. Neftçi |
23 |
6. Kəpəz |
22 |
7. AZAL |
16 |
8.Sumqayıt |
16 |
9. Xəzər Lənkəran |
12 |
10. Rəvan |
11 |
1-Cİ DÖVRƏ |
XAL |
1. Qarabağ |
20 |
2. Qəbələ |
20 |
3. İnter |
17 |
4. Zirə |
16 |
5. Kəpəz |
14 |
6. Neftçi |
9 |
7. Xəzər Lənkəran |
9 |
8. Sumqayıt |
8 |
9. AZAL |
8 |
10. Rəvan |
2 |
2-Cİ DÖVRƏ |
XAL |
1. Qarabağ |
16 |
2. Neftçi |
14 |
3. Zirə |
10 |
4. Rəvan |
9 |
5. AZAL |
8 |
6. Kəpəz |
8 |
7. Sumqayıt |
8 |
8. İnter |
7 |
9. Qəbələ |
7 |
10. Xəzər Lənkəran |
3 |
ELMAR ABDULLA-ZADƏ