Ölkə futbolu
Premyer Liqada yeni say: Olimpiya Stadionundakı görüşün təfərrüatları
Dekabrın 14-də Bakı Olimpiya Stadionunda keçirilən tədbir,…
Dekabrın 14-də Bakı Olimpiya Stadionunda keçirilən tədbir, orada başverənlər futbol ictimaiyyəti üçün gizli qaldı. Düzdü, AFFA rəsmi saytı vasitəsi ilə görüş haqda nələrisə yazdı. Amma bu, heç də tədbirdə olub-bitənlərin tam məğzi deyildi.
Belədə futbolinfo.az saytı öz kanallarını işə salaraq, bəzi məlumatlar öyrənə bildi. Adının çəkilməsini istəməyən görüş iştirakçılarından bir neçəsi ilə söhbətdə bəlli oldu ki, Olimpiya stadionunda çox mühüm məsələlər müzakirə olunub.
Azərbaycan milli komandasının baş məşqçisi Robert Prosineçki, AFFA-nın texniki direktoru Bernhard Lippert və Məşqçilər Komitəsinin üzvləri Topaz Premyer Liqasında çıxış edən klubların baş məşqçiləri ilə görüşdü və tədbirə AFFA-nın baş katibi Elxan Məmmədov da qatıldı. AFFA-nın rəsmi saytının yazdığına görə, görüşdə ölkə futbolunun inkişafı, problemlərin həlli yolları müzakirə olunub. Əsasən, futbolçuların hazırlıq səviyyəsi, uşaq futbolunun vəziyyəti xüsusi vurğulanıb. Mövsüm ərzində futbolçuların daha çox oyun keçirməsini təmin etmək üçün Topaz Premyer Liqası klublarının iştirakı ilə daha bir turnirin təşkilinin zəruriliyi qeyd olunub. Eləcə də, qış fasiləsi zamanı ölkə xaricində təlim-məşq toplanışı keçə bilməyən klubların arasında qısamüddətli turnirin keçirilməsi təklifi də səsləndirilib.
Daha çox müzakirə kimi təqdim olunan görüşün ilk hissəsi həqiqətən bu məsələlərə həsr olunub. Ancaq AFFA açıqlamasa da, biz öyrəndik ki, assosiasiyanın təklifi klub məşqçiləri tərəfindən qəbul olunmayıb. Məşqçilər Komitəsiin təklif etdiyi əlavə turnirlərin tam mahiyyəti açıqlanmadığı üçün klublar bunun əleyhinə gedib. Məşqçilər bu təklifləri rəsmi kağız üzərində görmək istəyib. Yalnız həmin əlavə yarışların təqvimə necə təsir edəcəyini bildikdən sonra məşqçilər ona münasibət bildirəcəyini açıqlayıb.
Görüşdə klub məşqçilərinin də təklifi olub. Onlar Premyer Liqa iştirakçılarının sayının artırılmasını istəyib. AFFA-nın baş katibi Elxan Məmmədov isə bunun çox çətin olduğunu bildirib. O, hətta hazırkı komandaların yaşamaqla bağlı problemi olduğunu dilə gətirərək say artımının mümkünsüzlüyünü vurğulayıb. Baş katib yaşamaq uğrunda mübarizə aparan bəzi elita təmsilçilərinə kömək etdiklərini və bu yardımların davam edəcəyini söyləyib. O, sponsor SOCAR-ın büdcəni 10 milyon manata endirdiyini də əsas gətirib.
Bu məbləğlə həm yığmaların təlim-məşq toplanışları və s. yola verilməli, həm də problemi olan klublara yardım edilməlidi. Elə bu səbəbdən də iştirakçı sayının artırılması çətin məsələdi. I diviziondan gələcək komandaların əksəriyyətinə də AFFA yardım göstərdiyi üçün bu, ümumiyyətlə, mümkün deyil.
Maraqlıdı ki, baş katib yardım edəcəkləri klubların adını çəkərkən “Kəpəz”, “Xəzər Lənkəran”, “İnter”, “Sumqayıt”, AZAL kimi klubların adını çəkib, hamıya bərabər səviyyədə kömək göstəriləcəyini vurğulayıb. O, bu yardımı komandaların ayaqda qalması üçün edəcəklərini, özlərinin sponsorlarının sayəsində isə daha da güclənmək şansının olmalarını vurğulayıb. Məmmədov heç cür ulduzunu barışdırmadığı “Rəvan”ı bu siyahıya qatmayıb, hətta “bu klubda sabitlik yoxdu, heç rəhbərləri də nə etdiklərini başa düşə bilmirik” cümləsindən istifadə edib. Bu isə o deməkdi ki, Elxan bəy bu komandanı gələn mövsüm elitada görmək istəmir.
Baş katib say artımının çətin olduğunu bildirsə də, əldə etdiyimiz bilgiyə görə, yeni mövsüm 12, hətta 14 komandanın iştirakı ilə baş tuta bilər. Bölgə komandalarından “Neftçala” və “Turan Tovuz”un Premyer Liqaya buraxılması mümkündü. Bundan başqa, “Bakı” da problemlərini həll etməyə çalışır. MOİK-in son vaxtlar fəallaşması isə müdafiə nazirinin bunun üçün səy göstərməsi ilə bağlıdı. Ancaq hər şeyə yenə də maliyyə vəziyyəti aydınlıq gətirəcək. Neçə vaxtdı təsdiqini gözləyən dövlət proqramı imzalansa, bundan sonra futbol təsərrüfatımızda yeni sərhədlər müəyyənləşəcək.
FƏRİD