Premyer-liqa
Devalvasiya klub-futbolçu münasibətlərinə necə təsir edəcək?
Manatın astronomik dərəcədə devalvasiyaya uğraması futbolda da …
Manatın astronomik dərəcədə devalvasiyaya uğraması futbolda da əksini tapmaqdadı. Amma diqqətçəkən məqam burasındadı ki, anlaşma dollarla imzalanıbsa, klub bir gecənin içində 50 faiz ziyan etdi, yox, əgər manatla imzalanıbsa, futbolçu 50 faiz itirdi. Bəs ortaq məxrəc varmı? Bunu hüquqi müstəviyə çıxardıqda, zərər çəkmiş tərəfin yaşadıqları ziyana görə hansısa orqana şikayət edib, zərərin azaldılması şansı varmı?
Bütün bu suallara cavab aramaq üçün AFFA-nın hüquqşünası Rəmiş Malıyevlə əlaqə saxladıq. Həmsöhbətimiz məsələyə bu cür aydınlıq gətirdi:
“Müqavilədə devalvasiya ilə əlaqədar bəndlər adətən ancaq bankla imzalanan anlaşmalarda olur. Klub-futbolçu müqaviləsində bu cür bəndə rast gəlməmişəm. İnanmıram da ki, kimdəsə belə bir bənd olsun. Amma hansısa klub və ya futbolçu uzaqgörənlik edibsə, bunu deyə bilmərəm. Bu, fors-major hadisədi. Müqavilə manatla imzalanıbsa, manatla da ödəniləcək. O ki qaldı dollarla imzalanan müqavilələrə, həmin anlaşmaların ödənişi pul sahibinə çatdırılan gün dolların məzənnəsinə uyğun olaraq, manatla hesablanacaq. FİFA-ya şikayət etmək? Xeyr, bu cür hallarla bağlı müqaviləni manatla imzalamış futbolçular FİFA-ya şikayət etsələr də, bunun xeyri olmayacaq. Çünki ali futbol qurumunun futbolçunun xeyrinə qərar vermək üçün əlində əsası olmalıdı. Əgər rəsmi sənəddə bu, öz əksini tapmayıbsa, FİFA devalvasiyaya görə heç bir tədbir görməyəcək”.
CEYHUN ƏLİYEV