Ölkə futbolu
"Rəvan"ın heroinlə hədələdiyi futbolçu
2 gün əvvəl Ukrayna millisinin və Kiyev "Dinamo"sunu…
2 gün əvvəl Ukrayna millisinin və Kiyev "Dinamo"sunun sabiq futbolçusu Aleksandr Yatsenko ölkəsinin mətbuatına geniş müsahibə vermişdi. O, müsahibəsində Azərbaycan klublarından birində baxışda olduğunu, lakin eşitdiyi söhbətlərdən sonra orada qalmaq istəmədiyini bildirmişdi.
Belə ki, onun yerli oyunçulardan eşitdiyinə görə, bir cənubi amerikalı futbolçu (onun braziliyalı və ya argentinalı olduğunu dəqiq xatırlamır – red.) pullarını almaq üçün başqa instansiyalara şikayət etmək istəyirmiş. Ancaq klub həmin oyunçunu hava limanında üstündə heroin bağlaması ilə tutulmaqla hədələyibmiş. Nəticədə futbolçu şikayət etmədən Azərbaycanı tərk etmişdi.
Futbolinfo.az xəbər verir ki, artıq qaynar.info həmin futbolçunun kimliyini müəyyən edə bilib. Əvvəlcə onu xatırladaq ki, Yatsenko 2013-cü ilin iyulunda "Rəvan" klubunda baxışda olub. Yəni, onun nəzərdə tutduğu klub Nuru Əliyevin sahibi olduğu "Rəvan"dır.
Açığı, Aleksandr Yatsenkonun nəzərdə tutduğu həmin futbolçunun əvvəlcə Kristian Torres olduğunu güman etmişdik. Ramiz Məmmədovun 2009-cu ildə "Qəbələ" üçün Latviyadan tapdığı, daha sonra "Rəvan" və "Qarabağ"da da çıxış etmiş argentinalı futbolçunun soyadı braziliyalılarda da olduğundan, Yatsenkonun onu qarışdırması başadüşülən idi. Ancaq Torres heç vaxt belə bir hədə ilə üzləşdiyi kluba 2013-cü ilin yayında geri dönməzdi.
Çox qısa müddətdə "Rəvan"ın sabiq yerli futbolçuları vasitəsilə müəyyənləşdirə bildik ki, söhbət braziliyalı hücumçu İqor Klaudiney Reys Souzadan gedir. İqor Souza kimi tanınan sambaçı 2010-cu ildə Portuqaliyanın "Feyrensi" klubundan Salyanın "Muğan" komandasına keçib. Klubun sahibi Nuru Əliyev 2011-ci ildə sərmayəni oğlunun adını daşıdığı "Rəvan"a köçürəndə, İqor da bu komandaya keçib. Ancaq braziliyalı 6 aydan sonra yoxa çıxıb.
O vaxt Azərbaycan mətbuatı bu 2 klubda ümumilikdə 39 oyuna 7 qol vurmuş futbolçunun qeyd olması ilə çox maraqlanırdı. "Rəvan" isə bunu ört-basdır etmək istəyirdi. Məsələn, 2012-ci ilin fevralında "Rəvan"ın vitse-prezidenti olmuş Bəhruz Şirəliyev mətbuata belə bir açıqlama vermişdi: “Onunla buradan gedəndə son söhbətimiz olmuşdu. Dedi ki, başqa komandaya keçmək istəmir, “Rəvan”da qalmaq fikrindədir. Bizim işçilər bir müddət onunla əlaqə saxlamışdılar. Reys hər dəfə ailə problemi, həyat yoldaşı ilə bağlı məsələni əsas gətirirdi. Ancaq son vaxtlar onunla əlaqə yoxdur. Yəqin ki, məsələsi bağlanacaq. Hərçənd Klaudiney ilə ilyarımlıq müqaviləmiz var”.
Təbii ki, Bəhruz Şirəliyev "məsələsi bağlanacaq" deməklə artıq o futbolçunun FİFA-ya şikayət etməyəcəyini və bir daha "Rəvan"da oynamayacağını da nəzərdə tutmuşdu…
- Premyer-liqa2024-04-28 21:55
“Sumqayıt” “Qarabağ”a qalib gəldi
- Premyer-liqa2024-04-28 19:37
“Neftçi” “Turan Tovuz”a böyük hesabla qalib gəldi
- Ölkə futbolu2024-04-27 23:05
Samir Abasov Xavi ilə görüşdü
- Ölkə futbolu2024-04-29 08:00
Avrokuboka vəsiqə üçün vacib qələbələr: Sumqayıtda hakimlər də iş başında idi