Premyer-liqa
Vaqif Paşayevin oğlu "Qəbələ"yə lazımdı?
Qış “transfer pəncərəsi” ölkə futbolunda əvvə…
Qış “transfer pəncərəsi” ölkə futbolunda əvvəlki illərlə nisbətdə, daha sakit keçdi. Amma son 2-3 ildə olduğu kimi, yenə də ən çox diqqət mərkəzində olan “Qarabağ” və “Qəvələ” idi. Bu da başadüşüləndi. Avropa Liqasının qrup mərhələsinin iştirakçıları daim 4 gözlə izlənilir. Ağdam təmsilçisi bir neçə perspektivə hesablanmış futbolçulardan savayı, Muarem Muarem və Rahid Əmirquliyevi rənglərinə qatmaqla, heyətlərini gücləndirdi. Bəs “Qəbələ?”
Hələlik yalnız Rəşad Eyubovu sıralarına qatan “qırmızı-qaralar” faktiki olaraq, qışda heyəti gücləndirməyiblər. Hər halda, indiyədək heç bir iddialı klubun şərəfini qorumayan Eyubovun “Qəbələ”nin gücünə güc qatacağını söyləmək sadəlövhlük olar.
İndi də əyalət təmsilçisi Pavel Paşayevlə münasibətlərini rəsmiləşdirmək ərəfəsindədi. Ampluasını yazdıqda ortaya suallar çıxır: cinah müdafiəçisinə nə ehtiyac? Əvvəla, Pavel Vaqif oğlu Paşayev (tanınmış mütəxəssis Vaqif Paşayevə aidiyyatı yoxdu) dəfələrlə milli komandamıza dəvət alsa da, rəsmi oyunlarda debüt etmək şansı qazanmayıb. Deməli, azərbaycanlı müdafiəçilərdən səviyyəsinə görə geri qalır ki, onların oyununu kənardan izləməklə kifayətlənməli olur. İkincisi, Arif Daşdəmirov, Məhəmməd Mirzəbəyov, Ürfan Abbasov, Rikardinyo kimi cinah müdafiəçiləri olan komandanın eyni ampluaya daha bir futbolçunu transfer etməsinə nə ehtiyac?
Nəzərə almaq lazımdı ki, “Qəbələ” qışda az-çox seçilən Fakundo Pereyrayla yollarını ayırıb. Yayda komandaya qoşulan Ermin Zets bu müddət ərzində Qriqorçukun komandasına uyğunlaşa bilməyib, Aleksey Antonov isə faydasız hücumçu obrazını üzərindən ata bilməyib. Göründüyü kimi, “Qəbələ”nin əsas problemi müdafiə yox, hücum xəttidi. Komandaya sanballı forvard almaq əvəzinə, heç kimə lazım olmayan Pavel Vaqifoviçi transfer etməklə heyət güclənə bilməz.
Elə Derlis Meza Kollinin gedişindən sonra Aleksey Qayı əvəz edə biləcək oyunçunun olmaması da qayğılandıran məsələlərdəndi. Nəzərə alsaq ki, Aleksey fiziki cəhətdən ciddi şəkildə axsayır, bu mövqeyə mütləq oyunçu alınmalı idi. Ancaq nədənsə “qış pəncərəsi” “Qəbələ” üçün olduqca kasad və yararsız oldu.
Əlbəttə, Roman Qriqorçuk Avropa Liqasında mübarizə aparmadıqları üçün əlavə oyuunçu almadıqlarını söyləyə bilər. Ancaq unutmayaq ki, yayda növbəti avrokuboklara start veriləcək. Həmin dövrdə alınan oyunçular isə heyətə uyğunlaşmaq sarıdan ciddi problemlərlə üzləşəcək. Bu üzdən də növbəti avrokubok mövsümünün uğurlu alınması üçün indidən əməli işlər görmək lazım idi. Daha paşayevlərə qucaq açmaq yox.
CEYHUN ƏLİYEV