Ölkə futbolu
"Domjale"nin baş məşqçisi: "Samirdə hər şey var"
“Samir Məsimov işimizə yarayacaq futbolçudu”. Fu…
“Samir Məsimov işimizə yarayacaq futbolçudu”. Futbolinfo.az xəbər verir ki, bu sözləri Sloveniyanın “Domjale” klubunun baş məşqçisi Luka Elsner deyib.
Azərbaycanlı futbolçu Samir Məsimovun bu yaxınlarda yollandığı Sloveniya çempionatında qış fasiləsi 2 gün sonra başa çatacaq. “Domjale” isə yüksək dəstənin ikinci hissəsindəki ilk görüşünü fevralın 28-də, səfərdə “Krka”ya qarşı keçirəcək.
Bu oyun ərəfəsində ölkəsinin mətbuatına müsahibə verən Elsner komandanın qış hazırlığını dəyərləndirib. “Domjale”dən gedən və heyətlərinə yeni qatdıqları oyunçular barəsində də danışan 33 yaşlı çalışdırıcı maraqlı fikirlər səsləndirib.
Elsner əvvəlcə “Domjale”nin hazırkı durumunu dəyərləndirib: “Komanda çox yaxşı vəziyyətdədi. Hazırlıq prosesindən razı qaldım. Təbii ki, hər şey meydanda görünəcək. Payızla müqayisədə indi oyun keyfiyyətimizi artırmalıyıq. Hazırlıqda əsas məqsəd də bu oldu”.
Qış fasiləsində “Domjale” iki aparıcı oyunçusu ilə yollarını ayırdı. Neyç Vidmar “Olimpiya”ya keçdiyi halda, Neyç Skubiç “Konyaspor”la anlaşdı. Əvəzində Sloveniya təmsilçisi heyətinə Samir Məsimov da daxil olmaqla, 5 yeni oyunçu qatdı.
Elsner yeni transferlərdən ikisini – Məsimov və Yankoviçi fərqləndirərək, onlardan daha çox şey gözlədiyini bildirib: “Heyətimizə bir neçə sloveniyalı oyunçu da qatmaq istəyirdik. Ancaq onlar başqa qərar qəbul etdilər. Əvəzində digər futbolçularla gücləndik. Yeni transferlərimizdən Samir Məsimov bir neçə mövsüm “Neftçi”də oynayıb. “Neftçi” Azərbaycanın köklü klublarından biridi. Hücumla əlaqələrin qurulması üçün Samirdə hər şey var. Rəqibə ciddi təhlükə yaratmağı bacarır. Eyni sözləri Yankoviçə də aid edə bilərəm. Hər ikisi böyük potensiala malikdi”.
Elsnerin sözlərinə görə, yeni futbolçuların alınması və istedadlı gənc oyunçulara sahib olmaları komandadakı rəqabəti gücləndirəcək: “Deyan Miliç kimi futbolçumuz hələ də zədəlidi. Onun tam qayıtması üçün bir neçə həftə lazım olacaq. Bunun müqabilində Aydın Mulaliç kimi perspektivli gənclərimiz var. Vidmarın və komandadan gedən digər oyunçuların yoxluğu bizə problem yaratmayacaq. Çünki onların yerini doldura bilmişik. Bir sözlə, rəqabət üçün yaxşı vəziyyət yaranıb”.
“Domjale”nin baş məşqçisi heyətə daha bir hücumçu cəlb etmək istədiklərini, ancaq bu planlarının həyata keçmədiyini qeyd edib: “Hücumçu mövqeyinə oyunçu axtarırdıq. Bir neçə futbolçunu sınaqdan keçirdik. Ancaq heç biri istədiyimiz səviyyədə çıxmadı. Seçim imkanımız az olduğundan, həmin mövqe ilə bağlı qərar qəbul etmək çətin idi. Ölkə xaricində də hücumçu axtardıq. Ancaq orada da böyük dərəcədə fərqlənən hücumçu tapmadıq. Biz mövsümün ilk yarısında 10-15 qol vurmuş futbolçu axtarırdıq. Lakin belə oyunçuların transfer qiyməti çox olur. Buna görə də, heyətimizdə olan 3 hücumçu – Slobodan Vuk, Alad Şişiç və 20 yaşlı Antonio Mançe ilə yolumuza davam etməyə qərar verdik. Bu və digər futbolçuların öz işlərinin öhdəsindən gələ biləcəyini düşünürəm”. (apasport.az)