Ölkə futbolu
“Futbolçunu gecə saat 3-də də yuxudan qaldırsalar, himni oxumalıdı”
Azərbaycan millisinin Qazaxıstana məğlubiyyəti təkcə meydanda s…
Azərbaycan millisinin Qazaxıstana məğlubiyyəti təkcə meydanda sərgilənən oyunla yadda qalmadı. Hələ görüşün startında milliləşdirilmiş futbolçuların himnimizi növbəti dəfə oxumaması diqqətdən qaçmadı. Bu azmış kimi qarşılaşmanın gedişində himni bilməyən milliləşdirilmiş Bədavi Hüseynova kapitan sarğısı da etibar olundu. Millimizin məzmunsuz oyunu ilə yanaşı, bu kimi hallar da oyundan sonra sosial şəbəkələrdə əsas müzakirə mövzusuna çevrildi.
Meydançada olanlara futbolçular müxtəlif bəhanə gətirə bilər. Amma neçə illərdi 2-3 bənd şeiri əzbərləmək bu qədərmi çətindi? Başa düşürük, hər nə qədər bu ölkənin şərəfini qorusalar da, dilimiz onlara çətin gəlir. Amma necə olur ki, ərəb dilində olan kitabları oxuyub, yadda saxlaya bilirlər, amma himn sözlərini yox? Dinə olan sevgi qədər geyindikləri formaya, bayrağa da sevgi ilə yanaşsaydılar, bəlkə də bu cür problemlər olmazdı.
Mətbuatı da qınamayın. Çünki biz nəticə, məzmunlu oyun gözləyirik. Bu olsaydı, bəlkə də himn yada düşməyəcəkdi. Amma həm futbol oynama, həm də himni oxuma – bu, artıq azərbaycanlıları təhqir etmək deməkdi.
Məsələ ilə bağlı yığmamızın sabiq futbolçularının fikirlərini öyrəndik:
Kamal Quliyev: “Bu, indinin problemi deyil. Millinin oyununda himn səslənəndə nəinki futbolçular, baş məşqçidən tutmuş komandanın inzibatçısına kimi hamı oxumalıdı. Ya bu, bizim savadsızlığımızı göstərir, ya da himnə önəm verilmir. Biz bu formanı geyinib, ölkənin bayrağı altında çıxış ediriksə, himni də, konstitutsiyasını da bilməliyik. Buna pis baxıram. Yığmanın sabiq futbolçusu olmuşam. Mənim üçün millət, dövlət həmişə birinci olub. Ukraynada “Volın”da çıxış edəndə azarkeşlərimizə iradımı bildirmişəm ki, Azərbaycan bayrağını dalğalandırmasalar, meydana çıxmayacam. Futbolçunu gecə saat 3-də də yuxudan qaldırsalar, himni oxumalıdı. Bu yöndə vacib iş aparılmalıdı ki, növbəti matçda bu cür problem olmasın və uğur qazanılsın. Əgər bu da bəhrəsini verməsə, həmin futbolçuları yığmadan kənarlaşdırmaq lazıdı. Himni bilməyənin millidə nə işi var? Əvəzolunmaz futbolçu yoxdu. Belə futbolçuya kapitan sarğısını həvalə etmək artıq faciədi. Futbolçular aralarında bu problemi həll edə bilər. Komandada elə oyunçular var ki, illərdi yığmanın şərəfini qoruyur. Bu futbolçular təzyiq etməlidilər. Messi, Ronaldo kimi futbolçular himn oxuyur, siz onlardan artıq deyilsiniz ki? İndi yığmaya düşmək ən asan şeylərdən biridi. Əvvələr ölkənin əsas komandasına düşmək üçün təlim-məşq toplanışları keçilməli, normativlər verilməli idi. Amma indi 1-2 oyun göstərməklə milliyə düşmək mümkündü”.
Samir Əliyev: ”Fərqi yoxdu, milliləşdirilmiş və ya yerli – yığmanın şərəfini qoruyan hamı himni bilməlidi. Nə deyə bilərəm ki? Komandanın baş məşqçisi və ya rəhbərlik bu məsələ ilə bağlı bir tədbir görsə, daha yaxşı olar. Fikrimicə, yığmada ümumiyyətlə, milliləşdirilmiş futbolçu oynamamlıldı. Hamı bir yerdə oxumalıdı. 2-3 nəfərin oxumağı düzgün deyil. Kapitan sarğısının milliləşdirilmiş birinə verilməsinə elə də pis baxmıram. Amma yerli oyunçuya verilsəydi, daha yaxşı olardı. Düzdü, Bədavi Hüseynov da uzun illərdi ölkəmizdə çıxış edir, “Qarabağ”la uğurlar qazanır. Futbol ictimaiyyəti məncə, bundan çox millinin oyununa diqqət yeriməlidi, lazımsız şeylərə vaxt ayırmamalıdı. Düzdü, himn, kapitanlıq da önəmlidi, amma əsas millinin çıxışıdı. Əgər Qazaxıstan məğlub edilsəydi, məncə, bu məsələlərə heç kim fikir verməyəcəkdi. Həmişə sağ əlimiz ürəyimizin üzərində, himn oxumuşuq. Bizim dövrümüzdə milliləşdirilmiş futbolçular çox az olub”.
Məsələylə bağlı millinin son oyununda iştirak edənlərin, yığmanın azərbaycanlı məşqçilərinin də fikirlərini öyrənmək istədik. Amma onlar Antalya istirahətindən gec döndüyündən heç birini tapmaq mümkün olmadı. Məsələni diqqətdə saxlayacağıq.
CAVAD
- Ölkə futbolu2024-05-10 08:00
“Yurqorden” Musa Qurbanlıya qiymət qoydu – 10 milyon kron
- Ölkə futbolu2024-05-10 09:21
“Əks təqdirdə fanatlar Şeydayevi qəbul etməyəcək”
- Dünya futbolu2024-05-10 16:37
AÇ-2024-ün rəsmi mahnısı təqdim edildi – VİDEO
- Ölkə futbolu2024-05-09 13:53
“Azərbaycanda həm yaxşı pul qazandım, həm də hörmət”