Layihə
13 GÜN QALDI: Təbliğatda qüsurlar var
17 yaşlılardan ibarət yığma komandalar arasında Bakıda ke&ccedi…
17 yaşlılardan ibarət yığma komandalar arasında Bakıda keçiriləcək Avropa çempionatının final mərhələsinin startına 13 gün qalır. Düz 1 həftə öncə AFFA-nın marketinq və reklamlar şöbəsinin müdiri Tural Piriyevlə müsahibəni diqqətinizə çatdırmışdıq. Futbolinfo.az saytına danışan assosiasiya rəsmisi qitə birinciliyinin təbliğat kampaniyası barədə məlumat vermişdi. Dünən isə “AÇ ilə bağlı hər şey” başlıqlı yazı təqdim olunmaqla futbolsevərlərin biletləri necə əldə etmələri barədə informasiyaya geniş yer ayrılıb.
Məhz bu iki yazı ətrafında buraxılan qüsurları ortaya çıxaracaq, marketinq sahəsindəki boşluqları oxucularımıza və əlbəttə ki, AFFA rəhbərliyinə çatdıracağıq.
Bilet satışının təşkil olunduğu ünvanlara baxdıqda, qəribə mənzərə yaranır və ortaya bir neçə sual çıxır:
1) Nəyə görə satış ancaq Bakı şəhərində təşkil olunur? Qəbələ, Lənkəran, Zirə, Sumqayıt. Ən azı bu bölgələrin klublarının futbolçularının U-17 yığmasına dəvət olunması faktoru nəzərə alınmalı və bilet satışı ölkəmizin həmin bölkgələrində təşkil olunmalı idi. Elə “Qəbələ”, “Xəzər Lənkəran”, “Zirə” və “Sumqayıt” da təbliğat kampaniyası keçirə bilərdi və azarkeşlərinə məhz öz futbolçularının oyunlarını izləmək üçün bilet almağı tövsiyə edərdi.
2) “Park Bulvar” ticarət mərkəzi, Bakı Olimpiya Stadionu, “28 Mall” ticarət mərkəzi, 8-ci km stadionu, “Gənclik Mall” ticarət mərkəzi, Qarabağ stadionu, “Şüvəlan Park” ticarət mərkəzi, Bakcell müştəri xidmətləri – bu, biletlərin satıldığı nöqtələrin siyahısıdı.
Ən çox diqqətçəkən ünvan Bakı Olimpiya stadionudu. Nə avtobus gedir, nə metronun çıxacağındadı, nə oyunlar keçirilir bu ünvanda. Soruşmaq ayıb olmasın, kimə satırsınız həmin biletləri? CBC telekanalının əməkdaşlarına? Respublika stadionunun, “İnter Arena”, “AZAL Arena”nın kassaları, kinoteatrlar və əlbəttə ki, elektron satışın unudulduğu bir vaxtda şəhərin ən əlverişsiz yerində satış nöqtəsi təşkil etmək acı təbəssüm doğurur.
3) Təbliğat kampaniyasının yalnız orta məktəblərdə aparılması da üzücü məqamlardandı. Axı, ali təhsil ocaqları dura-dura, nəyə görə azyaşlılara müraciət olunur? Biz məktəblərdə iş aparılmasının əleyhinə deyilik. Ancaq bu, azyaşlı uşağa konfet verib, başını aldatmağa bənzəyir. Daha dərin düşüncəli təbəqəylə isə həqiqi təbliğat aparmaq gərəkir. Bunu bacaranmı yoxdu, əl bulaşdırmaq istəyənmi? Hər iki halda tarixində ilk dəfə belə mötəbər yarışa ev sahibliyi edən Azərbaycan üçün təbliğatın belə ucuz aparılması yolverilməzdi. Çoxsaylı aksiyalar keçirilməli, səyyar təbliğat qruplarının fəaliyyəti paytaxtımızda daim bu yarışı gündəmdə saxlamalı idi. Şəhərdəki bilbordlarda Avropa çempionatına həsr olunan reklamlar da yoxdu.
Təəssüf ki, görülə biləcək işlər çox olsa da, sanbalına görə Avropa Oyunlarını xeyli üstələyən bu yarış lazımınca təbliğ olunmur. Təbliğat keyfiyyətli olmayandan sonra tribunalara boylanmağa dəyməz. İndidən azarkeş sayının az olacağını proqnozlaşdırmaq çətin deyil. Özü də təbliğata uyğun olaraq, çoxluğu məktəblilər təşkil edəcək.
CEYHUN ƏLİYEV
- Ölkə futbolu2024-04-19 21:00
“Sumqayıt” avrokubok iddiasını davam etdirir
- Premyer-liqa2024-04-19 18:26
“Turan Tovuz” “Sumqayıt”a böyük hesabla məğlub oldu
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq