Premyer-liqa
Qanqrena
Bir neçə gün öncə ölkə çempionatının…
Bir neçə gün öncə ölkə çempionatının 31-ci turu çərçivəsində baş tutan “Qarabağ” – “İnter” görüşünün baş hakimi Rəvan Həmzəzadə Zurab Xizanişvilinin boş qapıdan çıxardığı topu Giorgi Lomayanın əlinə götürməsini ötürmə kimi dəyərləndirməsi geniş müzakirəyə səbəb oldu. Ancaq müzakirələr geniş olsa da, videotəkrarda gürcü müdafiəçinin ayağının çölüylə topu kənarlaşdırmaq cəhdi aşkar göründükdən sonra ədalət təmsilçisinin səhvə yol verdiyi üzə çıxdı.
Dəftər-kitaba görə Həmzəzadə oyunun nəticəsinə təsir edən qərar verməyib. Çünki “Qarabağ” ədalət təmsilçisinin təyin etdiyi sərbəst zərbədən yararlana bilmədi. Bu qədər bəsit.
Kitab-dəftərlə işimiz yox, söhbət hakimlərin hazırlanmasından gedir. Cari mövsüm buraxılan səhvləri nəzərə aldıqda, vəziyyətin faciəvi olması acı reallığa çevrilir. Özü də bəhs etdiyimiz səhv sıradan biri deyil. Hakim hadisə yerinə olduqca yaxındı. Ancaq hadisəni düzgün qiymətləndirmir.
Hakimlər Komitəsinin fəaliyyətinin rüsvayçı vəziyyətdə olması hər kəsə bəllidi. Məsələ heç də Xaqani Məmmədovun dəfələrlə rüşvətdə ilişməsində deyil. Bunu qoyaq bir kənara. Söhbət peşəkar hakimlərin yetişdirilməsindən gedir ki, burada ciddi axsamalar var.
Bəli, hakimlərin rüşvət almaq məsələsi böyük ölçüdə aradan qaldırılıb. Amma bunun Xaqani Məmmədova heç bir aidiyyatı yoxdu. Özü də rüşvəti aradan qaldırmaq nəvaxtdan qəhrəmanlıq sayılıb? Rüşvət alanla pulla bədənini satan fahişə arasında fərq olmadığını nəzərə alsaq, bu, sadəcə, pozğunluqdan təmizlənmə deməkdi. Hakimləri nəzərdə tuturuq, digər futbol məmurlarının bu işdən əl çəkməsi mübahisə mövzusudu. Çünki bir neçə milyonluq layihə adı altında 300-500 min xərcləyib, qalanını mənimsəmək də eyni yolun yolçuluğu anlamına gəlir.
Qayıdaq hakimlik məsələsinə. Həmzəzadənin buraxdığı səhvin bir adı var – savadsızlıq. Ancaq bunda Rəvandan çox Xaqani Məmmədov günahkardı. Çünki tələbəsinə dərsi öyrətmədən kimlərinsə taleyini həll etməyə göndərir. Ancaq az əvvəl də qeyd etdik ki, bu, yeganə belə hal deyil. Xaqani Məmmədov sexindən çıxan əksər hakimlər ciddi səhvləri ilə klubların müqəddəratına təsir mexanizminə çevriliblər.
Əlin hansısa barmağı qanqrena edəndə, onu kəsib atırlar. Ki, zəhərlənmə bədənə yayılmasın. Əgər Hakimlər Komitəsi normal hakim istehsal edə bilmirsə, futbol mətbəximiz qanqrena etmiş barmaqdan qurtulmalıdı. Və nə qədər tez qurtulsa, bir o qədər tez də şəfa tapar.
CEYHUN ƏLİYEV
- Ölkə futbolu2024-04-11 10:32
AFFA-nın gülməli seçimi: Uğursuz klub rəhbəri Hakimlər Komitəsinə sədr olacaq?
- Ölkə futbolu2024-04-11 14:10
AFFA-da növbəti təyinatlar olacaq: yeni baş katib və PFL prezidenti
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Ölkə futbolu2024-04-11 13:34
Lunyov “Qarabağ”ın uğurunun sirrini açdı: məşqçilər, həkimlər və…