Layihə
7 GÜN QALDI: Yolu Azərbaycandan keçənlər
Ölkəmizdə start götürəcək 17 yaşlı futbolç…
Ölkəmizdə start götürəcək 17 yaşlı futbolçuların Avropa çempionatına sayılı günlər qalıb. Futbolinfo.az sözügedən turnirlə bağlı layihəsini davam etdirir.
Budəfəki yazıda vaxtilə bu turnirin final mərhələsində iştirak edən bəzi futbolçulardan bəhs edəcəyik. O futbolçular ki, azərbaycanlı azarkeşlərə də yaxından tanışdı. Hansı ki, bu oyunçuların bəziləri dünyaca məhur klubların şərəfini qoruyubsa, bəzilərinin də yolu məhz Azərbaycan çempionatından keçib.
Bu mənada ilk “qaranquş” 2008-12-ci illər aralığında “Bakı”nın qapıçısı olmuş Marko Şarliyanı saymaq olar. Xorvatiyalı oyunçu 1999-cu ildə Çexiyada hələ o zaman turnir 16 yaşadək futbolçuların Avropa çempionatı adlanarkən iştirak edib. “Damalılar” həmin turnirdə İspaniya, Rusiya və Polşanın yer aldığı qrupda 1 xalla sonuncu pillədə qərarlaşmışdı. Elə həmin Polşanın qapıçısı olan Pavel Kapsa da azarkeşlərimizə yaxşı tanışdı. Əlcək sahibi 2013-15-ci illərdə hazırda fəaliyyətini dondurmuş “Simurq”un şərəfini qoruyub. O, məlum sanksiyaya görə ötən yay keçdiyi “Xəzər Lənkəran”ı debüt matçına çıxmadan tərk etdi.
“Neftçi”nin müdafiəçisi Xuan Melli isə turnirdə iştirak etməklə kifayətlənməyib, həm də AÇ-nin qalibi olub. O, 2001-ci ildə İspaniya yığmasının heyətində bu şərəfə nail olmuşdu. Andreas İnyesta, Fernando Torres kimi oyunçularla birlikdə turnirin fəxri mükafatı qazanan müdafiəçi turnirdə millsinin ilk qolunun da müəllifi olub. Rumıniyanı məyus edən Melli 1/4 finalda da oyunsonrası penaltilər zamanı italyanların torunu silkələyib. Ötən mövsüm qış fasiləsində “Simurq”a keçən ispan oyunçu yaydan etibarən, “Neftçi”də çıxış edir.
2002-ci ildə turnir 17 yaşadək futbolçuların Avropa çempionatı adlandığı ilk turnirin isə 3 iştirakçısının yolu Azərbaycandan düşüb. İlk olaraq, həmin turnirdə iştirak edən futbolçulardan moldovalı Denis Kalinkov ölkəmizdə çıxış edib. O, 2009/10 mövsümündə “Xəzər Lənkəran”da çıxış edib. Həmin turnirdə Moldova 0 xalla qrup sonuncusu olsa da, Kalinkov 3 matçda vurduğu 5 qolla yadda qalıb.
Danimarkada keçirilən yarışda Ukrayna yığması ilə qrupda qalan Aleksandr Sitnikin isə Azərbaycan karyerası qısa çəkib. O, cari mövsümün ilk yarısında “Kəpəz”in formasını geyinsə də, qış fasiləsində komandadan kənarlaşdırılıb.
Hazırda AZAL-ın şərəfini qoruyan gürcüstanlı Aleksandr Quruli də eyni çempionatın iştirakçısı olub. O, adıçəkilən digər 2 futbolçudan fərqli, həmin yarışda qrupdan çıxmaq sevincini yaşayıb. Amma 1/4 finalda turnirin gələcək qalibi İsveçrə səddi keçilməz olub – 0:3.
Ötən mövsümün qış fasiləsində Roman Qriqorçukun “Qəbələ”yə gətirib, yayda komandadan göndərdiyi belaruslu Mixail Sivakov da bu turnirin iştirakçılarındandı. O, hətta 2005-ci ildə İtaliyada keçirilən yarışlarda qrupda qalan komandasının vurduğu 2 qoldan birinin müəllifidi. Sivakov Belarusun Türkiyəyə 1:5 hesabı ilə məğlub olduğu görüşdə millsinin yeganə qoluna imza atıb.
Eyni turnirdə Xorvatiya yığması ilə 4-cü yerə çıxan Matiya Şpiçiç də bir vaxtlar Premyer Liqamızda iştirak edənlərdəndi. O 2013-15-ci illər aralığında “İnter”in formasını geyinib.
Azərbaycan çempionatında oynamış futbolçular arasında sonuncu dəfə bu turnirdə çıxış edəni isə Lorenzo Ebesilyodu. 2013/14 mövsümündə “Qəbələ”də forma geyinən hollandiyalı hücumçu yarımfinal sevincini yaşayıb. “Narıncılar” Türkiyədə keçirilən yarışda ispanların finala keçməsinə əngəl ola bilməyiblər.
Ölkəmizdə keçiriləcək turnirdə iştirak edəcək futbolçular arasında bəlkə də gələcəkdə dünyanın ən yaxşı oyunçuları olacaq şəxsləri görə biləcəyik. Necə ki, bunu bir vaxtlar Fernando Torres, Andreas İnyesta, Lukaş Podolski, Mario Qomeş, Ueyn Runi, Kriştiano Ronaldo və s. bacarıblar. Bununla yanaşı nə vaxtsa, Azərbaycan klublarının da heyətində məhz belələrini görmək şansımız var. Elə yazıda adını çəkdiklərimiz də buna misaldı.
ELMAR ABDULLA-ZADƏ
- Ölkə futbolu2024-04-17 17:17
Kadiri yeni məşqçiyə uyğunlaşır: “Zamana ehtiyacımız var”
- Müsahibə2024-04-18 08:00
Rezabala avrokuboka vəsiqə istəyir: “Səhv etməyə ixtiyarımız yoxdur”
- Müsahibə2024-04-17 16:07
Sekidika çempionatın səviyyəsindən razıdır: “İstənilən komandanı məğlub etmək olar”
- I Liqa2024-04-17 17:34
Apellyasiya Arbitraj Tribunalı AFFA İntizam Komitəsinin qərarını dəyişdi