I Liqa
Bir görüşün təfərrüatı
Məşqçilər Komitəsinin (MK) 1-ci divizion təmsilçil?…
Məşqçilər Komitəsinin (MK) 1-ci divizion təmsilçiləri ilə dünən baş tutan görüşünün bir sıra məqamları bu yazının işıq üzü görməsini şərtləndirdi. Görüşün başlamasına hələ 15-20 dəqiqə qalmış Komitənin sədri Vaqif Sadıqova “bəlkə tədbiri mətbuat işçiləri üçün açıq keçirəsiniz?” sual-təklifi ilə müraciət etdim. Rəsmən “yox” desə də, müəyyən dəlillərim qarşısında kəskin etiraz etmədi və nəticədə media mənsubları dinləyici qismində tədbiri müşahidə edə bildi.
MK üzvləri yığncağa tam heyətlə gəlmişdi – Sadıqovun “sağdişi” Ağasəlim Mircavadov, “soldişi” isə Böyükağa Hacıyev idi… əylşdikləri kreslolara uyğun olaraq. “Mirzəliyi” Şakir Qəribova həvalə etmişdilər. “Neftçi”nin sabiq “2 nömrə”sinin iş otağında bu dəftərçədən silahdaşları ilə ümumi “şparqalka” kimi istifadə edəcəyi də aşkar sezilirdi. Çünki Qəribov qeydlər apararkən, onlar müəyyən xatırlatmalar etməyi də unutmurdular.
Vaqif Sadıqov “Şərurspor”un prezidentinin gəlmədiyini gördükdə, hələ kuluarlarda baş məşqçi Məmmədəli Qəniyevə kəskin etirazını bildirdi. Özü də haqlı etirazını. Sözünün canı bu oldu ki, klub prezidenti söz sahibidi, baş məşqçiylə nəyi müzakirə edəcəyik. Sadıqov eyni sözləri xeyli sonra iclasda da səsləndirdi.
Ümumi ifadələr, bay tərifi tipli sözləri bir kənara qoysaq, real proseslər aşağıdakılar oldu:
Birinci divizion klublarının futbolçularından ibarət yığmanın yaradılması təklif edildi və klublar tərəfindən dəstəkləndi;
Yaş limitinə baxılması təklifi səsləndi və Premyer Liqaya uyğun limitin daha məqbul olduğu bildirildi. Nəticədə, bu təklif Şakir Qəribovun dəftərçəsinə qeyd olundu;
Premyer Liqada iştirak üçün lisenziya şərtlərinin yumşaldılması. Dolayısı ilə, təklif rədd edildi.
Danışılmış oyunlar barədə kəskin mövqe bildirilmədi, sadəcə,üstündən keçdilər. Ancaq bu da kifayət etdi ki, futbolinfo.az saytının qabartdığı və gündəmdə saxladığı məsələnin AFFA-nı ciddi düşündürdüyünü qabarıq şəkildə ortaya qosun.
Sonda qərara alındı ki, 1-ci divizionun işçi qrupu yaradılsın – hər komandadan bir nümayəndə. Bu qrup divizionun təkliflər paketini hazırlasın və Məşqçilər Komitəsinə təqdim etsin.
CEYHUN ƏLİYEV