Layihə
6 GÜN QALDI: Gizlədilən milli
17 yaşadak futbolçular arasında keçiriləcək növ…
17 yaşadak futbolçular arasında keçiriləcək növbəti Avropa çempionatına artıq sayılı günlər qaldı. Zaman daraldıqca futbolçuların həyəcanı artır, baş məşqçimiz Təbriz Həsənov son götür-qoylarını edir. Axı, o, neçə vaxtdı keçirdiyi seleksiya tipli toplanışı bitirib, mayın 1-də yekun heyəti açıqlamalıdı.
Seleksiya toplanışında kimlərin olmasını, kimlərdən imtina edilib hansı yeni oyunçuların düşərgəyə cəlb edilməsini öyrənmək müşkül məsələyə çevrilib. AFFA komandanı imkan daxilində qıfıl altında saxlayır. İlk baxışdan bu, futbolçuları psixoloji təzyiqdən qorumaq üçün normal hal sayıla bilər. Amma o da var ki, belə özünütəcridin də fəsadları olacaq.
Təlim-məşq toplanışında olan U-17 komandamız indiyədək 2 yoxlama oyunu keçirib. Rəqiblər isə U-19 və "Qarabağ"ın əvəzedici komandası olub. Ancaq bu barədə AFFA-nın rəsmi saytında heç bir məlumat yerləşdirilməyib. Halbuki gizlətmək üçün hansısa səbəb yoxdu. Əvvəla, ona görə ki, nəticələr pis deyil – 1 qələbə, 1 heç-heçə. İkincisi, kimsə cınaq matçlarındakı bu nəticələrə görə kimisə qınayan deyil. Yalnız heyətdə milliləşənlərin çox olması üzündən matçlardan videoreportaj, fotolar olmaya bilər, protokol yerləşdirilməz. Unutmayaq ki, cidanı çuvalda gizlətməklə deyil, onsuz da yekun heyət açıqlananda çox mətləbə aydınlıq gələcək.
İş ondadı ki, nəinki jurnalistlər, həmkarlarımıza inansaq, hətta valideynlər də millinin sınaq matçlarına buraxılmır. Olsun, ancaq unutmayın ki, oyunları izləməklə futbol ictimaiyyəti də müəyyən qiymətləndirmə apara, heyətin Həsənov tərəfindən təkbaşına müəyyənləşdirilməməsində rol oynaya bilərdilər. İndiyədək bir oyuna belə buraxılmayan Məşqçilər Komitəsi də Təbriz bəyə məsləhət verərdi. Yox, heyət indidən bəllidisə, tapşırıqla düşərgəyə çağırılan milliləşənlərin yeri təmin olunubsa, o başqa məsələ. Görünür, kimlərəsə matçları izləyəcək onlarla skautun qarşısına çıxarmaq üçün “satılacaq əcnəbilər” daha önəmlidi, milliyə layiq olan yerlilər yox.
Prosesi izləməkdəyik. Yekun heyətdə ölkə klublarında heyətə düşən futbolçulardan neçəsinin olacağı, U-17 liqasından hansı oyunçuların üzə çıxdığı, milliləşənlərdən neçəsinin skautlar önünə çıxarılacağı mayın 1-də bəlli olacaq. Gizlədilən U-17 yığmamızın əsl siması onda açılacaq, bacarığı isə elə Portuqaliya ilə ilk oyundaca bilinəcək.
AĞA