Ölkə futbolu
“Atletiko”nun təklifinə “hə” desəydik…
17 yaşlılar arasında Avropa çempionatının final mərhələ…
17 yaşlılar arasında Avropa çempionatının final mərhələsində ilk oyununu keçirən Azərbaycan millisi şok məğlubiyyət aldı. Rəqibin gücünü nəzərə alsaq, 0:5 hesabını hardasa proqnozlaşdırmaq olardı. Amma millimizin evdə oynaması və heyətinin 6 əcnəbi ilə gücləndirilməsi kimi amillər var. Yəqin ki, oyunu izləməyə gələn ölkə başçısı da bu səbəbdən komandamızdan daha çox şey gözləyirmiş və hesab 0:3-ə çatan kimi arenanı tərk etdi.
Bəs, həmişə “rəqib güclü idi” deyib zəifliyimizlə barışmalıyıqmı? Bu biabırçılıqdan qaçmaq, Avropa çempionatına daha yaxşı komanda formalaşdırmaq olmazdımı?
Təbii ki, mümkün idi. Sadəcə, işi düzgün qurmaq, yaxşı seleksiya aparmaq, seçilən uşaqlarla yüksək səviyyədə iş aparmaq lazım idi. Həm də son bir ildə yox, həmişə. Hətta 17 yaşlılar arasında Avropa çempionatına namizədliyimizi verməmiş güclü gənc nəslin inkişafı üçün tədbirlər görülməli idi. Lap elə dövlət proqramının qəbul olunduğu 2005-ci ildən etibarən.
Başqa variantlar da var idi. Yadımdadı, bir neçə il öncə “Bakı” ilə əməkdaşlıq edən “Atletiko” maraqlı plan təklif etmişdi. İspan klubu azərbaycanlı gəncləri milli komanda halında düşərgəsinə cəlb etmək, onlarla 5 il müddətinə məşğul olmaq istəyirdi. Təklif olunan əməkdaşlıq müqaviləsinin detallarını tam bilmirəm, amma bildiyim qədər hər şeyi madridlilər üzərinə götürürdü.
Klublarımızdan milliyə namizəd sayılan 40 futbolçu “Atletiko”nun düşərgəsinə yollanacaq, orada hazırlaşacaq, müxtəlif klublara yerləşdirilərək oyun praktikası qazandırılacaqdı. Həmin futbolçuların Azərbaycan klubları ilə anlaşması qüvvədə qalacaq, ikili müqavilə əsasında onların daha yaxşı yetişmələrinə şərait yaradılacaqdı. Bütün xərcləri “Atletiko” çəkəcək və Azərbaycan milli komandası üçün yüksək səviyyəli oyunçulardan ibarət heyət hazırlanacaqdı. Həmin uşaqlar həm indiki çempionatda, həm də AVRO-2020-də əsas komandada əsas qüvvə olacaqdılar.
Madridlilərin bu xidmətin qarşılığında nə istədiyini dəqiq bilmirik. Amma yəqin ki, Türkiyədən tələm-tələsik heyətə qatılan 6 əcnəbiyə xərclənən məbləğlə müqayisədə daha sanballı layihə olardı. Çünki ortada nümunə var. Hazırda əsas komandalar arasında yayda keçiriləcək AVRO-2016-ya İslandiya millisini məhz ispanlar hazırlaşdırıb. Uğurlu fəaliyyətin nəticəsidi ki, islandlar seçmə mərhələdə Hollandiya və Türkiyə millilərini də qabaqlayaraq lider kimi AÇ-yə getmək şansı qazandı.
“Atletiko”nun AFFA-ya etdiyi bu təklifi kimin və niyə müzakirə belə etməyi lazım bilməməsinin səbəbləri müəmmadı. Ancaq o dəqiqdi ki, ziyanın yarısından da qayıtmaq olar. Bir qrupunun oyunlarına ev sahibliyi edəcəyimiz AVRO-2020-də millimizin də təmsil olunması üçün bu təklifə baxmaq olar. Azərbaycanda istedadlı uşaqlar çoxdu. Onları Almaniyadan, Türkiyədən, Dağıstandan gətirilən yadların ayağına verməsək, qayğılarına qalsaq, daha yaxşı olar. O zaman ən azı uzun fasilədən sonra yolunu stadiondan salan ölkə başçısı arenanı məyus və qəzəbli tərk etməz.
CAVAD
- Ölkə futbolu2024-04-11 10:32
AFFA-nın gülməli seçimi: Uğursuz klub rəhbəri Hakimlər Komitəsinə sədr olacaq?
- Müsahibə2024-04-10 11:44
Subaşiç “Neftçi” və “Qəbələ”yə görə məyusdur: “Rəhbərlik heyət və məşqçi ilə bağlı qərar verməlidir”
- Ölkə futbolu2024-04-11 14:10
AFFA-da növbəti təyinatlar olacaq: yeni baş katib və PFL prezidenti
- Ölkə futbolu2024-04-11 13:34
Lunyov “Qarabağ”ın uğurunun sirrini açdı: məşqçilər, həkimlər və…