Ölkə futbolu
Dadaşov: düşmən, yoxsa təbliğat maşını?
Renat Dadaşov Avropa çempionatının yarımfinalında! Bəli, …
Renat Dadaşov Avropa çempionatının yarımfinalında! Bəli, Bakıda keçirilən 17 yaşlılar arsında qitə birinciliyinin 4 ən yaxşı komandası arasında çıxış edən futbolçulardan biri azərbaycanlı olacaq.
Dünən “Dalğa Arena”da “alman maşını” Belçikayla görüşdən kimin qalib ayrılmalı olduğunu ilk dəqiqələrdən ortaya qoydu. “Qırmızı iblislər” “2-ci nömrə”ni seçərək, yalnız müdafiə olunurdular. Bütün heyətlə qapılarının toxunulmazlığı barədə düşünən Tyeri Kikkenin yetirmələri ilk yarıda istəklərinə çatsalar da, əslində “Bundestim” hələ fasiləyədək tablodakı “0”-ları bir neçə dəfə dəyişməli idi. Lakin son nöqtəni qoymaq mümkün olmurdu ki, olmurdu…
İkinci hissənin əvvəli də eyni ssenari ilə keçirdi: almanlar sözün həqiqi mənasında Mile Sviların qoruduğu qapını mühasirəyə almışdılar. Nəhayət, ikinci hissənin 6-cı dəqiqəsində dağ boyda almanlara qol sevincini AZƏRBAYCANLI balası yaşatdı. Renat Dadaşov cərimə meydançası kənarında zərgər dəqiqliyi ilə endirdiyi zərbə uzaq “doqquzluğ”a sancıldı. Bu epizodda nə Sviları, nə də meydandakı digər oyunçuları günahlandırmaq olmazdı. Bu cür zərbələrin bir adı var – qarşısıalınmaz! Stadonun diktorunun elanını eşitmək, bu hissləri yaşamaq üçün qətiyyən dardüşüncə olmaq olmaz!
Standart “azərbaycanlı ola-ola gedib “nemeslər”dən oynayır” fikrindən də qaçmaq lazımdı. Çünki bu adam Almaniyada doğulub, futbolun sirləri də ona bu idman növünün beşiklərindən sayılan bu ölkədə aşılanıb. Tərəzinin gözündə div və cırtdan dayandığı bir məqamda damarlarında axan qanı önə çəkmək isə doğru deyil. Ona görə ki, kimdənsə nəyisə tələb etməmişdən əvvəl bir çevrilib özünə baxmalısan. Elə təkcə bu Avropa çempionatında 6 azərbaycanlını son anda “brak” çıxarıb, əvəzinə türkiyəli futbolçulara qucaq açan AFFA rəsmilərinin damarda axan qandan söhbət açmağa ixtiyarı yoxdu! Sənin əsas yığman da bu kökdədi, gənclərin də, yeniyetmələrin də! Hansı hüquqla “sən azərbaycanlısan” deyə bilərsən?!
Amma məsələnin müsbət faktorlarından mütləq istifadə olunmalıdı. Renatı təbliğat maşını kimi istifadə etmək gərəkdi. Bu gün böyüklər arasında dünya çempionu olmağa ən real azərbaycanlı namizəd məhz Renatdı. Etiraf etmək lazımdı ki, onun seçiminə də məhz bu faktor təsir göstərib. Məsut Özil yığmamızdan qat-qat güclü olan Türkiyə millisndən imtina edibsə, Dadaşovun bu seçiminə top-tüfənglə yanaşmaq olmaz. Azərbaycanlı futbolçuya qarşı isti münasibət göstərməli, onu Almaniyanı seçdiyinə görə daş-qalaq etmək dilletantlıq göstəricisidi. Əksinə, Renatla ən xoş münasibətlər yaratmaq gərəkdi. Hazırda o, Bakıdadı. Telekanallardan birinə – götürək elə “CBC Sport”u – dəvət etmək, barəsində bir verliş təqdim etmək mümkündü. O, bu barədə mütləq vətəni hesab etdiyi məmləkətdə söz açacaq.
Arxaik fikirlərlə yanaşmaq isə utopiyadı. Əmin olun ki, Almaniyanın U-17 yığması vətənə qayıtdıqda bu yeniyetmələr ölkə mətbuatının diqqət mərkəzinə düşəcəklər. Özü də sıralamanın ön cərgəsində azərbaycanlı Renat Dadaşov dayanacaq. Deməli, bundan maksimum yararlanmaq, onun Almaniya mətbuatında ölkəmiz, futbolumuz barədə ən xoş sözlər deməsinə çalışmalıyıq. Ki, növbəti addımda Qarabağ həqiqətlərinin çatdırılmasında Almaniya müstəvisində carçımız olsun.
Onsuz da Aleksandr Səmədovla düşmən olduq. Bu da böyük səhv idi.Amma həmin “qatar artıq gedib”. İndi bu “kozır”dan maksimum yararlanmaq lazımdı. Özü də bu oğlanın adı Renatdı, hansısa Aleksandr deyil. Hər xırda detaldan ölkəmiz adına PR kampaniyasından maksimal dividend yığmaq gərəkdi. Kəsib atmaq asandı, ancaq dünya çapında erməni kimi düşməni olan ölkənin istənilən saman çöpündən istifadəsi önəmlidi. Dadaşov ölkəmizin Almaniyadakı səfiri olmaılıdı. Hələlik Almaniyadakı. Böyüyəndə isə bütün dünyada!
“Dalğa Arena”da “Belçika yığmasının qapısından topu Almaniya yığmasının 9 nömrəli futbolçusu Renat Dadaşov keçirdi” ifadəsini canlı-canlı eşitmək üçün günün 7 saatını bu oyuna sərf etməyin ən bahalı hədiyyəsini aldım. Qarşıda “Bundestim”i yarımfinal gözləyir. AFFA-nı bir kənara qoyaq, azarkeşlərimiz də Renata hansısa şəkildə dəstək olmalıdı. Almanca şüarlar, və ya alman dilində “Renat – sən bizim qürurumuzsan!” tipli banner dediklərimizə əlavə dəstək olar. Onun Almaniya yığmasını seçməsini isə pisləməyin. Fəxr edin ki, dağ boyda Almaniya AZƏRBAYCANLI balasına möhtacdı! Qalan şeylər isə lirikadı…
CEYHUN ƏLİYEV