“Cırtdan” mütləq “döyülməli”ydi?

Dünən yığma komandamız Avstriya toplanışı çərçivəsində ilk oyununu keçirdi. Robert Prosineçkinin rəhbərlik etdiyi komanda Andorra yığmasıyla qarşılaşmadan qolsuz bərabərliklə ayrıldı. İlk baxışdan böyük hədəflərdən dəm vuran yığma üçün “cırtdan”la bərabərə qalmaq rüsvayçılıqdı. Amma…

İlk oyunda demək olar ki, millinin simasını müəyyənləşdirən heç bir əsas fiqur heyətdə yer almamışdı. Bu, heç-heçənin başlıca səbəblərindən biridi. Çünki “istənilən heyətlə Andorranı udmağa borcluyuq” demək, sadəcə, diletantlıqdı. Axı, Azərbaycanda 50 eyni səviyyəli futbolçu yoxdu ki, heyəti komplektləşdirməkdə çətinlik çəkməyəsən. Qol buraxmayan yığmamızın sıralarında möhtəşəm müdafiəçilərin yetişməsi demək deyil, Andorranın zəif olmasından qaynaqlanın faktdı. Ancaq millimizdə xətlərarası əlaqənin olduqca zəif təsir bağışlaması normal hücumlar qurmağa mane olurdu. 

Oyunun ilk yarısında Prosineçkinin yetirmələri daha məzmunlu və əzmkar futbol sərgilədi. Bir neçə dəfə fərqlənmək imkanı olan millimizin ən real qol imkanını Budaq Nəsirov qaçırdı. Komanda yoldaşından ötürmə alan yarımmüdafiəçi qapıçı meydançasından rahat şəkildə topu dərhal çərçivəyə göndərmək əvəzinə, düşüncələrə daldı. Axı, rəqib, fərqi yoxdu hansı ölkənin, yığma komandasıdı, hansısa “Rəvan” deyil ki, sənə 3-5 saniyə fikirləşmək üçün vaxt verələr. Nəticədə, ona zərbə endirməyə müdafiəçi mane oldu. Bu epizod “Kəpəz”in oyunçusunun hələ futbol oynamağa öyrənməli olduğunu və yığma qapılarının açmağına çox qaldığının bariz nümunəsi oldu. 

Andorra yığmasının futbolçularının həddən artıq kobud oynadıqlarını da qeyd etməliyik. Bir çox epizodda açıq ayaqla futbolçularımıza qarşı kobudluqlar edən “cırtdanlar”, Elvin Məmmədovu az qala xərəklik edəcəkdilər. Nəzərə alsaq ki, bu, yoxlama görüşü idi, futbolçularımızın bu cür rəqiblə görüşdə nisbətən ehtiyatlı davranmalarına da bəraət qazandırmalıyıq. Çünki heç kimə yoldaşlıq görüşündə uzunmüddətli zədə hesabına qələbə gərək deyil. Rəqib bunu anlamırsa, özün ağıllı tərpənməlisən.

Fasildəən sonra komandamızın hücumlarının kəsərli alınmamasını da faciəyə çevirmək lazım deyil. Çünki bu heyət ilk dəfə idi ki, birlikdə oynayırdı. Kimlər üçünsə bu, yığma formasında debüt oyunu idi. Məşqçi məhz bu cür matçlarda yeni oyunçuları sınamalı, hansısa taktiki gedişlərə nəzər yetirməlidi. Bütün bu faktorları topladıqda, əminliklə söyləyə bilərik ki, Andorra ilə qolsuz bərabərliyi heç bir faciəyə çevirməyə əsas yoxdu. Qarşıda isə yığmamızı daha 2 oyun gözləyir. Bu dəfə də fərqli heyətlə…

CEYHUN ƏLIYEV