Ölkə futbolu
Oliver Lederer: “Kəpəz”i təzyiq altında saxlayacağıq”
“Tam hazırıq, matçın start fitini gözləyirik&rdq…
“Tam hazırıq, matçın start fitini gözləyirik”. Futbolinfo.az xəbər verir ki, bu sözləri “Admira” klubunun baş məşqçisi Oliver Lederer deyib.
Avropa Liqasının II təsnifat mərhələsi çərçivəsində Avstriya təmsilçisi bu gün öz meydanında “Kəpəz”lə qarşılaşacaq.
Matçdan öncə keçirilən mətbuat konfransında Lederer fikirlərini bölüşüb. “Kəpəz” barədə müsbət fikirlər səsləndirən çalışdırıcı buna rəğmən, iddialı danışıb: “Hazırkı ab-hava ötən mərhələdə “Spartak”la keçirdiyimiz oyunlardan öncəki vəziyyətlə eynidi. Şadam ki, mərhələ adlayaraq, Avroliqada mübarizəni davam etdirmək şansı qazandıq. İndiki rəqibimiz gücünü ilk mərhələdə göstərdi. “Kəpəz” “Daçiya” ilə keçirdiyi hər iki oyunda yaxşı müdafiə olundu. İkincisi, bu komandanın heyətində cənubi amerikalılar çıxış edir. Onların hər biri kreativ futbolçulardı və qol epizodları yaratmağı bacarırlar. Bundan əlavə, standart vəziyyətlər həmişə təhlükəli olur. Rəqibimiz çalışır ki, tez bir zamanda hava ötürmələrini qola çevirsin. Qısası, “Kəpəz”in kifayət qədər üstün keyfiyyətləri var. Ümumilikdə, hər iki oyunda düzgün taktika ilə çıxış etməliyik. Əsas odu ki, meydanda öz oyun fəlsəfəmizi tətbiq edə bilək və rəqib də bununla barışmağa məcbur olsun”.
Lederer bildirib ki, komandası “Kəpəz”i üstələmək gücündədi: “Bizim də üstün tərəflərimiz var və bunun hesabına “Kəpəz”i təzyiq altında saxlayacağıq. Təbii ki, meydandan yaxşı nəticə ilə ayrılmaq istəyirik”.
Qeyd edək ki, “Admira” – “Kəpəz” matçı Bakı vaxtı ilə 21:00-da start götürəcək.