İlklərin ölkəsi, uğurlu Makedoniya və macarlarla siftə

Bu gün Avropa Liqasının ikinci təsnifat mərhələsi çərçivəsində 3 təmsilçimiz mübarizəyə qoşulur. Futbolinfo.az xəbər verir ki, müstəqillik tariximizdə 2-ci dəfədi ki, bu mərhələdə maksimum komanda ilə təmsil olunuruq. 

İlk belə hal 2013-cü ildə yaşanmışdı. O zaman “Xəzər Lənkəran”, “İnter” və “Qarabağ”dan yalnız sonuncular mərhələ adlamışdı. Tarixə nəzər salsaq, görərik ki, indiyə kimi təmsilçilərimiz 14 iyul günündə bir neçə dəfə meydana çıxıblar. Yekunda komandalarımız 8 cəhdin 3-də mərhələ adlaya bilib. 

1999. “Sloqa Yuqomaqnat” (Makedoniya) – “Kəpəz” – 1:0 (ÇL)
2005. “Bakı” – “Jilina” (Slovakiya) – 1:0 (UK)
2005. “Nistru” (Moldova) – “Xəzər Lənkəran” – 3:1 (UK)
2009. “Ekranas” (Litva) – “Bakı” – 2:2 (ÇL)
2010. “Bakı” – “Budnçost” (Çernoqoriya) – 2:1 (-:+) (AL)
2010. “Portadoun” (Ş.İrlandiya) – “Qarabağ” – 1:2 (AL)
2011. “Streymur” (Farer adaları) – “Qarabağ” – 1:1 (AL)
2011. “Makkabi” (İsrail, Təl-Əviv) – “Xəzər Lənkəran” – 3:1 (AL)

İlk olaraq, meydana çıxacaq “Neftçi” tarixində ilk dəfə avrokuboklarda “Bakcell Arena”da qalib gəlməyə çalışacaq. “Ağ-qaralar” bu stadionda keçirdiyi 4 görüşün heç birində qalib gələ bilməyib. Amma indi bu uğursuzluğu unutdurmaq üçün yaxşı imkan var. Çünki Makedoniya klubları həmişə təmsilçilərimizin dişinə görə rəqib olub. Adıçəkilən ölkə təmsilçiləri heç vaxt paytaxtımızda qalib gələ bilməyib. 3 dəfə məğlub olan makedonlar, yalnız 1 halda qolsuz sülhlə vətənlərinə dönüblər. Ümumiyyətlə, balkanlılarla 4 duelin yalnız ilkində “Kəpəz” mərhələ adlaya bilməyib. Amma əvəzində gəncəlilər təmsilçilərimizin Çempionlar Liqasında ilk qələbəsini qazana bilib: 

1999. “Sloqa Yuqomaqnat” –  “Kəpəz” – 1:0, 1:2 (ÇL)
2008. “İnter” – “Rabotniçki” – 0:0, 1:1 (ÇL)
2010. “Qarabağ” – “Metallurq” – 4:1, 1:1 (AL)
2013. “Metallurq” – “Qarabağ” – 0:1, 0:1 (AL)

“Kəpəz” isə səfərdə Avrstriya təmsilçisi “Admira” ilə qarşılaşacaq. Bu ölkənin təmsilçiləri ilə 4 dueldən yalnız birində mərhələ adlamağa nail olmuşuq. Onda da “İnter”in xələfi “Xəzər Universiteti” səfərdə qazandığı texniki qələbə sayəsində bu uğura nail olmuşdu. Bu, komandalarımızın o zamanlar mövcud olan İntertoto kubokunda ilk dəfə mərhələ adlamasına vəsilə olmuşdu. Ümumiyyətlə, Avstriya klubları futbolumuz tarixində ilklərlə yadda qalıb. Avrokuboklarda təmsilçilərimiz ilk qolunu məhz Yadigar  Süleymanovun sayəsində avstriyalıların qapısından keçirib. Elə “Qarabağ”ın evdə güclü “Zaltsburq”u üstələməsi də komandalarımızın ÇL-in 3-cü təsnifat mərhələsi çərçivəsində hələ ki, ilk və tək uğurudu:

1995. “Kəpəz” – “Austriya-Memfis” – 0:4, 1:5 (UK)
2004. “Kazino Bregents” – “Xəzər Universiteti” – 4:0 (-:+), 1:2 (İK)
2007.”Rid” – “Neftçi” – 3:1, 1:2 (UK)
2014. “Qarabağ” – “Zaltsbuq” 2:1, 0:2 (ÇL)

Macarıstan səfərində olan “Qəbələ” isə avrokuboklarda heç vaxt rəqib meydanında qələbə qazana bilməyib. Nəticədən asılı olmayaraq, bu matç bizim üçün ilk olaraq yadda qalacaq. Çünki indiyə kimi təmsilçilərimiz heç vaxt Macarıstan klubları ilə avrokuboklarda üz-üzə gəlməyib.