Ölkə futbolu
Elnur Məmmədovla "elektrik stulu"nda. "Qalstuksuz"
Makedoniyanın paytaxtında keçirdiyimiz ikinci günün…
Makedoniyanın paytaxtında keçirdiyimiz ikinci günün zirvə nöqtəsi "Neftçi"nin nümayəndə heyətinin rəhbəri, klubun icraçı direktoru Elnur Məmmədovun dəvəti ilə baş tutan nahar yeməyi oldu. Əlbəttə, yemək bəhanə idi. Klub rəsmisi ilə Avropa Liqasının 2-ci təsnifat mərhələsinin cavab oyunu öncəsi "qalstuksuz" görüş həm səmimi alındı, həm də məhsuldar.
Kimdi lider?
Doğrudu, müzakirələr ölkə futbolunun bugünkü durumundan start götürdü. Ancaq bütün yollar Romaya aparan kimi, söhbətimizin şax damarı da yekunda "Neftçi" oldu. Klub rəsmisiylə "ağ-qaralar"ın heyətində liderliyi üzərinə götürmək iqtidarında olan futbolçunun yoxluğu barədə xeyli söhbət etdik, fikir mübadiləsi apardıq. Onun böyük səylə hər bir oyunçunu müdafiə etməsinin şahidi olduq. Bəzi hallarda reallıqdan uzaqlaşıb, futuroloji proqnozlar verildi. Araz Abdullayev mövzusu xeyli qabardıldı. Kimlərsə "Neftçi"ni Arazsız təsəvvür etmədiyini, kimlərsə ümumiyyətlə bu komandaya yaraşmadığını bildirdi.
"Heç bir gərginlik yoxdu"
Eyni zamanda, Məmmədov "Şkendiya"nın maliyyə dayaqları barədə də məlumat verdi. Onun "Şkendiya" albanlar tərəfindən ciddi maliyyə yatırımları hesabına yaşayır. Bu üzdən də səviyyəli futbolçular almaqda korluq çəkmirlər" deməsi, heç də axşamkı rəqibi gözümüzdə böyütmək məqsədi güdmürdü. Real vəziyyət budu ki, ölkəmiz iqtisadi böhran yaşadığı vaxt "ağ-qaralar"ın maliyyə sarıdan yağ-bal içində olması qeyri-mümkündü. Rəqibdə isə hazırki vəziyyət tam fərqlidi. Ancaq bununla yanaşı icraçı direktordan mənə maraqlı gələn sualın da cavabını aldım. Subyektiv fikrimi çatdırım ki, sualın məğzi də aydın olsun. "Neftçi" fərdi ustalıq, təcrübə, komanda şəklində "Şkendiya"ya uduzur. Ancaq bunu kompensasiya edən məqam psixoloji hazırlıq, əzmkarlıq, istək kimi amillər ola bilər. Dediklərimizi yekunlaşdırarkən, Vəli Qasımovun komandasının psixoloji cəhətdən axşamkı döyüşə hazır olması həlledici rol oynamalıdı. Elnur bəy bu baxımdan komandanın tam hazır olduğunu dilə gətirdi: "Heç bir gərginlik yoxdu. Uşaqlar üzərlərində heç bir təzyiq hiss etmirlər".
Məmmədov yanılmayıbsa, "Şkendiya"nın məğlubiyyəti real görünür. Çünki təmsilçimiz qapısından erkən qol buraxmasa, hər ötən dəqiqə meydan sahiblərinin əsəblərini tarıma çəkəcək. Rəqibin ürəyinə batırılan bir xəncər isə həlledici rol oynaya bilər.
Yubanan transferlər
Klub rəsmisiylə transferlərin gec həyata keçirmələrini də müzakirə etdik. Məmmədovdan sitat: "Razıyam. Ancaq obyektiv səbəblər də var ki, bu barədə xəbəriniz yoxdu. Məsələn, ötən mövsüm bir qapıçını gözaltı etmişdik. Bütün mövsüm boyu onu izlədik. Ancaq mayda həmin əlcək sahibini bizə təklif edən menecer "sövdələşmə baş tutmur" deməklə, işlərimizi çətinə saldı. Bəli, mən də razıyam ki, hücum xəttinə oyunçu transfer etmək lazımdı. Ancaq bu məsələnin yubanmasının da səbəbi var. Mövsüm ərzində 3 baş məşqçimiz dəyişdirildi. Hərəsinin öz baxış bucağı var. Bu konsepsiyaya uyğun da oyunçu seçimi etməli oluruq. Əlbəttə, razılaşmaya bilmirəm ki, transfer çalışmaları daha tez başlanmalıdı. Amma bunun baş tutmamasının səbəblərini də açıqladım".
Elnur bəy klubun ən böyük uğuru kimi qələmə verdiyi bazanın tikilişinin son mərhələyə qədəm qoymasını göstərdi ki, bununla razılaşmamaq olmur. Çünki legionerlər hesabına qazanılan qələbələr sabun köpüyündən fərqlənmir, bazada isə onlarla, yüzlərlə yeniyetmə futbolçular yetişəcək: "Gələn ilin mart ayına işləri yekunlaşdırmağı planlaşdırırıq".
Diaqnoz
Klub rəsmisi ilə ilk dəfəydi ki, uzunmüddətli söhbətim baş tuturdu. Tet-a-tet olmasa belə. Subyektiv diaqnozum belədi: mühafizəkar, konservativ baxışlı, radikal addımdan, kəskin qərardan çəkinən icraçı direktor. İstənilən xasiyyətin formalaşmasında ətraf mühitin rolu böyükdü. Məmmədovun "Neftçi" kimi, öz təbirincə desək, "elektrik stulu" olan bir klubu idarə etməsi izini buraxmaya bilməz. Əlbəttə, "Neftçi"nin yerinə sıradan bir, tarixi 80 illə ölçülən klub olmasaydı, böyük ehtimalla Məmmədov da fərqli təəssürat oyada bilərdi. "Neftçi" isə "Neftçi"di: futbolumuzun "ağ-qara" tarixinin yeganə müəllifi.
Sonluq əvəzi
Artıq vidalaşmaq vaxtı idi. Məmmədovun "biz bura qələbə üçün gəlmişik" deməsinə, bəndəniz "heç-heçə də yarayar" reaksiyası nahar iştirakçılarının da ürəyincə oldu. Axı, qarşılaşma əsas vaxtla yekunlaşacaqsa, deməli, istənilən heç-heçə təmsilçimizi növbəti mərhələyə daşıyacaq…
CEYHUN ƏLİYEV / Skopye
P.S. Vidalaşarkən çəkdirdiyimiz şəkil də simvolik alındı. Günəş şüalarının gündüz vaxtı uzun olması, şəkildəki ağ-qara kontrastı yaratdı.
- Milli komanda2024-05-03 08:00
Vay(ss) bizim halımıza?
- Ölkə futbolu2024-05-02 08:00
Bir aylıq istirahətin şərəfinə… Balaşın ariyası
- Müsahibə2024-05-02 15:51
Dodo “Qəbələ”yə kömək etmək istəyir: I Liqada da oynamağa hazırdır
- Ölkə futbolu2024-05-03 15:05
“Neftçi”nin transfer etmək istədiyi futbolçu Danimarkada həbsdə olub – cinsi təcavüzə görə