Püşkatmadakı karikatur mənzərə

İllərdi futbol üzrə ölkə çempionatlarının və Azərbaycan kubokunun püşkatma mərasimlərində karikatur mənzərəyə şahidlik edirik. Bir qayda olaraq, təşkilatçı qurum Peşəkar Futbol Liqasının prezidenti Ramin Musayev səviyyəsində təmsil olunsa da, klubların düşərgəsində rəngarənglik özünü biruzə verir. Bu baxımdan, dünən federasiyanın binasında baş tutan püşkatma da istisna olmadı.

2016/2017-ci il mövsümündə Premyer Liqada mübarizə aparacaq 8 klub tədbirdə aşağıdakı şəkildə təmsil olunurdular: 

1. "Qarabağ" – Fərid Ağayev (Aşağı yaş qruplarının meneceri)
2. "Zirə" – Vüqar Astanov (Prezident) 
3. "Qəbələ" – Anar Hacıyev (Mətbuat xidmətinin rəhbəri)
4. "İnter" – Elmar Qafarov (Maliyyə direktoru)
5. "Kəpəz" – Samir Quliyev (Menecer)
6. "Neftçi" – Mehman Rəsulov (Mətbuat xidmətinin rəhbəri)
7. AZAL – Vadar Nuriyev (Məşqçi)
8. "Sumqayıt" – Fərhad Həsənov (Akademiyanın meneceri)

Diqqət yetirin, “Zirə” mərasimdə ən üst səviyyədə təmsil olunduğu halda, “Qarabağ” klubun aşağı yaş qrupları üzrə menecerini, “Sumqayıt” isə Akademiyanın menecerini göndərib. Bu gedişlə, növbəti püşkatmalarda klublar arasında sürücü və ya operator səviyyəsində təmsil olunanlara da rast gələcəyik. Axı, aşağı yaş qrupları üzrə menecerin və ya maliyyə direktorunun əsas komandaya nə aidiyyatı var? Deyək ki, tədbirdə iştirak edən jurnalistlər bu adamlardan birindən püşkün nəticəsinə dair münasibət öyrənmək istədi, bəs onda necə? Hə, media mənsubları əsas komandaya aiddiyatı olan şəxslərlə daha sonra da əlaqə saxlayıb danışa bilərlər. Lakin ən münasibi klubların təbdirdə uyğun şəxslə təmsil olunmasıdı. Bu, məsələnin bir tərəfidi.

Digər məqam, Peşəkar Futbol Liqasının ən üst səviyyədə təmsil olunmasıdı. Bu isə o deməkdir ki, klublar nümayəndə göndərən zaman bu amili göz önünə almalıdırlar. Aydın məsələdi ki, məsələn, “Qəbələ” klubunu prezident səviyyəsində təmsil olunmasını gözləmirik. Ancaq qəbul edək ki, püşkatmaya aşağı yaş qruplarının menecerini yollamaq da öncə Ramin bəyə, daha sonra media nümayəndələrinə qarşı sayqısızlıqdı…

Musayev istəsə, püşkatmalara qatılmaz, bu işi PFL-in baş direktoru Məlik Həsənova və ya qurumun Texniki İdman şöbəsinin rəisi Zamiq Hüseynova həvalə edər, vəssalam. Ancaq özü şəxsən iştirakını zəruri sayır. Səbəb? Çünki püşkatmalar klubların rəqiblərini tanıdığı, jurnalistlərin isə suallara cavab aldığı bir mərasimdi. Və Ramin bəy hər zaman media mənsublarının hər birinə sual vermək imkanı yaradır, bir çox məsələlərə aydınlıq gətirir. Lakin klubların nümayəndələri ilə bağlı durum göz önündədi.

Aydın məsələdi ki, klubların boşda olan istənilən adamı püşkə yollaması PFL-in günahı deyil. Lakin bu məsələyə yalnız təşkilatçı qurumun əncam çəkəcəyinə ümid edirik. Ramin bəy bununla həm də bəzi klublarda püşkatmalara qatılmaq üçün kəllə-kəlləyə gələn şəxslərin dava-dalaşlarına da son vermiş olar.

Püşkatma zamanı bəzi klubların xarici ölkələrdə təlim-məşq toplanışda olması, bəzilərinin isə avrokuboka başlarının qarışması mərasimlərə konkret şəxslərin gəlişinə əngəl olursa, onda tədbir başqa bir münasib vaxtda keçirilməlidi. Lakin istənilən halda, bu bəhanə olmamılıdı. Nəticədə, püşkatma hər həftə olan bir mərasim, bizim klub rəsmiləri isə 7/24 məşğul insanlar deyillər.

Püşkatmalarda klubların hansı səviyyədə təmsil olunması konkretləşməlidi. Vitse-prezident, idman direktoru, İdman şöbəsi, İctimaiyyətlə Əlaqələr Departamenti və s. səviyyəsində dəqiq bir təlimat olmalıdı.

ŞAMO QULİYEV