Ölkə çempionatının ilkin cizgiləri

Ölkə çempionatının startı yaxınlaşdıqca, komandaların şansları barədə düşüncələr də real formalar almağa başlayır. Bəli, “Sumqayıt” kimi “gizli qutu”muz da var. Ancaq əksər iştirakçılar haqda az-çox fikir irəli sürmək mümkündü.

Son 3 mövsümün çempionu “Qarabağ” tarixinin ən güclü heyətinə sahibdi. Ağdam təmsilçisinə başının avrokuboklara qarışması belə, heç bir maneə törətməyəcək. Qurban Qurbanovun sərəncamında rotasiyalar aparmaq üçün yetərincə yüksək səviyyəli oyunçu var. “Süvarilər”in qızıl medallar uğrunda mübarizədə əsas favorit olacağına heç kimdə zərrə qədər şübhə yoxdu. Doğrudu, komanda hücum xəttini gücləndirməlidi. Ancaq bu, daha çox avrokubok görüşlərinə şamil olan məsələdi. Ölkə daxilində isə “Qarabağ” üçün əlindəki material da kifayətdi.

Ötən mövsüm olduğu kimi, bu dəfə də çempionat öncəsi “Qarabağ”ın əsas rəqibi kimi, “Qəbələ” görünür. Roman Qriqorçukun yetirmələri Avropa Liqasında sərgilədikləri oyunları ilə 1 il əvvəlkindən də əzəmətli görünürlər. Ancaq bir sıra məqam var ki, klub rəhbərliyi bunu göz önünə almalıdı. Ukraynalı mütəxəssisin əsas heyət üzvləri ilə ehtiyat qüvvə arasında yerlə göz qədər fərq var. Yəni, kimsə zədələnsə, kart limitini aşsa, start heyəti xeyli zəifləyəcək. Üstəlik, “Samtredia”, MTK və “Lill”ə qarşı oyunlara aldanmaq olmaz. Ötən mövsüm komandanın motivasiya baxımından axsamasını açıq-aydın gördük. Ancaq əsas heyət oyunçularına görə, məhz “Qəbələ” “Qarabağ”la başabaş mübarizə aparacaq ən real namizəddi.

Ötən mövsümün sensasiyası sayılan “Zirə”nin ikinci dəfə boyundan hündürə tullana biləcəyi inandırıcı görünmür. Adil Şükürovun komandasının bu il də medallar uğrunda mübarizə aparması üçün iddialıların yenidən “Zirə”yə barmaqarası yanaşması gərəkdi ki, bu da real deyil.

“İnter”. Nəzərə alsaq ki, ötən mövsüm komanda yaşamaq uğrunda ölüm-qalım mübarizəsi aparırdı, indiki vəziyyətini “yağ-bal” adlandırmaq olar. “Qarabağ”ı nəzərə almasaq, “bankirlər” ölkənin ən güclü yerli futbolçularını rənglərinə qatıb. Maraqlıdı ki, komandada cəmi 3 əcnbə yer alıb – Denis Silva, Adrian Skarlatake, Zurab Xizanişvili. Doğrudu, İlter və Sərtan Taşkınlar milliyətcə türk, Pərdis Fərcad Azad isə iranlıdı. Ancaq bu oyunçular Azərbaycan pasportuna sahib olduqları üçün yerli statusu daşıyırlar. Uzun illər onlarla əcnəbiyə qucaq açan və bu üzdən “xarici klub” kimi tanınan “bankirlər”də indi əcnəbi qıtlığı var. Komandanın bütün xətləri mobil görünsə də, pleymeker funksiyasını üzərinə götürə biləcək oyunçusu yoxdu. Ötən mövsüm bunu Nika Kvekveskiri həyata keçirirdisə, indi komandanın belə bir fiquru yoxdu. Ancaq Rauf Əliyev kimi taran tipli, Ağabala Ramazanov kimi sürətli hücum xətti oyunçularına sahib Zaur Svanadzenin komandası medallar uğrunda mübarizədə ciddi rəqib olacaq.

“Kəpəz”in əsas “qol ümidi” Şahin Diniyevdi. Mütəxəssis özü ötənilkindən daha güclü komandaya sahib olduqlarını bildiribsə, deməli, gəncəlilər rahat nəfəs ala bilərlər. “Kəpəz” medalçılar sırasına düşməsə belə, avrokubok zonası uğrunda sonadək mübarizə aparacaq.

“”Neftçi”də işlər “fırıqdı”. Komandanın Avropa Liqasındakı səviyyəsini hər kəs gördü. Bu futbolçularla ancaq sınıq-salxaq komandalara qalib gəlmək olar. Heyətə normal dayaq yarımmüdafiəçisi və forvard cəlb olunmasa, “ağ-qaralar”ın azarkeşləri hər oyuna validolla gəlməli olacaqlar. Özü də burda baş məşqçi dəyişikliyi də fayda verməyəcək. Çünki ifaçıların səviyyəsi olduqca aşağıdı. Başqa sözlə, “Neftçi” heyəti komplektləşdirə bilməsə, elitada qalmaq uğrunda mübarizə aparacaq. Əlbəttə, unutmayaq ki, klubun sponsorları pul verməyəcəyi təqdirdə, yeni oyunçuları almaq planının həyata keçməsi qeyri-mümkündü.

AZAL ötən mövsümlə müqayisədə nəzərəçarpacaq dərəcədə zəifləyib. Doğrudu, heç keçən il də “təyyarəçilər” ciddi heyətə sahib deyildilər. Ancaq bu dəfə vəziyyət daha ağırdı. Doğrudu, məşqçi heyəti hələ də büdcənin artırılacağına ümid edir. Ancaq bu baş versə belə, komandada vahid ansambl yaranana çempionat yarılanacaq. Ciddi islahatlar aparılmayacağı təqdirdə, Tərlan Əhmədovun yetirmələri turnir cədvəlinin sonuncu pilləsində qərarlaşmamaq uğrunda mübarizə aparacaqlar.

“Sumqayıt”ın hansı simada təqdim olunacağı olduqca maraqlıdı. Samir Abasovun heyətlə bağlı etdiyi rotasiyaların hansı nəticələri verəcəyi maraqlıdı. Ancaq gedənlər və gələnləri müqayisə etdikdə, “Gənclik şəhəri” təmsilçisinin də turnir cədvəlinin aşağı sıralarında var-gəl edəcəklərini proqnozlaşdıra bilərik.

Beləliklə, ilkin təəssüratları yekunlaşdıraq: “Neftçi”, AZAL və “Sumqayıt” yaşamaq, sonuncu olmamaq uğrunda mübarizə aparacaqsa avrokubok zonasına daha iddialı “Qarabağ”, “Qəbələ” “İnter” və “Kəpəz” olacaq. “Zirə” də yəqin ki, çempionatımızın “İsveçrə”si olar – neytral, nə yuxarı boylanan, nə də aşağı.

CEYHUN ƏLİYEV