Son sınaq, ərköyün Dario və sahibsiz komanda…

Topaz Premyer Liqasının I turunda "Qəbələ"nin qonağı olacaq "Kəpəz" yay fasiləsində sonuncu yoxlama oyunununda qüvvəsini sınadı. Futbolinfo.az saytı xəbər verir ki, dünən Gəncə klubu I divizon təmsilçisi "Şərurspor"u 6:1 hesabı ilə üstələdi.

Bədən Tərbiyəsi və İdman Akademiyasının stadionunda baş tutan görüş saat 17:00-a təyin edilsə də, 40 dəqiqə yubanma ilə başladı. Hava isti və bürkülü olduğundan baş məşqçi Şahin Diniyev komandaya "ustanovka”nı tribunada kölgəyə çəkilərək verirdi, amma bu da Premyer Liqa klubu üçün yaxşı hal deyil. Hər halda, elitada mübarizə aparan komanda daha yaxşı məkanlarda məşq etməli, yoxlama oyunları təşkil etməlidi. Lakin "Kəpəz"in mövcud vəziyyətini nəzərə alsaq, bu, normal haldı.

Təsəvvür edin, komanda o qədər miskin durumdadı ki, Diniyevin köməkçiləri – Füzuli Allahverdiyev və Xaliq Mərdanov maddi imkan olmadığından Gəncədə qalıb və kollektivlə birgə toplanışda iştirak edə bilmirlər. Belə bir vəziyyətdə isə dünən Diniyevə "Qarabağ"da məşqçi kimi çalışan Elmir Xankişiyev kömək edirdi.

Pul qıtlığı öz yerində, "Kəpəz"in sahibsiz qalması da başqa bir dərddi. Klubun Müşahidə Şurasının sədri Elmir Vəliyevin komandanın avrokubok matçına gəlməməsi bir yana, "Şərurspor"la oyunda rəhbər şəxslərdən kimsə gözə dəymədi. Nə Mehman Allahverdiyev vardı, nə də Mikayıl Nərimanoğlu. Gəncə kimi şəhərin komandası göydə Allahın, yerdə Şahin Diniyevin ümidinə qalıb…

Oyuna gəlincə, Diniyev ilk yarıda aparıcı futbolçuların əksəriyyətini ehtiyatda saxlayaraq, ehtiyat qüvvəyə şans verdi. 4-4-1-1 sxemindən yararlanan baş məşqçi qapını ilk dəqiqələrdən meydanda olan yeganə legioner Tadas Simaitisə həvalə etmişdi. Onun önündəki futbolçular soldan sağa olmaqla bu şəkildə düzülmüşdülər: Tural Axundov, Tural Nərimanoğlu, Azad Kərimov, Novruz Məmmədov, Tural Rzayev, Nicat Qurbanov, Vüqar Bəybalayev, Ceyhun Cavadov. İrəli ucda Tural Qürbətov, bir qədər geridə isə Orxan Əliyev çıxış edirdi.

Əsas futbolçuların yoxluğunda "Kəpəz" "Şərurspor"la müqayisədə elə də üstün görünmürdü. Düzdü, matçda hesabı 20-ci dəqiqədə Orxan açdı. Ancaq I divizion təmsilçisi bir qədər sonra bərabərlik qolunu vurmağı bacardı. Buna rəğmən, gəncəlilər fasiləyə üstün durumda yollana bildilər. Nicat Qurbanovun sağ cinahdan ötürməsini Tural Qürbətov tora qovuşdurdu.

Qapıçıları 30 dəqiqəlik intervalla oynadan, Simaitisdən sonra Əyyub Əliyev və Davud Kərimiyə şans verən Diniyev fasilədən sonra aparıcı futbolçuları da meydana buradı. Komanda ikinci hissəyə bu meydan oyunçuları ilə başladı: (soldan sağa) Şəhriyar Rəhimov, Renan da Silva, Şəhriyar Əliyev, Novruz Məmmədov, Dario Federiko, Vüqar Bəybalayev, Kərim Diniyev, Orxan Əliyev, Serjio, Julien Ebah. Matçın gedişində Bəybalayevi Nicat Qurbanovun, Novruz Məmmədovu isə Ceyhun Cavadovun əvəzlədiyini diqqətinizə çatdıraq.

"Kəpəz" əsas heyətlə səviyyə fərqini ortaya qoya bildi. Yeganə problem son günlər “dəcəllik” edən və maaşından narazı olduğu deyilən Dario ilə bağlı idi. Braziliyalı meydanda özünü bir qədər ərköyün aparırdı. Onun topu lüzumsuz yerə stadiondan kənara vurmasından sonra Diniyev braziliyalıya "ağıllı ol" mesajı yolladı. Maraqlıdı ki, baş məşqçi ona sözünü çatdırmaq üçün dil baryeri səbəbi ilə 2 futbolçudan – Ebah və Serjiodan istifadə etdi.

İkinci yarı demək olar ki, yalnız "Kəpəz" hücumları ilə keçdi. Təsadüfi deyil ki, fasilədən sonra gəncəlilər daha 4 qol vuraraq, yekun nəticəni müəyyənləşdirdilər. Ebah öncə Vüqarın, ardınca Novruzun ötürmələrini qola çevirəndən sonra Diniyevin qulaqburması verdiyi Dario fərqləndi. Braziliyalıya qol ötürməsini isə Novruz verdi. Son qol isə Ebahdan məhsuldar ötürmə alan Orxandan gəldi.

Ümumilikdə götürsək, "Kəpəz" komanda şəklində yaxşı təsir bağışladı. Düzdü, rəqib I divizion klubu idi. Lakin isti hava şəraitində, idealdan uzaq bir meydançada gəncəlilər bacarıqlarını ortaya qoya bildilər.

Qeyd edək ki, Premyer Liqanın I turunun son oyunu olacaq "Qəbələ" –  "Kəpəz" matçı avqustun 8-də keçiriləcək.

FƏRİD