Ölkə futbolu
Çexiya mətbuatı: “Qarabağ” Azərbaycanda nadir hallarda məğlub olur”
Çexiya mətbuatı Çempionlar Liqasının 3-cü təsn…
Çexiya mətbuatı Çempionlar Liqasının 3-cü təsnifat mərhələsinin cavab qarşılaşması çərçivəsində “Qarabağ”la “Viktoriya” arasındakı oyun barədə yazı dərc edib. Çexiyalı həmkarlarımız ilk görüşdə qeydə alınan qolsuz bərabərliyi həmvətənləri üçün uğurlu nəticə kimi qələmə veriblər.
“Çexiya çempionu qitənin ən nüfuzlu klub turniri ilə Bakıda vidalaşa bilər. Ancaq avrokuboklarda qrup mərhələsini təmin etmək üçün axşamkı görüşdən mütləq alnıaçıq ayrılmalıdılar. Bu baş versə, plzenlilər ən pis halda Avropa Liqasının qrup mərhələsinə düşəcəklər ki, bu da 146 milyon kronun təmin edilməsi deməkdi. Evdəki matçda “Viktoriya” oyunu diqtə edən tərəf idi. Roman Pivarnikin yetirmələri qol vurmaq üçün çox çalışdılar, təşəbbüsü daim əllərində saxladılar. Hesab açılmasa da, şanslar bərabərdi. İndi “Viktoriya”nın qarşısında qol vurmaq hədəfi dayanır. Buna nail olsa, Azərbaycan təmsilçisi 2 dəfə fərqlənmək kimi mürəkkəb vəzifənin öhdəsindən gəlməli olacaq.
Ancaq “Qarabağ”ın doğma publika qarşısında daha ürəkli və fərqli futbol sərgilədiyini də qeyd edək. Komanda Azərbaycanda nadir hallarda məğlub olur. Azərbaycan çempionu “Tottenhem” kimi rəqibə evdə boyun əysə də qazandığı parlaq qələbələr də yetərincədi. “Monako”, “İnter” kimi komandalar Azərbaycanda qələbə qazana bilməyib, “Anderlext” isə ümumiyyətlə, məğlub ayrılıb.
Azərbaycan çempionatı hələ ki, statr götürməyibsə, Plzen klubu artıq ölkə daxilində ilk oyununu keçirib. Göründüyü kimi, hər iki tərəfin üstün tərəfləri yetərincədi. Oyuna saatlar qalmış isə şanslar bərabərdi”.
AĞA