Müsahibə
Xaqani Məmmədov: "Qalmaqallar bu yeniliklər səbəbindən olacaq"
AFFA-nın Hakimlər Komitəsinin sədri Xaqani Məmmədovun futbolinfo…
AFFA-nın Hakimlər Komitəsinin sədri Xaqani Məmmədovun futbolinfo.az saytına müsahibəsi
– İyulunun 18-dən avqustun 1-dək Bolqarıstanda təlim-məşq toplanışında oldunuz. Hakimlərimizin hazırlıq prosesi ürəyinizcə oldu?
– Türkiyədə baş verən məlum hadisələr səbəbi ilə səfərimiz bir qədər yubandı. Bolqarıstana öncədən nəzərdə tutulduğu kimi, iyulun 16-da deyil, 2 gün gec getdik. Çox məhsuldar toplanış oldu, hər kəsin iştirakından razıyam. Son vaxtlar keçirdiyimiz toplanışlar arasında ən yaxşısı idi. Hakimlərimiz Makedoniya, İsrail, Kipr, Gürcüstan, Bolqarıstan və digər ölkələrdən olan səviyyəli komandaların oyunlarını idarə etdilər.
– Toplanış dönəmində hakimlərimiz ümumilikdə neçə oyun idarə etdilər?
– Planda 18 oyun idi. Lakin 2 gün gecikdiyimiz üçün 15 matç idarə etdilər. Hər kəs matçalara təyinat aldı. 4-5 nəfər isə 2 oyun idarə etdi.
– Toplanışa apardığınız referilər arasında futbol ictimaiyyətinə bir o qədər də tanış olmayan 2 şəxs vardı – Rövşən Rəcəbov və Kərim Kərimov. Onlar yeni mövsümdə Premyer Liqa matçlarına baş hakim qismində təyinat alacaqlar?
– Rövşən Rəcəbov artıq ötən mövsümün sonucu turunda təyinat aldı, 1 oyun idarə edib. Böyük ehtimalla, yenə də təyinat alacaq. Kərimova gəlincə, o, çox cavandı. Bölgə hakimidi, tovuzludu. Ona I divizionda etimad göstərəcəyik. Lakin gələcəkdə onu da Premyer Liqada görə bilərik.
– Əliyar Ağayev də gəncdi. Lakin artıq 19 yaşadək futbolçular arasında keçirilən Avropa çempionatının final matçını idarə etdi. Onun bu cür önəmli matça təyinat alacağını gözləyirdiz?
– Əliyar özü müsahibəsində bildirib ki, finala təyinat alması onun üçün gözlənilməz olub. Lakin mən tam səmimi deyirəm ki, onun final qarşılaşmasını idarə edəcəyinə əmin idim. Çünki yarışdakı 6 referinin səviyyəsinə bələd idim. Əliyarla mütəmadi əlaqə saxlayırdım. Onun finala təyinat aldığını Azərbaycanda 2 nəfər bilirdi: Əliyar və mən. Çünki bu, sirr idi, öncədən açıqlamaq olmazdı. Ağayev digərlərindən yaxşı təsir bağışlayırdı və o yekdil qərarla finala təyinat aldı.
– Əliyar Ağayev Avropa çempionatının finalını rahat idarə etdiyi halda, Azərbaycan Premyer Liqasında tez-tez qalmaqalla üzləşir. Bu, nə ilə bağlıdı?
– Çox gözəl sualdı. Əslində, mən sizdən soruşmalıyam: nə mane olur? Təbii ki, hakimlərimizə olan təzyiqlər. Hər kəsin karyerasında uğurlu və uğursuz dövrlər olur. Səhviz idarəçilik mümkünsüzdü.
– Hakimlərimizə ən çox kim təzyiq edir: klublar, yoxsa media?
– Hər iki tərəfdən. Bəzi jurnalistlər var ki, hər hansısa klubun mövqeyindən çıxış edir. Qərəz yoxdursa, media hakimlərə dəstək olmalıdı. Bizim hakimlər korpusu ən gənclər sırasındadı. Onlara da vaxt lazımdı. Klub bir tərəfədən, jurnalistlər digər tərəfdən təzyiq edəndə, hakimlər də daha çox səhv edir.
– İstənilən halda qalmaqallar mütləq olacaq. Aydın məsələdi ki, səhv və qərəz fərqli anlayışlardı. Sualım belədi: qərəzli hakimə 5 oyunluq cəza verməklə problem həllini tapır?
– Bizdə qərəzli hakim olmayıb. Ciddi səhvə yol verənlər olub. Onda da 5 oyun cəzalanır. Qərəzli hakim ömürlük futboldan gedir.
– Bu yaxınlarda sizin tərcümə etdiyiniz Beynəlxalq Futbol Assosiasiyaları Şurasının 2016/2017-ci il mövsümü üçün Oyun Qaydaları AFFA-nın sifarişi ilə Azərbaycan dilində nəşr olundu. Təbii ki, yeni oyun qaydaları növbəti mövsümdə ölkəmizdə keçirilən yarışlara da şamil olunacaq. Bu yeniliklərlə bağlı nə kimi işlər görülüb?
– Çox düzgün məsələyə toxundunuz. Çempionatın başlamasına bir həftə qalıb, dəhşətə gəlirəm. Böyük mübahisələrə səbəb olacaq yeniliklər var, lakin bugünə qədər klublardan heç biri bizə müraciət etməyib ki, gəlin bizə 2 saatlıq seminar keçin. Açıq deyirəm, oyunlarda qalmaqallar bu yeniliklər səbəbindən olacaq. Bilmirlər, heç maraqlanmırlar da. Hakimlərlə toplanışda əsasən bu yeniliklər üzərində iş apardıq. Ciddi dəyişikliklər var. Çox qısa müddətdə yeni oyun qaydaların tərcümə edib, nəşr etdirdik. Həmin kitabları toplanışda olan hakimlərə və hakim-inspektorlara vermişik. Hər kəsə – bütün hakimlərə, klublara, media nümayəndələrinə paylayacağıq.
ŞAMO QULİYEV