Ölkə futbolu
“Qəbələ”nin 12-ci oyunçusu ol!
Sabah “Qəbələ” Avropa Liqasının pley-off mərhələsi…
Sabah “Qəbələ” Avropa Liqasının pley-off mərhələsinə çıxmaq uğrunda savaş verəcək. Bir həftə öncə Fransada “Lill”in qonağı olan Roman Qriqorçukun yetirmələri adlı-sanlı rəqibi qarşısında cılızlaşmadılar, əksinə, dişlərini göstərib, sarsıtdılar. Həmin gecə “Qəbələ” boyundan hündürə tullandı və 1:1-lik nəticəni aktivinə yazdı.
Əlbəttə, fransızlar ilk yarıda təmsilçimizə saymazyana münasibət göstərmişdilər; əlbəttə, ukraynalı mütəxəssis rəqibini daha yaxşı təhlil etmişdi; əlbəttə, müəyyən epizodlarda bəxt “Qəbələ”nin tərəfində idi. Amma eyni sayda “əlbəttə”lər əks istiqamətə də yönələ bilər.
Əlbəttə, “Qəbələ” ötənilki deyil və indi kifayət qədər avrokubok təcrübəsi olan bir komandadı; əlbəttə, ötənilkiylə müqayisədə komandanın hücum potensialı fansatik dərəcədə artıb; əlbəttə, təmsilçimiz cavab qarşılaşması öncəsi kağız üzərində daha şanslı görünür.
Bəs, reallıqdakı vəziyyət necədi? “Lill” “Böyük beşlik” ölkələri çempionatında iştirak edir və mövsüm ərzində 38 “Böyük oyun”da çıxış edir. “Qəbələ” üçün “Böyük oyunlar” seriyasına yalnız Avropa Liqasındakı bəzi görüşləri, habelə “Qarabağ”la 4 matçı daxil etmək olar. Rəqibin fiziki hazırlığı “qırmızı-qaralar”dan nəzərəçarpacaq dərəcədə üstündü. Texniki baxımdan Qriqorçukun bəzi üzvləri “Lill”i kölgədə qoyur. Komanda oyununda fransızlar daha güclüdü. Komandaların müdafiə xəttinə nəzər saldıqda, nisbi bərabərliyi görürük: nə bizimkilər, nə fransızlar avtomatlaşdırılmış müdafiə xəttinə sahib deyillər.
“Qəbələ”nin əsas məqsədi qol buraxmamaq olsa da, tam heyətlə müdafiə olunmaq təmsilçimizin de-fakto start fitindən öncə məğlubiyyət bayrağını qaldırması anlamına gələr. Fransızlar hücum etməyi sevir, fransızlar hücum etməyi bacarır. Xüsusilə, cinah hücumlarında “Lill” olduqca təhlükəlidi, üstəlik, sürətdə də “Qəbələ”dən yarım addım öndədi. Deməli, Qriqorçukun yetirmələri daha bir 90 dəqiqə boyundan hündürə tullanmalı, öyrəşmədikləri templə ayaqlaşmalıdılar.
Ortaya çıxan sual: Nəyin hesabına?
AZARKEŞLƏRİN! Bayağı görünə bilər, ancaq az-çox futbol oynamış insan bilir ki, yorulanda, ayaqlar artıq sözə baxmayanda, “davay-davay” həlledici məqama çevrilir. “Həə-həə, bir az da, qaç, çat” kimi dəstək oyunçuya güc verir, o anlayır ki, arxasında qüvvə var və həmin kütlə inanılmaz zirvələrin fəth edilməsində həlledici pay sahibi olur. Sabah da “Qəbələ”nin 12-ci oyunçuya ehtiyacı olacaq.
Bu gün “Qəbələ”nin azarkeşlərə böyük ehtiyacı var. Əsl azarkeşlərə! O azarkeşlərə ki, ən ağır vəziyyətdə də komandanı irəliyə, qəhrəmanlığa səsləyəcək. Belə olan halda təmsilçimizin nəhəng rəqiblə oyunda şansı yaranacaq. Bəli, qüvvələr nisbəti bərabər deyil, ancaq şans həqiqətən də var və sabah Roman Qriqorçukun yetirmələri qalib gəlsə, onlardan da böyük pay sahibi tribunalara toplaşan azərbaycanlı azarkeşlər olacaq.
Bu gün sən “Neftçi”nin, “Qarabağ”ın, “Xəzər Lənkəran”ın, “Kəpəz”in, “İnter”in fanatı ola bilərsən. Ancaq sabah klub mənsubiyyətindən asılı olmayaraq, hamılıqla “Qəbələ”nin yanında olmalıyıq. Necə ki, dünən “Qarabağ” bu dəstəyi gördü. İndi növbə “Qəbələ”nindi. Çünki bu klub ölkədaxili yarışda Qəbələni təmsil edir, sabahsa Avropa arenasında Azərbaycanamızın adını ucaltmağa çalışacaq.
8-ci kilometr qəsəbəsindəki stadionda fransızlara “isti qəbul”un nə olduğunu birlikdə göstərməliyik. Sabah “Qəbələ”nin çoxluqda oynaması üçün “12-ci oyunçu” sözünü deməlidi. Özü də unutmayın ki, aldığınız biletlə komandamıza dəstək olursunuz. Alverçilərin, Vətəni arxa plana keçirib, şəxsi mənafeyi üstün tutanlarla işbirliyinə girməyin. Kassalarda bilet kifayət qədər var. Tənbəllik eləməyin, biletinizi kassalardan alın: real qiymətə, kiminsə cibini doldurmaq məqsədi güdən dəyərə yox.
AĞA
- I Liqa2024-05-17 08:00
“Şamaxı”… Qayıdır axı…
- Premyer-liqa2024-05-17 22:21
“Qarabağ” “Turan Tovuz”a qalib gəldi
- Ölkə futbolu2024-05-17 11:12
Vaqner Silva: “Avropada “Qarabağ”dan qorxurlar”
- Müsahibə2024-05-16 14:00
“Niderlandda gördüklərimizi həm akademiyamızda, həm də əsas komandamızda tətbiq etməyə çalışacağıq”