Ölkə futbolu
Şüvəlanda “razborka” günü və “uypaket” Həsənov
Nəhayət, uzun fasilədən sonra futbol həvəskarlarının büt&…
Nəhayət, uzun fasilədən sonra futbol həvəskarlarının bütün diqqətləri dünən start götürən Premyer Liqaya kökləndi. “AZAL Arena”da yerli komanda ilə “Neftçi”nin qarşılaşması adəti üzrə meydandakı oyundan çox, digər məqamlarla yadda qaldı.
18:00-da qızmar günəş altında başlayan oyundan təkcə futbolçular yox, elə media tirbunasında outran KİV əhli, həmçinin fanatlar da əziyyət çəkirdi. Biz birtəhər özümüzə bir küncdə kölgə yer tapa bildiksə, başqa əlacı olmayan oyunçular meydanda mübarizəsini davam etdirirdi.
Ötən mövsüm bir çox qalmaqallara, maraqlı hadisələrə şahidlik etmiş “AZAL Arena” bu dəfə də ənənəsini pozmadı. Daha doğrusu, futbolçular və hakimlər buna imkan vermədi. Matçın əvvələrində üstünlüyü ələ alan AZAL hətta hesabı da açdı. Şüvəlanlıların yeni transferi Röyal Nəcəfovun “ağ-qaralar”ın qolkiperi Krşevan Santini ilk təkbətək çıxdığı epizodda vurduğu zərbə tirə dəyərək yerə düşdü. Ardınca özünü topa yetirən Nuqzar Kvirtiya toru silkələsə də, görüşün baş hakimi Rəhim Həsənov onun “Neftçi”nin qapıçısına qarşı kobud oynadığını bildirərək, qolu saymadı. Ancaq sonradan videotəkrarlardan da göründü ki, referilər kobud səhvə yol verib. Qolu gözdən qaçıran isə ötən mövsümün sonunda “Rəvan” – “Xəzər Lənkəran” oyununda cənubluların qapısına analoqu olmayan penalti təyin edən Ramil Diniyev idi.
İlk hissə təkcə bu qalmqalla bitsəydi, nə var idi ki? Fasiləyə 10 dəqiqə qalmış meydanda yenə ara qarışdı, məzhəb itdi. Əvvəlcə qonaqların müdafiəçisi Jayro rəqib futbolçu Kamal Mirzəyevə qarşı kobud oynayaraq, 2-ci sarı vərəqə ilə meydandan qovuldu. Yerdə qalan Mirzəyevə Dario Melnyakın kəskin etirazı isə kənardan olanları seyr edən Ruslan Nəsirlinin xoşuna gəlmədi və o, bəlkə də oyunun qırılma anı olan hərəkətə əl atdı. Lüzumsuz yerə Melnyakı itələyib yıxan Nəsirli də heç nədən komandasını azlıqda qoydu. Meydandan çıxmaq istəməyən Ruslanı isə komanda yoldaşı, kapitan Emin Cəfərquliyev sözün həqiqi mənasında qovdu. O, yarımmüdafiəçiyə əsəbi şəkildə “…, çıx çölə” deyərək hirsini onun üzərinə tökdü.
Matçda vurulan qollar isə fasilədən sonraya təsadüf etdi. Əvvəlcə künc zərbəsindən sonra Elvin Bədəlov 25-ci Azərbaycan çempionatının “siftə”sini gerçəkləşdirdi. 10 dəqiqə sonra isə Rəhman Hacıyev hesabı artırdı. Onu da qeyd edim ki, 2-ci hissə də mübahisəsiz ötüşmədi. Epizodların birində sağ cinahla irəliləyən Məqsəd İsayev kobudluqla dayandırıldı. Bu zaman yan xətt hakimi Namiq Hüseynov bayrağını qaldıraraq qayda pozuntusu qeydə aldı. Hər zaman çılğınlığı ilə seçilən Tərlan Əhmədov isə gözünün qabağında baş verən hadisəyə kəskin etirazını bildirdi. Əvəzində isə laysman “nə olub e, Tərlan, bəsdi də hər şeyə dillənirsən” deyərək çalışdırıcıya cavab verdi. Həmkarlarımdan birinin dediyinə görə, hətta yan xətt hakimi Əhmədovu oyundan sonra “razborka”ya çağırmağı da özünə rəva bilib: “oyun qurtarsın, gedib söhbət edərik”. AZAL-ın baş məşqçisi isə cavabında “harada deyirsən, gedib söhbət edərik” deyərək, ədalət təmsilçisinin cavabını verib.
Ümumiyyətlə, bu, Hüseynovla bağlı son yaddaqalan hadisə olmadı. O, final fitindən sonra qarşılaşmanın 4-cü hakimi Coşqun Həsənova da ciddi sifətlə “uypaket” deyərək, müraciət mədəniyyətini nümayiş etdirdi.
Beləcə mövsümün açılış oyunu qalmaqal bolluğu ilə yekunlaşdı. Maraqlıdı ki, Azərbaycan çempionatında mövsüm ərzində baş verən hadisələrin böyük əksəriyyəti “AZAL Arena”da baş verir. Havasındanmı, yoxsa suyundandımı, bura gələn hakimlər də, qonaq futbolçular da əksər hallarda özünü itirir…
ELMAR ABDULLA-ZADƏ
- Ölkə futbolu2024-04-11 10:32
AFFA-nın gülməli seçimi: Uğursuz klub rəhbəri Hakimlər Komitəsinə sədr olacaq?
- Ölkə futbolu2024-04-11 14:10
AFFA-da növbəti təyinatlar olacaq: yeni baş katib və PFL prezidenti
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Ölkə futbolu2024-04-11 13:34
Lunyov “Qarabağ”ın uğurunun sirrini açdı: məşqçilər, həkimlər və…