Ruslan Abışov: "Qarabağ"a qarşı "Viktoriya"dan daha yaxşı oynadıq"

Azərbaycan Premyer Liqasının 1-ci turu çərçivəsində baş tutan “İnter” – “Qarabağ” (2:1) oyunundan sonra matçda dubl etmiş Ruslan Abışov jurnalistlərin suallarını cavablandırıb:

– Çətin oyun oldu. İlk turda “Qarabağ”la qarşılaşmaq istəməzdik. Çempionatın əvvəli çətin keçir. “Qarabağ”ın topa daha çox nəzarət etdiyini bilirdik, ona görə də planlarmızı əks-hücum üzərində qurmuşduq. Qarşılaşmanın əvvələrində qol epizodlarından yararlana biləsydik, bəlkə də hər şey başqa cür ola bilərdi. 

– “İnter” “Qarabağ”dan da fəal görünürdü…
– Bu, hələ ilk oyundu. Gələcəkdə daha yaxşı olacaq. 

– Özünü bugünkü oyunun qəhrəmanı sayırsanmı?
– Xeyr, belə deməzdim. Meydanda 11 nəfər əziyyət çəkir. Qol ötürməsi verən, cəriməni qazanan futbolçular oldu. Mənim üçün daha uğurlu alındı, qol vurdum.

– İndi daha irəlidə oynayırsan, yəqin ki, qol vurmağı daha çox düşünərsən…
– Çalışacam ki, qollarımın sayını artırım. Optimal formamı bərpa edib, millidə də ilk 11-liyə düşmək istəyirəm. 

– Qolları kimə həsr edirsən?
– 2 gün əvvəl atamın 60 yaşı olmuşdu, ona həsr edirəm.

– Sənə elə gəlmir ki, “Qarabağ” “Viktoriya” ilə oyundan sonra psixoloji baxımdan tam özünə gəlməyib?
– Bəli, hiss olunurdu. Biz də onların bu nəticəsinə çox üzüldük. Amma futbolda belə şeylər olur. Peşəkar oyunçular meydana çıxanda belə şeyi yaddan çıxarmalıdı. 

– Bugünkü qələbədə “Viktoriya”nın izi varmı?
– Matça yaxşı köklənmişdik. Amma “Qarabağ”ın belə vəziyyətdə olması bizə əlavə üstünlük verdi.

– Hər halda siz “Viktoriya”dan yaxşı oynadınız…
– Sözsüz…

– Növbəti turda “Qəbələ” ilə qarşılaşacaqsınız. Bu oyun haqda nə düşünürsən?
– Evdə oynayacağıq. Qalib gəlmək fikrimiz var. “Qəbələ” Avroliqada çıxış edir, onlara da uğurlar arzu edirəm. 

ELMAR ABDULLA-ZADƏ