Fariz Nəcəfov: “Maribor” ilə oyuna kimi komandaya yeni hücumçu gələ bilər”

Dünən Azərbaycan çempionatının 1-ci turu çərçivəsində keçirilən “Qəbələ” – “Kəpəz” (2:0) matçından sonra “qırmızı-qaralar”ın vitse-prezidenti Fariz Nəcəfov futbolinfo.az saytına müsahibə verib:

– Gərgin oyun keçdi. Ötən il də avrokubok matçından çempionat qarşılaşmasına keçəndə çətinliklər yaşamışdıq. Bu gün futbolçularımız startda çətinllik çəksələr də, sonrada artan templə davam etdilər. 

– Avroliqadakı “Qəbələ” ilə çempionadakı arasında fərq hiss olunurmu?
– Tam hiss olunur. Yəqin fərqi siz də görürsünüz. Sözsüz ki, bunlar tam başqa-başqa turnirlərdi. Orada motivasiya, heyətdə olan dəyişikliklər və s. məqamlar var. 

– Bu gün meydanda olanlardan bir neçəsi “Qəbələ” akademiyasının yetirməsi idi…
– Bəli, əsas sevindirici hallardan biri məhz budu. Start heyətində 1, sonradan oyuna daxil olanlarla 4 nəfər yetirməmiz forma geyindi. Hətta Tellur Mütəllimov qol da vurub, məhsuldar ötürmə ilə yadda qaldı. Matçın gedişində də çox yığcam, ağıllı oyun göstərdi. Bu, məni çox sevindirir. Artıq akedemiyanın bəhrəsini görməyə başlayırıq. Oyun göstərdi ki, biz düz yoldayıq. İnanıram ki, daha uğurlu nəticələr göstərəcəyik. 

– Amma yəqin razılaşarsınız ki, çətin olacaq…
– Çətin olacağını bilirik. Akademiyanın uşaqları ilə daha təcrübəli futbolçular arasında fərq var.  Yetirmələrimizə inanırıq, bilirik ki, müəyyən səhvlər bahasına da olsa, onlar təcrübəsini artıracaq. 

– “Qəbələ”nin yeni hücumçu axtardığını bilirik. Bu məsələ nə yerdədi?
– Axtarışlarımızı davam etdiririk. Namizədlər var. Baş məşqçimiz də nəzarətdə saxlayır. 

– “Maribor”la oyuna kimi bu hücumçunu komandanızda görə biləcəyikmi?
– Ola bilər.

ELMAR ABDULLA-ZADƏ