Premyer-liqa
PFL Əsasnaməni niyə pozur?
Premyer Liqa hələ “bismillah” etməyib, amma artıq təq…
Premyer Liqa hələ “bismillah” etməyib, amma artıq təqvim kəllə-mayallaq çevrilib. Sabah vur-tut 2-ci tur start götürəcək, artıq 3 oyunun məkanı dəyişdirilib. İlk turda 2 (“Qəbələ” – “Kəpəz” və “Qarabağ” – “İnter”), ikincisində isə 1 (“İnter” – “Qəbələ”) oyun təqvimdə nəzərdə tutulduğu yerdə keçirilmir.
Qəbələ şəhər stadionunun meydançasının çempionatın startına hazır olmaması səbəbindən komanda ilk oyununu Mərdəkana saldı. Eyni hal Suraxanı stadionuyla bağlı oldu və komanda ilk qarşılaşmada ev sahibi yox, qonaq olmağı xahiş etdi. Qarşıdan 2-ci tur gəlir. “Qəbələ” yenə oyunu Mərdəkanda keçirir.
Niyə?
“İnter” ev oyunlarını süni örtüklü meydançada keçirir, “Qəbələ”nin isə Avropa Liqasının pley-off mərhələsində Sloveniya “Maribor”u ilə görüşü təbii örtüklü meydanda baş tutacaq. “Qəbələ” “bankirlər”ə müraciət edib, onlar da 1-ci dövrənin oyununu səfərdə keçirməyə razılıq veriblər. Bundan sonra bu, ərizə formasında PFL-ə təqdim olunub və çempionatın təşkilinə cavabdeh olan qurum rəsmi xeyir-duasını verib.
Məsələnin mənəvi tərəfini başa düşürük. Bəs, onda çempionatın Əsasnaməsi kim üçün yazılır? Ali sənəddə isə iki halda oyunun vaxtının və ya yerinin dəyişdirilməsinin mümkünlüyü göstərilib. Oyunun nəzərdə tutulandan bir gün gec və ya tez tarixə keçirilməsi Çempionlar Liqası və ya Avroliqa yarışlarında iştirak edən komandaların xahişi ilə baş tuta bilər. Oyunun yerinin dəyişdirilməsi fors-major hallarda baş tuta bilər.
Birinci variantın ümumiyyətlə, yazıya aidiyyatı olmadığı üçün ikinci mümkün dəyişiklikdən bəhs edək. Fors-major hal təbii fəlakət, müharibə, dövlət çevrilişi və bu kimi fövqaladə hallara deyilir. Özü də PFL “fors-major” dedikdə, biz avrokuboklardakı iştirakı da nəzərdə tuturuq”, açıqlamasını verə bilməz. Çünki standart formadan fərqli anlam verildikdə bu, Əsasnamədə əksini tapmalı idi.
Əlimizdə tutduğumuz Əsasnamənin 2015-2016 mövsümünə aid olduğunu, yeni mömvsüm üçün olmadığını da bir canlı iddia edə bilməz. Çünki 2016-2017 mövsümü üçün Əsasnamə nə çapdan çıxıb, nə də rəsmi sayt vasitəsi ilə təqdim olunub. Deməli, ötənilki Əsasnamə PFL-in özünün tərtib etdiyi qanunları tapdaması deməkdi. Çünki iki klub razılaşıbsa belə, PFL oyunun yerinin dəyişdirilməsinə icazə verə bilməzdi. Qanun bunu tələb edir. Axı, “şah qanun deyil, qanun şahdı!”
Qaldı ki, məsələnin mənəvi tərəfinə, PFL nəcib addım atıb, yerini şirin etmək istəyirsə, aşağıdakı sual-təklif topusuna cavab versin:
1. Matç başa çatdıqdan sonra hər iki klubun baş məşqçisinin iştirakı ilə konfrans keçirilir. Həmin konfransın əvvəlində “mətbuat” sözü olur. Yəni, mətbuat işçiləri baş məşqçilərin fikirlərini ictimaiyyətə çatdırır. Saat 22:00-da Mərdəkanda oyun bitir və təqribən 1 saat ərzində 2 mətbuat konfransı baş tutur. Saat 23:00-da hansı ictimai nəqliyyatla “Dalğa Arena”dan şəhərə qayıtmaq mümkündü?
2. Mətbuat konfransında mətbuat nümayəndələri iştirak etməyəcəksə, həmin tədbirin adını dəyişdirin. Məsələn, “Baş məşqçilərin PFL üçün monoloqu” adını verin.
3. Bir halda ki, klubların müraciətinə müsbət cavab verməklə yerinizi şirin edirsiniz, zəhmət çəkib, meydan sahibindən şəhərə qayıtmaq üçün nəqliyyat ayırması tələbini də qoyun. “Bizlik deyil”, “klub özü düşünməlidi” kimi ifadələr heç bir çərçivəyə sığmır. Ya qanuna riayət edin, ya da qanunu pozduqda üçüncü tərəfi – “4-cü hakimiyyəti” də nəzərə alın!
AĞA