Müsahibə
Deyan Kelhar: “Qəbələ” ilk oyunda yaxşı nəticə qazanmasa, çox çətin olacaq”
“Qəbələ”nin sabiq sloveniyalı futbolçusu, hazı…
“Qəbələ”nin sabiq sloveniyalı futbolçusu, hazırda Lyublyana “Olimpiya”sının şərəfini qoruyan Deyan Kelharın futbolinfo.az saytına müsahibəsi:
– Sabiq klubunuz “Qəbələ” ölkənizi təmsil edən “Maribor”la Avropa Liqasının pley-off görüşünə çıxacaq? Səncə, kim daha çox şanslıdır?
– Sevinirəm ki, sabiq komandam Sloveniya təmsilçisi ilə görüşəcək. Bu, həm də onları yenidən görməyim üçün bir şansdır. “Maribor” ölkəmizin ən yaxşı komandalarından biridir. Onlar ildən-ilə daha yaxşı çıxış etməyə, inkişafa nail olmağa çalışırlar. Bu klub Avropa Liqasında, Çempionlar Liqasında çıxış edib. Güclü komandadır və ən əsas ağıllı futbol oynayırlar.
– “Qəbələ” bu rəqibə qarşı necə oynamalıdır?
– Bu suala cavab vermək çətindir. “Qəbələ” də yaxşı komandadır və görünür ki, əla formadadırlar. Onların yaxşı məşçqisi və heyəti var. Son nəticələr isə əladır. Oyunlara çox yaxşı hazırlaşırlar. Bu komandalar arasında ilk görüş Bakıda keçiriləcək. “Qəbələ” ilk oyunda pozitiv nəticə qazanmasa, həddən artıq çətin olacaq. Sloveniyada məsələni həll etmək onlar üçün ikiqat çətinlik yaradacaq. Kim səhvsiz oynasa, o qalib gələcək. Çünki hər iki komandanın oyun üslubu topa daha çox nəzarət etməkdir.
– Hansı komandaya azarkeşlik edəcəksən?
– Mən hər zaman Sloveniyanı Avropada təmsil edən komandalara azarkeşlik etmişəm. Amma bu dəfə eks komandamı dəstəkləyəcəm. “Maribor”la matçlarda “Qəbələ”yə azarkeşlik edəcəm.
– “Qəbələ”ni necə xatırlayırsan?
– Karyeramın önəmli bir hissəsi kimi. “Qəbələ”də oynadığım vaxtları unutmaq çətindir və orada çıxış etdiyim üçün hər zaman sevinmişəm. Bu komanda ürəyimdə xüsusi yerə malik olanlardan biridir. Azərbaycan gözəl ölkədir. Qəbələ şəhəri də xoş xatirələrimdə qalıb. Dağlar, çay. Gözəl təbiəti unutmaq olmaz. Orada futbol oynamaqdan və oyunlara hazırlaşmaqdan həmişə zövq alırdım. Klub rəhbərliyi, futbolçular – hamımız birlikdə bir ailə olmuşuq. Bu klubda oynamaq çox rahat idi.
– Sabiq komandanın oyunlarını izləyirsən?
– Bütün oyunlarına baxmaq imkanım olmur. Amma klub saytı vasitəsilə icmalları izləyirəm. Həm də orda tanıdığım insanlarla əlaqə saxlayıb nəticələri öyrənirəm. Ötən il Avropa Liqasında matçlarına baxdım. Təbii ki, Avropada oynayanda “Qəbələ”ni dəstəkləyirəm.
– “Maribor”un heyətində “Qəbələ” üçün ən təhlükəli futbolçu kimdir?
– “Maribor” daha çox komanda oyununa üstünlük verir. Fərdi olaraq kimisə ciddi fərqləndirmək olmaz. Düzdür, bir neçə futbolçunun adını çəkə bilərik. Amma bu fərq o qədər də ciddi deyil. Xüsusi olaraq Milivoe Novakoviçi qeyd etmək olar. Bu hücumçu olduqca təhlükəlidir və hazırda pik formadadır. O, vacib qollar vurur. “Maribor”un hücum xətti digər nöqtələrə baxanda daha güclüdür. Ümumiyyətlə, bu komanda hücumlar zamanı çox təhlükəli olur və daha çox qol vurmağa çalışır. Ötən həftə biz onlara qarşı çıxış etdik. Nəticə 1:1 oldu. Yenə deyirəm ki, “Maribor” ağıllı komandadır. “Qəbələ” çalışmalıdır ki, çox şeyi Bakıda həll etsin. Əks halda çətin olacaq.
- Premyer-liqa2024-05-17 23:50
“Əcnəbi hakimlərinin dəvət olunmasını xoş qarşılamadım” – Qurban Qurbanov
- Premyer-liqa2024-05-18 18:58
“Neftçi”, “Zirə” və “Sabah”dan vacib qələbə
- Ölkə futbolu2024-05-19 10:44
Mahirin 2024-cü ildə ilk oyunu
- Premyer-liqa2024-05-18 09:00
“Sabah” “Sumqayıt”a, “Səbail” “Neftçi”yə, “Kəpəz” “Zirə”yə qarşı