Ölkə futbolu
Klublar Komitəsinin sədri: “Vəziyyət acınacaqlıdı”
AZAL klubunun vitse-prezidenti və AFFA Klublar Komitəsinin sədri Fi…
AZAL klubunun vitse-prezidenti və AFFA Klublar Komitəsinin sədri Fikrət Hüseynov bu gün keçirilən görüşdən sonra müzakirə olunmuş məsələlərdən danışıb. Futbolinfo.az xəbər verir ki, klub rəsmisi “Zaqatala”dakı bədbəxt hadisədən tutmuş, legioner limitinə qədər məsələlərdən bəhs edib.
– İki aya yaxındı Klublar Komitəsi yığışmırdı. Bu da yay tətili və çempionatın başa çatması ilə əlaqədar idi. Bu gün gündəlikdə olan məsələr elə də çox deyildi. Əsas məqsəd görüşüb, bir araya gəlmək idi. Bu gün "CBC Sport" kanalının baş direktoru Volkan Üstü də iclasa dəvət etmişdik. Onunla yayım barəsində söhbət etdik. Oyunların yayımı və işin maliyyə tərəflərini müzakirə etdik. Volkan bəy bütün suallarımıza cavab verdi. Yaxın günlərdə klublarla "CBC Sport" arasında görüş keçiriləcək. Tədbirdə yayımla bağlı bütün məsələlərə aydınlıq gələcək.
Digər məqam futbolçulara tibbi nəzarətlə bağlı idi. Milli komandaların baş həkimi Vyaçeslav Xomenkonu iclasa dəvət etmişdik. Bir neçə gün öncə "Zaqatala" klubunda bədbəxt hadisə yaşanıb. Bununla bağlı müzakirələr getdi. Xaricdən futbolçu gəldiyi zaman onu təyyarədən düşən kimi məşqə buraxmaq olmaz. İlk növbədə futbolçu tibbi müayinədən keçməlidi. Klubların baş həkimləri ilə bu mövzuda seminarların keçirilməsi nəzərdə tutulub. Komissiya yaradılacaq və bütün klubların tibbi müayinə korpusları yoxlanılacaq. Onların hansı şəraitdə işlədiyi və necə müayinə apardıqları araşdırılacaq.
Üçüncü məsələ isə danışılmış oyunlarla bağlıdı. Bu məsələ AFFA-nın İcraiyyə Komitəsində müzakirə olunacaq.
– Danışılmış oyun aşkarlanıb ki, bununla bağlı görüş olacaq?
– Xeyr, belə bir hal aşkarlanmayıb. Üstəlik, hələ ki, bizdən heç nə tələb olunmur. İK-da nə qərar verilsə, biz də ona əməl edəcəyik.
– "Qarabağ" və "Qəbələ" avrokuboklarda legionerlərin sayının çox olması səbəbindən uğur qazanır. Hətta "Qəbələ"nin baş məşqçisi Roman Qriqorçuk ölkə çempionatında legioner limiti ilə bağlı etirazlarını bildirib. Ümumiyyətlə, Klublar Komitəsinin sədri olaraq legioner limitinin ləğvinin tərəfdarısınızmı?
– "Qəbələ" hazırda Avropa Liqasında oynayır və əlinin altında xeyli sayda legioner futbolçu var. Bu səbəbdən legioner limitinin ləğvinin tərəfdarıdılar. Onlar üçün avrokuboklarda bir, ölkə çempionatında digər heyətlə çıxış etmək çox çətindi. "Sumqayıt"la oyun da bu səbəbdən təxirə salındı. Çünki komanda eyni heyətlə avrokuboklarda cavab oyununa hazırlaşır. İcraiyyə Komitəsi 6+5 limiti qəbul edib. Ancaq məsələ gündəmə gəlsə, biz də limitin dəyişməsini istərdik. Digər tərəfdən də dəyişilsə, azərbaycanlı futbolçular kənarda qala bilər. Məsələn, AZAL yerli futbolçulara üstünlük verir. Ancaq "Qəbələ", "Qarabağ", "İnter", "Neftçi" kimi klublar üçün bu məsələ daha önəmlidi.
– Ötən mövsüm "CBC Sport"un klublara pul ödəyəcəyi deyilsə də, ictimaiyyətə bununla bağlı yekun cavab verilmədi. Hər bir klub həmin 70 mini ala bilibmi və cari mövsümdə bu sistem necə olacaq?
– Ötən mövsüm bu hal ilk dəfə olub. Məbləği kimin və necə ödəyəcəyi bəlli deyildi. Bütün klublar AFFA-ya məktub yazıb bildirdi ki, hamımız həmin pulun borcumuz olan Peşəkar Futbol Liqasına (PFL) köçməsini istəyirik. Volkan bəylə bu məsələni də müzakirə etmişik.
– Dediklərinizdən üçtərəfli barterin imzalanması aydın olur. Bəs, məbləğin digər hissəsi klublara ödənilib?
– Digər klubların nə qədər borcu olduğunu bilmirəm. Ancaq bizim təxminən 110 min manat borcumuz vardı. 70 mini "CBC Sport" PFL-ə ödədi, qalan hissəsini isə klub olaraq həll etdik. Bəzi klublar oldu ki, onların borcu tam bağlanmadı. Ancaq borcu 70 mindən az olan klubların qalan vəsaiti alıb-almamasından xəbərsizəm.
– Qeyd etdiniz ki, futbolçu təyyarədən düşən kimi məşqə çıxmamalıdı. Burada klub rəhbərliyinin səhlənkarlığı olub. Nəyə görə I divizion klublarının nümayəndələrini bununla bağlı müzakirələrə çağırmırsınız. Bəzi komandalarda həkim belə yoxdu. Həmin komandalar gələcəkdə Premyer Liqada iştirak edə bilər…
– Sizinlə razıyam. Divizionda vəziyyət həqiqətən də acınacaqlıdı. Klubların bəziləri AFFA və yerli İcra Hakimiyyəti tərəfindən maliyyələşir. Komandaların bəlli büdcəsi olmalıdı. Qeyd etdiyiniz vəziyyətdə olan komandaları diviziona da buraxmaq lazım deyil.
– Bəzi klublarda həkim belə yoxdu. Komandaları çempionata buraxan PFL-di və belə çıxır ki, bu qurum qeyri-peşəkardı?
– İnanmıram ki, həkimsiz klub olsun. Məsələni mütləq araşdırmaq lazımdı.
ELMAR ABDULLA-ZADƏ
- Premyer-liqa2024-04-14 20:55
“Qarabağ” “Sabah”a uduzdu
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Ölkə futbolu2024-04-14 08:00
“Turan Tovuz” avrokubok mübarizəsinə qayıtdı