Ölkə futbolu
Olimpiya stadionunda final gecəsi
Dünən Bakı Olimpiya Stadionunun süni örtüklü…
Dünən Bakı Olimpiya Stadionunun süni örtüklü meydançasında həvəskar komandalar arasında MFL-in təşkil etdiyi “San-Marino Kuboku”nun final qarşılaşması baş tutdu. “Yuventus Baku” “AzFar”ı yenib (2:1), baş mükafata qovuşdu. Turnirin qalibi milli komandamızın dünya çempionatının ilk seçmə oyununda səfərdə qarşılaşacağı San-Marino yığmasına qarşı görüşünü stadiondan izləmək şansı əldə etdi.
Əslində, bu matçdan öncə 3-cü yer uğrunda görüş baş tutmalıydı. Lakin yarımfinalda məğlub olan komandalardan biri qarşılaşmaya gəlmədiyindən “Sparta Baku” texniki qələbəyə sevindi.
Beləliklə, MFL daha bir yarışı uğurla başa vurdu. Təkcə final oyununu izləməyə gələnlərin sayı göstərdi ki, bu tipli yarışlara maraq artır və həvəskar futbol vazkeçilməz əyləncəyə çevrilir.
Final matçını izləyib, qalibləri mükafatlandırmağa AFFA-nın baş katibi Elxan Məmmədovla yanaşı, bir neçə assosiasiya rəsmisi qonaq kimi gəlmişdi. “Neftçi”nin Müşahidə Şurasının üzvü Zaur Qəhrəmanov, “Səbail”in rəhbəri Yusif Həsənov, “İnter”in hücumçusu Rauf Əliyev, “Zirə”nin baş məşqçisi Adil Şükürov, onun yetirmələri – Elvin Məmmədov, Viktor İqbekoyi, Yovan Krneta, Anar Nəzirov və başqaları həm komandalara dəstək vermək, həm də saat 22.00-da başlayan oyunu izləyərək istirahət etmək üçün Olimpiya stadionunda idi.
Arenanın kiçik ölçülü meydanında əla mübarizə getdi və sonda qalib müəyyənləşdi. Rəqibi ağ rəngli forma geyindiyi üçün ənənəvi köynəklərinə həsrət qalan, məcburiyyətdən Turinin digər təmsilçisi “Torino”nun qırmızı geyimi ilə oynayan “Yuventus” istəyinə çatdı. Hətta milli komandamıza da namizəd göstərilə biləcək qapıçışının sayəsində üstün olan “italiyalılar” sonda San Marinoya getmək hüququ qazandı.
Matçdan sonra qonşu meydanda mükafatlandırma mərasimi təşkil olundu, hər 3 yerin sahibi medallarına, qaliblər kuboka qovuşdu. Elxan Məmmədovla yanaşı, milimizin üzvü Rauf Əliyev də təltifetmədə iştirak və 13 qolla bombardir olmuş “Olimpik Star”ın hücumçusu Zakir Kərimovu, ən yaxşı qapışı kimi finalın qəhrəmanı olan “Yuventus”lu Kamran İskəndərovu xüsusi mükafatla təltif etdi.
“Yuventus”lular San Marinoda yerli komanda ilə millimiz arasında dünya çempionatının seçmə mərhələsi çərçivəsində keçiriləcək oyunu izləməyə gedəcək. Final matçının qəhramanlarından Kamran İskəndərov oyundan sonra saytımıza açıqlamasında sevincli görünürdü: “Çox sevincliyəm, komandamız əziyyətinin bəhrəsini gördü. Digərləri də yaxşı mübarizə aparırdılar. Tunirdə ən çətin oyunlarımız “Olimpik Star” və “Universal”a qarşı oldu. “Universal”ı hələ yarışdan əvvəl hamı çempion kimi görürdü. Ümumiyyətlə, qrup mərhələsindən finala kimi qarşılaşdığımız bütün rəqiblər güclü idi. Final görüşünü də gördünüz, necə ağır oyun oldu. Hamının dediyinə görə, “Olimpik Star”la matçda oyunun qəhrəmanı mən olmuşam, amma belə düşünmürəm, futbol komanda oyunudu”..
San Marinoya azarkeş kimi yollanacaq İskəndərov lazım gələrsə, bu oyunda əsas millidəki adaşı Kamran Ağayevi çərçivədə əvəz edə biləcəyini də vurğuladı: “Bir zamanlar mən də peşəkar səviyyədə futbolla məşğul olmuşam. Hətta Ağasəlim Mircavadovun vaxtında Kamran Ağayevlə “Xəzər Lənkəran”da bir komandada çıxış etmişik. Yığmanın şərəfini qorumaqdan şad olaram. Əgər Azərbaycan futboluna xeyrim dəyəcəksə, elə bugündən əlimdən gələni edə bilərəm” .
Futbol gecəsi atəşfəşanlıqla bitdi. Qaliblər qələbəni qeyd etməyə, tamaşaçılar evə tələsirdisə, baş katib jurnalistlərin əhatəsində idi. O, yarış, milli komanda və s. məsələlər barədə danışdıqdan sonra növbəti belə yarışda görüşmək arzusu ilə Olimpiya stadionunu tərk etdi. Elə biz də…
CAVAD
- Ölkə futbolu2024-04-19 21:00
“Sumqayıt” avrokubok iddiasını davam etdirir
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-21 08:00
Andersonun dediyi kimi…