Ölkə futbolu
Qriqorçuk qoşa matçların ustasıdı
Sabah təmsilçilərimiz Avropa Liqasının pley-offunda mü…
Sabah təmsilçilərimiz Avropa Liqasının pley-offunda mübarizəyə start verəcək. Futbolinfo.az xəbər verir ki, sözügedən mərhələdə “Qarabağ” 12-ci, “Qəbələ” isə 4-cü qarşılaşmasına çıxacaq. Ağdamlılar İsveçdə “Höteborq”dan aldığı məğlubiyyətin (0:1) əvəzini çıxmağa çalışacaqsa, “qırmızı-qaralar” “Maribor” səfərində evdə əldə etdiyi üstünlüyü (3:1) qorumaq üçün savaşacaq.
Statististikaya nəzər salsaq, görərik ki, “Qarabağ” pley-offlarda daha öncə oynanılan 11 görüşdə cəmi 2 dəfə qələbə qazana bilib. 3 dəfə rəqibləri ilə sülhə imza atan təmsilçimiz 6 dəfə də meydanı məyus tərk edib.
Ümumiyyətlə, ağdamlılar Qurban Qurbanovun 8 illik rəhbərliyi altında mərhələ adladığı qoşa oyunların heç birində rəqiblərinə məğlub olmayıb. Ancaq 1-ci görüşdə məyus olan “Qarabağ” ilkə imza atmalıdı. Bundan başqa, təmsilçimizin əleyhinə olan digər məqam var: indiyə kimi ilk matçda 0:1 hesabı ilə məğlub olan komandalarımızdan yalnız “Qəbələ” bir dəfə vəziyyəti lehinə dəyişərək, mərhələ adlayıb. Həmçinin, “Höteborq” “Gefle”dən sonra “Qarabağ”ın qonağı olacaq 2-ci İsveç klubudu. Xatırladaq ki, “Gefle” ilə matç təmsilçimizin 1:0 hesablı qələbəsi ilə yekunlaşmışdı.
“Qəbələ” isə təmsilçilərimiz arasında AL-in pley-off qarşılaşmalarında məğlub olmayan yeganə Azərbaycan komandasıdı. “Qırmızı-qaralar” Roman Qriqroçukun rəhbərlik etdiyi dövrdən bəri avrokuboklarda 7 qoşa matçların hamısında rəqibini yolundan silib. Bakıdakı ilk matçda qeydə alınan nəticəni nəzərə alsaq, ukraynalı çalışdırıcı 100 faizlik nəticə göstərməyə çox yaxındı.
Ümumiyyətlə, tarixində ilk dəfə Sloveniya səfərinə yollanan “Qəbələ” buradan da üzüağ çıxacağı təqdirdə “Qarabağ”dan sonra ardıcıl 2-ci dəfə AL-in qrup mərhələsinə vəsiqə qazanan ilk komanda olacaq. Ağdamlılar isə təxminən həmin vaxtlarda analoji uğuru 3-cü dəfə əldə etməyə çalışacaq.