Ölkə futbolu
Mirzəbəyov yox, AFFA üzr istəməli idi
Məhəmməd Mirzəbəyov DÇ-2018-in seçmə mərhələsin…
Məhəmməd Mirzəbəyov DÇ-2018-in seçmə mərhələsində keçirilmiş San Marino – Azərbaycan oyunundan sonra etdiyi hərəkətə aydınlıq gətirib. O, affa.az-a fikirlərini bildirib:
“İlk növbədə, seçmə mərhələyə qələbə ilə başlamağımız münasibətilə Azərbaycan milli komandasının bütün azarkeşlərini təbrik edirəm. Qarşıdakı oyunlarda da yaxşı nəticələr qazanaraq bu qələbənin təsadüfi olmadığını sübuta yetirəcəyimizə ümid edirəm. Dünəndən bəri müzakirə olunan jestə gəlincə, rəqib futbolçu mənə yaxınlaşaraq formalarımızı dəyişməyimizi təklif etdi. Mən də formamı dostuma bağışlayacağımla bağlı əvvəlcədən söz verdiyimi bildirdim və sözlərimi həmin jest müşayiət etdi. Hamını əmin edir və səmimiliyimə inanmalarını xahiş edirəm ki, o jesti etməklə heç kimi təhqir etmək fikrim olmayıb və o hərəkətimi qeyri-etik qəbul edənlərin hər birindən üzr istəyirəm. Millinin hər bir futbolçusu təkcə özünü yox, ümumilikdə, bütün ölkəni təmsil edir. Emosiyaların təsiri altında hər hansı analoji hərəkət etməmək üçün bundan sonra daha diqqətli davranacağam və hamını əmin edirəm ki, bu məsuliyyəti yaxşı dərk edirəm”.
Bu aşıqlamanın AFFA-nın rəsmi saytında yerləşdirilməsi çox məsələdən xəbər verir. Görünür, assosiasiya ictimai qınağı nəzərə alaraq, belə edib. Həm də elə formada ki, guya bunun onlara dəxli yoxdu, sadəcə, futbolçu səhv edib.
AFFA məsələyə don geyindirməyində olsun, ancaq reallıq hamıya aydındı. Mirzəbəyov komanda rəhbərliyini, inzibatçını əliylə göstərərək bu jesti etdi. Bu isə o demək idi ki, “formanı dəyişsəm, məni…” İndi bunu dostuna görə etdiyini deməsi daha çox elə affa.az-ın redaksiya mətninə oxşayır.
Futbolçu üzr istəyib – düz də edib. Canlı efirdə bu cür jestə görə hətta üzr istəmək də azdı. Ancaq əsl üzrxahlığı elə AFFA rəhbərliyi etməlidi. Futbolçuların forma dəyişməsinə qadağa qoymaq ayıbdı. Belə oyunlardan qalan ən gözəl xatirələr elə dəyişdirilmiş formalardı. AFFA geyim dəstlərinə qənaət edirsə, onları az sifariş edirsə, oynanıldıqdan sonra başqa komandalara paylamaq üçün geri yığırsa, utanılacaq məqam budu. Böyük hesabla qələbə gözlənilən oyundakı fərasətsizliyə görə futbolçulara payladığınız mükafatı azaldıb diqqəti belə şeylərə yönəldin.
Bu, forma dəyişməsi ilə bağlı ilk kuryoz deyil. Tarixi vərəqləsək, onlarca utndırıcı xatirə yada düşər. Təkcə Nizami Sadıqovun 0:10-dan sonra Fransa millisinin qapıçısı Lamaya verdiyi formanı geri almaq üçün necə yalvardığını yada salmaq kifayətdi. Ona görə də üzr istəmək futbolçuların yox, onları bu vəziyyətə salanların borcudu.