Ölkə futbolu
AFFA-da kabinet oyunu: PFL yenə limitin dəyişməsinə nail oldu
AFFA və PFL bir damın altında yerləşsə də, işlərində bir n&o…
AFFA və PFL bir damın altında yerləşsə də, işlərində bir nöqtəyə vurmurlar. Bunu son qərar da sübut etdi.
Dünən I divizionda limitin müəyyənləşməsi ilə bağlı rəsmi məlumat yayıldı. Bəlli oldu ki, AFFA-nın inzibati binasında AFFA, PFL və Məşqçilər Komitəsinin birgə iclası keçirilib. AFFA İcraiyyə Komitəsinin 29 avqust 2016-cı il tarixli iclasında divizionda yaş və legioner limitinin müəyyənləşdirilməsi AFFA, Peşəkar Futbol Liqası və Məşqçilər Komitəsinə həvalə olunduğundan üçlüyün toplaşma səbəbi başadüşülən idi.
Tərəflər məsləhətləşib qərar da verdilər. I divizionda 2016-2017-ci il mövsümündə limit belə müəyyənləşdi: təvəllüdü 1994-cü il və daha kiçik olan 5 yerli futbolçu, yaş məhdudiyyəti olmayan 4 yerli futbolçu və 2 legioner start heyətinə düşə bilər. Əlavə olaraq komandalara yerli qapıçıların xidmətindən yararlanmaq tövsiyə olundu.
Üstündən heç bir sutka keşməmiş yeni qərar çıxdı. Elə bu qərar sübut etdi ki, tərəflər vəziyyəti öyrəmədən, kor-koranə limit müəyyənləşdirib. Bu gün səhər AFFA-nın rəsmi saytında bu mətn yerləşdirilib:
“Peşəkar Futbol Liqasının müraciətinə əsasən, I divizionda legioner limiti 2017-ci il yanvarın 1-dək 6+4+1 (6 legioner, 4 yerli və 1 yerli 1994-cü il təvəllüdlü və daha gənc təvəllüdlü) sisteminə uyğun tətbiq olunacaq. I divizionda legioner limiti ilə bağlı 2016-cı il sentyabrın 6-da qəbul olunmuş qərar 2017-ci il yanvarın 1-dən etibarən qüvvəyə minəcək.
Bu iki qərarı səciyyələndirmək də olar – birinci AFFA-nın baş katibi Elxan Məmədovun, ikinci PFL prezidenti Ramin Musayevin istəyi ilə qəbul olunub. Ötən mövsüm yaş limiti ilə bağlı tətbiq olunan qərar absurd idi və faktiki divizion uşaq liqalarından fərqlənmirdi. Bu dəfə Musayev AFFA prezidentindən razılıq alaraq bu qadağanı ləğv etdirdi. Amma İcraiyyə Komitəsinin son iclasında bu haqda qərar qəbul etdirmək mümkün olmadı.
Dünənki iclasda limitlə bağlı qəbul olunan qərar hardasa tərəflərin ortaq məxrəcə gəlməsi demək idi. Amma yenə də baş katibin dediyi olmuşdu. Yəqin ki, Musayev bundan narazı qalaraq növbəti dəfə AFFA prezidentinə müraciət edib və yanvara kimi istədiyinə nail olub.
Ramin bəyin rəhbərliyi fakt qarşısında qoyduğu da şübhə doğurmur. Komandalar heyətini komplektləşdirdikdən sonra dünən qəbul olunan limitlə oynamaları mümkün deyildi. Heç kim 5 gənc futbolçuyla oynamaq iqtidarında deyildi, üstəlik, bəzi komandalar daha çox legionerin xidmətinə müraciət etmişdi. Bugünkü qərarla isə problem yoluna qoyuldu. Rəsmən göstərilən 6 legionerin əvəzinə yaşlı yerli futbolçuları oynatmaq mümkün olacaq – bu isə Musayevin “mehriban düşmən”i üzərində qələbəsi deməkdi.
Təbii ki, klublara ikinci dövrəyə kimi heyətlərinə əl gəzdirmələri tapşırılacaq, qışda isə baş katib dünən qəbul olunan qərarı qüvvəyə mindirməyə çalışacaq. Birinci pərdədə PFL prezidenti qalibdi, ancaq bu, hələ müharibədə yox, bir döyüşdə qazanılan qələbədi. Halbuki belə kabinet oyunlarındansa, yekun qərar 2 ay əvvəl qəbul olunmalı, klublar da hazırlığını buna uyğun qurmalı idi.
AĞA