Ölkə futbolu
Vahabzadənin qərəzi futbolçuları da bezdirib
Avqustun 24-dən etibarən Bakıda təlim-məşq toplanışında olan …
Avqustun 24-dən etibarən Bakıda təlim-məşq toplanışında olan 21 yaşadək futbolçulardan ibarət Azərbaycan yığması dünən seçmə matça çıxdı. Amma Farer adaları ilə Mərdəkandakı görüş uğursuz bitdi, komandamız aşkar autsayderlə oyunda məğlubiyyətdən son anda qurtuldu – 1:1.
Bu matç millimizin baş məşqçisi Yaşar Vahabzadənin fiaskosu oldu. Məhz onun bacarıqsızlığı üzündən əla heyətə malik olan komandamız xal ehtiyatını 10-a çatdırmaq imkanını əldən verdi. Heyəti düzgün qura bilməyən, tapşırıqla futbolçu oynadan çalışdırıcı yetirmələrinə qarşı ayrıseçkilik etməklə də yadda qaldı.
Klubunda daim əsas heyətdə oynayan bir çox futbolçunu ehtiyatda saxlayan, bir ildi top üzü görməyən sevimlilərinə şans tanıyan məşqçinin bu münasibəti komanda daxilindəki ab-havaya da təsirsiz ötüşməyib. “İnter”in əsas heyət oyunçusu Fuad Bayramovun, ümumiyyətlə, heyətə daxil edilməməsi, Budaq Nəsirovun ehtiyatda saxlanılması, Elnur Cəfərovla İltər Taşkının oynadılması da bu qərəzin nümunəsidi.
Vahabzadənin prinsip apardığı daha bir futbolçu isə Adil Nağıyevdi. “Zirə”nin tapıntısı “Kəpəz”lə yoxlama oyunundan sonrakı iclasda “qara siyahı”ya düşüb. O, məşqçinin iradlarını dinlədikdən sonra cavab qaytardığı üçün komandadan qovulub.
Təbii ki, intizamsızlıq edən futbolçunun heyətdən göndərilməsi doğru qərardı. Amma Adilin də niyə belə etdiyinə baxmaq lazımdı. Nağıyevin partlamasına səbəb daha çox səhv edən bəzi “sevimli” oyunçuların yox, məhz onun danlanması olub. Futbolçu ayrıseçkilikdən bezərək hər dəfə eyni ampluada olan məşqçiyə cavab qaytarıb.