Ölkə futbolu
Klublar Olimpiya stadionundan niyə uzaq qaçır?
"Qəbələ" dünən Ukraynadan qayıtdıqdan sonra ilk m…
"Qəbələ" dünən Ukraynadan qayıtdıqdan sonra ilk məşqini Bakı Olimpiya Stadionunda (BOS) keçdi. Roman Qriqorçuk öncə yetirmələrini "Bakı"nın təlim-məşq bazasında hazırlığa çıxarmaq istəsə də, bir anda planlar dəyişdi, məkan kimi ölkənin ən böyük arenası seçildi.
Bildiyimizə görə, "Qəbələ" lap əvvəldən məşqi burada etmək istəyirmiş. Lakin Olimpiya stadionunun hər iki yardımçı meydançası "dolu" olduğundan "qırmızı-qaralar" Biləcəriyə üz tutubmuş. Son anda BOS-da məşq edən qızlardan ibarət yığmanın məşqi təxirə salınıb və "Qəbələ" bura üz tutub.
BOS-un əsas meydanının qazonu bərpa prosesindən təzə çıxıb, ot örtüyü artıq oyun keçirmək üçün hazır durumdadı. Ancaq indiyədək heç bir klubumuz bura üz tutmayıb. Avropa Liqasında mübarizə aparan klublarımız da bütün arenaların qazonunun sıradan çıxdığı bir zamanda bura üz tutmadı. "Qarabağ" ehtiyat meydan kimi buranı seçsə də, qrup mərhələsinin ilk oyununu "Dalğa Arena"da keçirməyi lazım bildi, "Qəbələ" isə "Bakcell Arena"nı üstün tutdu.
Əcəba, hamının BOS-dan uzaq qaçmasının, hətta ehtuyat meydançalarından istifadə etməməsinin səbəbi nədi? Stadionun qeyri-münasibliyi, qiymətin əlverişli olmaması, yoxsa nə?
Bu suallarla BOS-un media rəhbəri Cəmilə Mehdiyevaya müraciət etdik. Xanım həmsöhbətimizlə söhbətdən bəlli oldu ki, əsas meydança oyunları qəbul etmək üçün tam hazırdı, amma nədənsə klublar burada oynamaq istəmir: "Hər iki klubumuz arena ilə maraqlandı. Düzü, "Qəbələ" maliyyə məsələsinə görə fikrini ilk söhbətdəcə bildirib, başqa stadionu seçdi. "Qarabağ"ın baş məşqçisi Qurban Qurbanov isə 2 dəfə qazonu yoxlamaq üçün gəldi, baxdı, bəyəndi, amma tribunaları doldura bilməyəcəklərindən ehtiyat edərək, komandanı bura gətirmədi".
Cəmilə xanıma inansaq, "Qarabağ" 60 min azarkeşi tribunlara gətirə bilməyəcəyindən və belə nəhəng arenanın aurasının komandaya pis təsir edəcəyindən çəkinib. "Qəbələ" isə sırf maddi məsələlər üzündən BOS-dan imtina edib. Belədisə bəlkə klubları həvəsləndirmək, stadiona cəlb etmək üçün icarə qiymətlərində endirim edilsin? Mehdiyevanın dediklərinə diqqət edək: "Bizim də xərclərimiz çoxdu. Təhlükəsizlik, qazona qulluq, işıqlandırma və s. məsələlər çox xərc aparır. Bu üzdən qiymət məsələsində güzəşt çətindi. Yaxşı stadionun qiyməti də çox olur. Məncə, avrokuboklarda pul qazanan klublarımız bunun öhdəsindən gələ bilər. Sadəcə, onlar tribunaları doldura bilməyəcəklərindən çəkinirlər".
Amma iş ondadı ki, BOS rəhbərliyi icarə haqqında güzəştə getməlidi. Digər arenalarla rəqabətdə ancaq bu yolla önə keçmək olar. Yoxsa namünasib stadiona görə bir oyun üçün 40 min manat vermək heç kimə sərf etməz. Düzdü, Respublika stadionunda da qiymətlər eynidi, lakin heç kim eyni maddi xərclər qarşılığında şəhər mərkəzindəki arenanı BOS-a dəyişməz. "Bakcell Arena"da 1 oyunun qiyməti 10, "Dalğa Arena"da 3-5 min manat aralığındadısa, o zaman klubların niyə BOS-dan qaçdığı aydınlaşır. Bilet satışı ilə aradakı fərqi qapatmağın mümkünsüzlüyünü nəzərə alsaq, Olimpiya stadionu heç kimə sərf etmir.
Cəmilə xanım hər nə qədər icarə haqqını azaltmağın tərəfdarı olmasa da, etiraf etdi ki, güzəşt mümkündü. Lakin klublar bunda da maraqlı deyil: "Qarabağ" qiymətlə bağlı heç bir müzakirə aparmadı, qazonu da bəyəndilər. Bərpa işləri də onların ilk oyununa kimi yekunlaşacaqdı və bu dəqiqə heç bir problem yoxdu. Qurban bəylə söhbətdə hiss etdik ki, ağdamlılar daha çox tribunaları doldura bilməməkdən ehtiyatlanır. "Qəbələ" isə pula görə imtina etdi, lakin ciddi maraqlansaydılar, bəlkə də müəyyən güzəşt mümkün idi".
Bəs, klubların məşq üçün BOS-un yardımçı meydanlarından imtina etməsinin səbəbi nədi? Yenə Mehdiyevanın dediklərinə diqqət yetirək: "İcarə haqqı elə də baha deyil. Mən bilən, digər meydanlar da təxminən eyni qiymətədi. Məsələn, "Qəbələ" "Bakı"nın təlim-məşq bazasında olduğu kimi, bizdə də bir saatlıq məşq üçün 500 manat ödəyir. Bu gün (dünən – red.) onlar bizdə məşq etdilər".
Cəmilə xanım etiraf etməsə də, qiymətlərlə yanaşı, digər amillərin də klubların bura üz tutmasını əngəllədiyi bəllidi. Belə ki, BOS-da yardımçı meydançalardan biri qızların, digəri isə "Mançester Yunayted" məktəbinin hazırlıqları üzündən boş olmur. "Bayıl Arena"da divizion klublarının sayı çoxaldığından sözügedən məktəb bura köçməli olub. Cəmilə xanım isə düşünür ki, problemi yoluna qoymaq olar: "Klublar bizə müraciət etsə, həmin məşqləri təxirə sala və ya günün birinci yarısına keçirə bilərik. Belədə mütəxəssislərimiz axşam məşqləri üçün qazonu yenidən ideal vəziyyətə gətirə bilərlər. "Mançester Yunayted" məktəbinin hazırlıqları, ümumiyyətlə, problem deyil. Azyaşlıların məşqləri ot örtüyünə mənfi təsir etmir, üstəlik, onlar qazonun 1/4 hissəsində məşq edirlər. Təki, komandalarımız gəlmək istəsin, onlara şərait yaradarıq".
Təbii ki, belə nəhəng arenanı saxlamaq üçün buradan çox istifadə edilməsi vacibdi. Ancaq arena rəhbərliyi də anlamalıdı ki, yüksək qiymətlərlə heç kimi maraqlandıra bilməyəcəklər. Əksinə, müştəriləri maraqlandırmaq üçün daha münasib şərtlər təklif edilməlidi. AFFA-nın sırf xərcləri qarşılamaq üçün əsas millinin oyunlarını bu arenaya salması problemin həlli deyil. Heç digər yığma komandaların məşq və oyunları, "Mançester Yunayted" məktəbinin hazırlıqları da kifayət deyil. BOS-a avrokubok oyunları yaraşardı. Bundan isə "Qəbələ" yüksək icarə haqqı üzündən qaçdı, "Qarabağ" isə məhz seçim etdiyi ərəfədə qazonun yararsız olması üzündən imtina etdi.
CAVAD
- Premyer-liqa2024-05-04 21:21
“Neftçi” “Qarabağ”a böyük hesabla uduzdu
- Milli komanda2024-05-04 15:39
Millimiz UEFA İnkişaf Turnirində ikinci oyununda da uduzdu
- Premyer-liqa2024-05-04 18:59
Samir Abasov: “Bu, “Qarabağ”la matçdakı yorğunluqdan irəli gələ bilər” – VİDEO
- Ölkə futbolu2024-05-04 10:19
“Araz-Naxçıvan”ın baş məşqçisi: “Rəqib tapmaq çətinləşir”