Tərlan Əhmədov: "Hər şeyi yenidən başlamalıyam"

AZAL-ın baş məşqçisi Tərlan Əhmədov Azərbaycan Premyer Liqasının 4-cü turu çərçivəsində "Qarabağ"a qarşı keçirdikləri oyunu şərh edib. Futbolinfo.az xəbər verir ki, "təyyarəçilər"in çalışdırıcısı 0:6 hesabıyla bitən qarşılaşmadan sonra bunları söyləyib:

– Danışmağa çətinlik çəkirəm. Hər məşqçi istəyər ki, komandası məğlub olsa belə, mübarizə aparsın. Amma bu gün yetirmələrimi tanıya bilmədim. Bu, bizə dərs olacaq. Növbəti oyunlarda bu səhvləri etməməyə çalışacağıq. Hər şeyi yenidən başlamalıyam. Əsas günahkar futbolçular yox, mənəm. Yaxşı ki, indi məğlub olduq, sonra daha pis fəsadları ola bilərdi.

– Bu məğlubiyyətə görə futbolçulardan kimlərisə cəzalandıracaqsız?
– İş metodikamda belə bir şey yoxdu. Hər məğlubiyyətdə futbolçuları cəzalandırmaq olmaz. Futbol kollektiv oyundu. Belə şeyi düşünmürük.

– “Qarabağ” nəcib komandadı. Feyr-pley qaydalarına riayət edir. Bu gün sanki yezidlikləri tutmuşdu. 6 cavabsız qol vurdular…
– Futbol oyundu. “Qarabağ” bizdən aşkar güclüdü. Səviyyəli oyunçuları var. Futbolçu qol vurmaq istəyir. İlk 3 turdakı AZAL-dan əsər-əlamət qalmayıb. Rəqib sistemini göstərib, oynadı. 

– Belə başlanğıcı gözləyirdiniz?
– Açığı gözləmirdim. Hələ oyundan əvvəl də tapşırmışdım ki, istəkli olsunlar, alınmadı. 

– 2012-ci ildə Vaqif Sadıqovun dönəmində AZAL “Qarabağ”ı 6:2 hesabı ilə məğlub etmişdi. Bunu həmin görüşün qisası kimi saymaq olar?
– Belə şeylərdən danışmayaq. Futboldu, məğlub olmuşuq. Hər anı analiz edib, dərs çıxarmalıyıq.

– Sizcə, Ruslan Nəsirlinin geri qaytarılmasının vaxtı çatmayıb?
– Bəzi şeylər var ki, danışmaq olmur. Mən istəyərdim ki, heyətdə olsun.

ELMAR ABDULLA-ZADƏ