Ölkə futbolu
Azərbaycana yeni futbol ailəsi gəlir
Dünən Bakı Olimpiya Stadionu həvəskar futbolçulara yen…
Dünən Bakı Olimpiya Stadionu həvəskar futbolçulara yenidən qucaq açmışdı. Stadionun konfrans zalında toplaşan komandaların kapitanları MFL-in təşkil etməyi planlaşdırdığı 1-ci çempionatın qaydaları ilə tanış edilirdi.
Tədbir iştirakçılarına böyük ekranda əyani vəsait təqdim olunur, mini-futbolun dünyada geniş vüsət alması barədə məlumat verilirdi. Ən maraqlısı budu ki, Azərbaycanda ilk ölkə çempionatının cizgiləri çəkildiyi bir zamanda, mini-futbol üzrə ilk dünya çempionatının keçirilmə yeri də müəyyənləşib.
Bununla yanaşı, üzvlükhaqqı məsələsi də müzakirəyə çıxarıldı. Bu maddə ətrafında xeyli müddət müzakirələr aparıldı. İştirakçıları da, təşkilatçıları da başa düşmək çətin deyil: 1000 AZN ilk baxışdan olduqca böyük vəsaitdi. Ancaq söhbət minimum 38 oyunun keçirilməsindən gedir ki, belədə həmin məbləğ heç stadionun icarə haqqına çatmır.
Variant kimi müzakirəyə çıxarılan hissə-hissə ödəniş isə təşkilatçılar üçün problem yarada bilər. Çünki heç 1-ci divizion klublarının bank təminatı olmadığı halda, həvəskarlara necə güvənəsən? Bu sualın müzakirəsini növbəti yığıncağa saxlamaq qərara alındı. Amma əsas odu ki, təşkilatçılar iştirakçılar üçün istənilən güzəştə hazırdı – rəki hamı futbol oynasın.
Ancaq eşitdiklərimiz də kifayət etdi ki, əminliklə söyləyək: Azərbaycana yeni futbol ailəsi gəlir! Niyə?
Bütün iştirak edən komandaların üzvlərinə xüsusi endirim kartlarının verilməsi planlaşdırılıb. Bura MFL-lə əməkdaşlıq edən şirkətlər öz məhsullarını güzəştli və ya endirimli şərtlərlə daxil edəcəklər. Çempion komanda Avropanın müxtəlif ölkələrində analoji yarışın qalibləri ilə görüşəcək. Çempion 10 min manat məbləğində mükafat alacaq. Mövsüm ərzində bir sıra dünya ulduzlarının iştirakı ilə yoldaşlıq oyunları təşkil ediləcək.
Bu da son deyil. Hələ bir çox promo-aksiyalar da iştirakçıların möhtəşəm mövsüm keçirməsi üçün təşkil ediləcək. Təşkilatçılar 80 komandanın 4 konferensiyada mübarizə aparmasını planlaşdırır. Ancaq bu rəqəm hələ dəqiqləşmədiyi üçün reqlament barədə ətraflı məlumat vermirik. Sadəcə, qeyd edək ki, belə bir həcmdə çempionat indiyədək keçirilməyib.
Bəs, bu yarışın faydası nədi?
A) 1000-ə yaxın həvəskarın eyni yarışda futbol oynaması özlüyündə möhtəşəm hadisədi.
B) İştirakçıların hər birinin yanında 3-4 dostu gəlsə, bu daha 3500 insan deməkdi.
C) MFL-in böyük ailə yaratdığını qeyd etmişdik. Avrokuboklarda, millimizin iştirakı ilə ev oyunlarında 5 minə yaxın insanı tribunalara elə təkcə MFL daşıya bilər.
D) İnsanların sağlam həyat tərzi sürmək istənilən idman təşkilatının məqsədi olmalıdı ki, MFL də bunu ilk addımındaca etdi.
E) MFL ətrafına toplaşan həvəskarlar mütləq və mütləq övladlarını, qohumlarını bu layihəyə cəlb edəcəklər. Kim bilir, bəlkə 2-3 ildən sonra gələcəyin hansısa ulduzu məhz MFL-dən çıxdı.
CEYHUN ƏLİYEV