Müsahibə
Ozobiç: "Əjdahalarla eyni qrupda yer almağımızın fərqindəyik"
Bir günlük fasilədən sonra “Qəbələ” yenidə…
Bir günlük fasilədən sonra “Qəbələ” yenidən turnir cədvəlinin zirvəsinə qayıtdı. Roman Qriqorçukun yetirmələri “Zirə” səfərindən 3 xalla dönməyi bacardılar. Matçdan sonra “qırmızı-qaralar”ın düşünən beyni Filip Ozobiç futbolinfo.az saytının suallarını cavablandırıb.
– Maşallah, pis deyildin…
– (Gülümsəyir) Bunu məşqçidən eşitsəm, daha xoş olar. Əsas istəyim komandamızın qalib gəlməsidi. Hansısa oyunda mən, hansındasa komanda yoldaşlarımdan biri seçilə bilər. Əsas ümumi uğurdu.
– Nika Kvekveskirinin yoxluğu çox hiss olunur?
– Özü də necə! Çox ağıllı oyunçudu. Ona tezliklə sıralarımıza dönməyi arzulayıram. Amma biz elə bir komandayıq ki, istənilən futbolçunun yerini doldura bilirik. Bu gün də bunu sübuta yetirdik.
– Bu qələbədən sonra turnir cədvəlinin zirvəsini qaytardınız. Yük ağır gəlmir sənə?
– Xeyr, bu, olduqca xoş yükdü. Təki hər turdan sonra çiyinlərimiz bu ağırlığı hiss etsin. Ancaq məsələ burasındadı ki, arxada cəmi 6 tur qalıb. Əsl mübarizə hələ irəlidədi.
– Filip, qarşıdan Avropa Liqasının qrup mərhələsinin 2-ci turu çərçivəsində Almaniya “Maynts”ı ilə qarşılaşma gəlir. Bu rəqibi təhlil etmisiniz?
– Açığı, ardıcıl çempionat oyunlarından başımız açılmayıb. Sabahdan Almaniya təmsilçisini yaxından tanımağa başlayacağıq. Ancaq bu klubun tarixini vərəqləmək, hansı ölkəni təmsil etdiyinə nəzər salmaq kifayətdi ki, hər şeyi başa düşək.
– “Maynts”dan Bakıda xal almaq realdı?
– Biz meydana xal almağa yox, qalib gəlməyə çıxacağıq. Bəli, rəqib güclüdü, elitar çempionatda oynayır, amma “Qəbələ” də sanballı klubdu. Qalib gəlmək üçün potensialımız var. Yetər ki, bütün bacardıqlarımızı meydanda nümayiş etdirə bilək.
– Xəbərin var ki, “Qəbələ” qrup mərhələsində indiyədək qələbə qazanmayıb?
– Hər şeyin başlanğıcı olur. Elə “Maynts”la başlasaq, lap əla olar.
– Yaman inamlı danışırsan. Bəlkə qrupdan da çıxa biləcəyinizi deyəsən?
– Bunu çox istəyirik. Əlbəttə, hansı əjdahalarla eyni qrupda yer almağımızın fərqindəyik. Ancaq hər oyunda bütün bacarığımızı ortaya qoyacağıq.
CEYHUN ƏLİYEV