Müsahibə
Murad Musayev: “Bu, ən böyük arzumdu”
Milli komandanın mərkəz məüdafiəçisi mövqeyi nə…
Milli komandanın mərkəz məüdafiəçisi mövqeyi nə qədər etibarlı əllərdə olsa da, reallıq budu ki, Rəşad Sadıqov yavaş-yavaş karyerasını bitirmək üzrədi. Elə Bədavi Hüseynovun son zamanlar zədə üzündən oynamaması da, bu mövqeyin axsamasını aşkar büruzə verir. Elvin Yunuszadənin potensialının milli səviyyəsində olmaması isə hələ “Neftçi”də oynadığı illərdən hər kəsə məlumdu. Və bu qıtlıqda gənc müdafiəçinin ortaya çıxması hər bir kəsi ümidləndirdi. Söhbət “Qəbələ”nin şərəfini qoruyan Murad Musayevdən gedir. 6-cı tur çərçivəsində “Zirə”yə qarşı oyundan sonra Musayev futbolinfo.az saytının suallarını cavablandırdı. 22 yaşlı futbolçu əvvəlcə “Zirə” matçı haqqında fikirlərini bildirdi.
– Olduqca çətin qarşılaşma idi. Lakin biz oyunun bu cür keçəcəyinə hazır idik. Bilirdik ki, bu rəqib doğma “divarlar arası”nda daha yaxşı oyun sərgiləyir. Ancaq biz meydana qələbə üçün çıxmışdıq.
– “Qəbələ” turnir cədvəlinin zirvəsində qərarlaşıb…
– İstəyimiz budu ki, mövsümün sonunda da turnir cədvəlinin ilk pilləsində komandamız qərarlaşsın. Bunun üçün bütün gücümüzü qoyuruq, qoyacağıq da.
– Son iki turda Roman Qriqorçuk sənə start heyətində şans verir. Bundan əvvəl necə, özünü əsas heyətdə görürdün?
– Bütün məşqlərdə səylə çalışıram ki, baş məşqçinin etimadını qazanım. Şans verdiyi zaman isə bu etimadı doğrultmaq üçün bütün bacarığımı ortaya qoyuram.
– “Sumqayıt”la evdəki görüşdə səni start heyətində görmək qəribə gəlmirdisə, Qriqorçukun “Zirə” səfərində də xidmətindən yararlanması müsbət mənada təəccübləndirdi. Ukraynalı mütəxəssislə sənə güvənməsinə dair söhbətiniz olub?
– Mənim işim məşqçinin tapşırıqlarını yerinə yetirməkdi. Məşqlərdə səylə çalışıb, heyətə düşmək uğrunda mübarizə aparıram. Ancaq onun kimə şans verəcəyi barədə söhbətimiz olmayıb.
– Burdan boylananda milli görünmür?
– Əlbəttə, bu, ən böyük arzumdu. Millinin şərəfini qorumaqdan gözəl nə ola bilər?! Üzərimdə daha çox çalışıb, səhvlərimi aradan qaldırmaq üçün səylə çalışmalıyam.
CEYHUN ƏLİYEV