Müsahibə
Prosineçki: "Heyətlə bağlı heç bir səhvə yol vermədim"
Dünya çempionatının seçmə qrup mərhələsində …
Dünya çempionatının seçmə qrup mərhələsində Norveç üzərində 1:0 hesablı qələbədən sonra millimizin baş məşqçisi Robert Prosineçki mətbuat konfransı keçirib. Futbolinfo.az xəbər verir ki, xorvatiyalı mütəxəssis Çexiya ilə oyuna pul yatırımı edilməsinə dair sualdan diplomatcasına yayındı.
– Dünənki mətbuat konfransında da demişdim ki, bizi çətin oyun gözləyir. 90 dəqiqənin bitimində deməliyəm ki, xoşbəxtəm ki, 3 xal Bakıda qaldı. Rəqib çox səy göstərdi, ancaq futbolçularım böyük əzmkarlıq göstərdi və hər birimizi sevindirdi. Ancaq sevinməyə vaxtımız yoxdu. Çünki artıq sabah Çexiyaya yola düşürük. İndi diqqətimizi ora yönəltməli və yenə də vuruşmalıyıq. Tarixdə ilk dəfədi ki, Azərbaycan ilk 2 oyunda 6 xal qazanır. Bu münasibətlə hər bir azərbaycanlını təbrik edirəm!
– Bu qələbə Çexiya səfəri öncəsi komanda üçün motivasiyadı, yoxsa əks-effekt verə bilər?
– Bu suala cavab vermək çətindi. Bəli, sevindik, ancaq uşaqlara dedim ki, bütün sevincimiz bugünlükdü. Sabah həkimlərdən futbolçuların durumu barədə məlumat alacam. Çexiya ilə oyunda bir neçə dəyişiklik olacaq. Ona görə yox ki, kimdənsə narazıyam. Sadəcə, yorulanlarımız var. Zənnimcə, bu qələbə futbolçularıma ruh yüksəkliyi gətirəcək və Çexiyada daha əzmkar oynayacaqlar.
– Rauf Əliyev və Araz Abdullayev mütamadi oyun praktikasına sahibdilər. Nəyə görə oynamayan Ramil Şeydayev və Namiq Ələsgərov?
– Bu, mənim seçimimdi. Hesab edirəm ki, heyətlə bağlı heç bir səhvə yol vermədim. Tabloda da bunun nəticəsini gördünüz.
– Ağabala Ramazanov 2-ci hissədə xeyli səhvə yol verdi…
– Ağabala çox sürətli futbolçudu. Onun oyunundan çox razı qaldım. Təkbətək mübarizələrdə itkilər çox olur. Bu, təbiidi. Ramazanov bu gün 5 nəfərin əvəzinə vuruşdu və ondan yerdən göyə qədər razıyam. Nəinki Ağabala, hər bir futbolçumdan razıyam.
– Ardıcıl 2 qələbə. Artıq azarkeşlər möcüzəyə inanır. Bəs, siz necə, bu möcüzəyə inamınız artıbmı?
– Bura gəldiyim ilk gündən optimist ruhlu danışıram. Siz hamınız pessimistsiniz. Futbolçuları tanıdıqdan sonra bildirmişəm ki, bu uşaqlarla biz nəticə qazana bilərik.
– Ot örtüyündən razı qaldınız?
– Örtük yaxşı deyildi. Elə bu səbəbdən oyundan əvvəl UEFA bizə bu meydanda məşq etməyə qadağa qoydu. Ümid edirəm növbəti oyunlarda bu, baş verməyəcək. Ancaq biz qalib gəlmişik. Deməli, hər şey yaxşı idi.
– Bir dostum var, Çexiya ilə oyunda millimizin qələbəsinə pul yatırımı etmək istəyir. Ona nə məsləhət görə bilərsiniz?
– (Gülür) Çexiyanın oyununu Avropa çempionatında canlı izləmişəm. Doğrudu, bu turnirdən sonra heyətdə dəyişikliklər olub. Ancaq həmişəki kimi, çox güclüdülər. Buna baxmayaraq, söz verirəm ki, biz orda məzmunlu futbol sərgiləmək üçün əlimizdən gələni edəcəyik.
– Azarkeşlərin bu qələbədəki rolu nə qədər oldu?
– Azarkeşlərin dəstəyi möhtəşəm idi. 90 dəqiqə komandanı irəli səslədilər. Komanda bunu hiss edirdi.
CEYHUN ƏLİYEV