Müsahibə
Ruslan Qurbanov: “Qol vurmaq üçün “acam”
Millimiz bu gün DÇ-2018-in seçmə mərhələsində …
Millimiz bu gün DÇ-2018-in seçmə mərhələsində növbəti oyununu keçirmək üçün Çexiyaya yola düşdü. Səfər əsnasında, yığmamızın və “Qəbələ” klubunun futbolçusu Ruslan Qurbanov futbolinfo.az saytına müsahibə verib.
– Baş məşqçinin verdiyi tapşırıqları dəqiq yerinə yetirə bilsək, nəticə də yaxşı olacaq. Norveçlə matç ilk ev oyunumuz idi, xeyli insan gəlmişdi. Daha çox müdafiə olunduq. Həqiqətin gözünə dik baxmaq lazımdır.
– Norveç millisinin əvəzinə daha güclü rəqib olsaydı, qalib gəlməkdə çətinlik çəkərdiniz…
– Bəli, çətin olardı. Önəmli olan əlimizə düşən fürsəti dəyərləndirib qol vurduq, ondan sonra isə müdafiəyə oturduq. Hesabı qorumağa oynadıq.
– Çexiya ilə oyunda hansı nəticəyə və necə bir oyuna ümid edə bilərik?
– Əsas odur ki, biz Çexiyaya elə belə deyil, yaxşı nəticə qazanmaq üçün gedirik. Minimum heç-heçə istəyirik. Çexiya güclü millidir. İlk qələbələrini qazanmaq üçün əllərindən gələni edəcəklər. Biz də öz növbəmizdə bacarığımızı ortaya qoyacağıq.
– Çexiyanı daha çox nə narahat edir: özlərinin xal qazanmamaqları, yoxsa bizim 6 xal əldə etməyimiz?
– Fikrimcə, daha çox özlərinin xal qazanmamaqları. Onlar düşünürlər ki, Azərbaycan 2-ci yerdədirsə, niyə biz orada olmayaq?
– 6 xal sənin üçün həm də təzyiq amili deyil ki?
– Xeyr, əksinə. Çox sevinirəm.
– Biz buna adət etməmişik…
– Bu, o deməkdi ki, Azərbaycanda futbol inkişaf edir.
– Hər halda, sıfır xalla autsayder kimi meydana çıxmaq daha asandı. İndiki halda isə hər kəs uğurlu çıxışın davamını gözləyir…
– Əksinə, indiki durum çox xoşdur. Əlbəttə, xalq bizdən yaxşı oyun gözləyəcək. Biz buna hazırıq.
– Millinin düşərgəsinə “Neftçi”dən gəlmək yaxşıdır, yoxsa “Qəbələ”dən?
– Bu suala cavab vermək istəməzdim. Düşünürəm ki, “Qəbələ”yə keçdikdən sonra məndə inkişaf var. Lakin təbii ki, öz oyunumdan razı deyiləm, çox işləməliyəm. İstəyirəm həm klub, həm də milli üçün faydalı olum.
– “Neftçi”nin sənə borcu var?
– Onlarla danışmışam, bu baxımdan heç bir problem olmayacaq. Müqaviləyə əsasən müəyyən məbləğ qalıb. Lakin problem olmayacaq.
– Deyirsən ki, məşq edib “artıracaqsan”. Bəs, sənin nizam-intizamınla nə edək? Norveçlə oyunda heç nədən sarı vərəq aldın…
– Ağabala ötürmə verən zaman müdafiəçini qabaqlayırdım. O isə arxadan məni vurdu və hakimə narazılığımı bildirdim. Hakim də dərhal mənə “sarı” verdi. Ötən mövsümdə yaşadıqlarımdan dərs çıxartmışam.
– Çexiya ilə oyunda qol vuracağına söz vermək istəmirsən ki?
– Əlbəttə, istərdim. Qol vurmaq üçün “acam”. Mənə ancaq ardıcıl qollar vurmaq lazımdır. Tənqidlər məni daha da güclü edir. Onlara cavab olaraq qol vurmalıyam.
CEYHUN ƏLİYEV