Pessalli: “Belə müqaviləyə ilk dəfədi rast gəlirəm”

“Neftçi”nin cinah yarımmüdafiəçisi Conas Pessallinin futbolinfo.az saytına müsahibəsi.

– "Zirə" ilə oyun barədə nə deyə bilərsən?
– Qarşılaşmaya yaxşı hazırlaşmışdıq. Bilirdik ki, bizi gərgin oyun gözləyir. Rəqib güclü idi. Təəssüf ki, hər şey qısa zaman kəsiyində həll oldu. Əvvəlcə qapımıza penalti təyin edildi, az sonra isə azlıqda qaldıq. Yekunda isə acınacaqlı məğlubiyyətə uğradıq. 

– Komandadakı ab-hava və sərgilədiyin futbol barədə nə deyə bilərsən?
– Azərbaycana gəlməmişdən “Neftçi” barədə yetərincə məlumat toplamışdım. Necə böyük kluba gəldiyimin fərqindəyəm. İşlər ürəkaçan məcrada davam etmir. Buraya “Neftçi”yə kömək etmək üçün gəlmişəm.

– Ancaq debütün uğursuz alındı…
– Elədi, təəssüf ki, uduzduq. Ancaq inanıram ki, qələbələr hələ irəlidədi. İşlər qaydasında getmir. Yaranmış vəziyyətdən çıxamağa çalışacağıq. 

– 2,5 aylıq müqaviləyə imza atmısan. Həyatında buna bənzər hadisəylə rastlaşmışdın?
– 5 il Braziliyada, 5 il isə Fransada oynamışam. Bu cür anlaşmaya karyeram ərzində ilk dəfədi ki, rast gəlirəm. Bu, yeni təcrübə və mənim üçün bir çağırışdı. Özümü ən yaxşı tərəfdən göstərməyə çalışacam.

– Əlacsızlıqdan bu cür müqaviləyə imza atdın?
– Burda hər şey yenidən qurulur. Buna görə də, razılaşdım. Hələ adaptasiya olmalıyam. Hər şey qaydasında getsə, karyeramı “Neftçi”də davam etdirmək istərdim. Fransa həyatından sonra Asiyada çıxış etmək istəyirdim. Ancaq “Neftçi”dən gələn təklif məni fikrimdən daşındırdı. 

CEYHUN ƏLİYEV