“Neftçi” üçün çağırış anı: ud, özünə gəl!

Sabah Premyer Liqanın 9-cu turuna 2 qarşılaşmayla son vurulacaq. Maraqlıdı ki, hər iki görüşdə favorit qonaqlardı. “Qəbələ” Sumqayıtın eyniadlı komandasının, “Qarabağ” isə “Neftçi”nin qonağı olacaq matçdan 3 xalla ayrılmağa daha yaxın görünür. Hər halda kağız üzərində bu, belədi.

Daha böyük marağa heç şübhəsiz ki, tarixinin ən acı günlərini yaşayan “Neftçi”ylə son 3 mövsümün əvəzsiz çempionu olan “Qarabağ” arasında görüş səbəb olacaq. Meydan sahibləri üçün özünüsübut baxımından bundan gözəl fürsət ola bilməz. Özü də xal(lar) qazanmaq üçün münbit şərait də yaranıb.

Ağdamlıların Avropa Liqasının qrup mərhələsində Yunanıstan PAOK-uyla ev oyunundan elə də çox vaxt ötməyib. Ölkə çempionunun fiziki yorğunluğu bir tərəfə, emosional partlayışı da məhz qrupdakı ilk qələbəyə təsadüf edib. Qurban Qurbanov nə qədər tələbkar və təmkinli mütəxəssis olsa da, özü də etiraf edər ki, PAOK üzərində qələbədən sonra futbolçuları maksimal konsentrasiyaya kökləmək mümkün olmayacaq. İstər-istəməz komanda daxilində müəyyən rahatlıq hökm sürəcək. İndi “süvarilər” düşüncələrində uzaq Yunanıstandadılar. Axı, PAOK-la səfər qarşılaşmasından da 3 xalla ayrılacaqları təqdirdə, böyük ölçüdə ölkə futbol tarixində ilk dəfə Avropa Liqasının 1/16 final mərhələsinin qapısını açmış olacaqlar.

Əlbəttə, heyət sarıdan “Qarabağ”ın kifayət qədər resursları var. Yəni, milli və avrokubok səviyyəsində üzərlərinə yük düşən futbolçulara istirahət vermək mümkündü. Ancaq Qurbanovun Rəşad Sadıqov, Maksim Medvedev, Bədavi Hüseynov kimi fiqurları eyni səviyyədə əvəzləyəcək oyunçusu yoxdu. Üstəlik zədədən yenicə dönmüş Bədavini ardıcıl yükləmək daha ağır fəsada səbəb ola bilər. Elə Sadıqovun da yaşını nəzərə alsaq, ardıcıl 90 dəqiqələr onu sıradan çıxara bilər. Maksim də artıq neçə oyundu ki, istirahətsiz döyüşür.  Maraqlıdı ki, hər 3 futbolçu yerli statusu daşıyır. Deməli, nəinki adlarını çəkdiyimiz, hələ legioner limiti də “Qarabağ”ın başağrısına çevriləcək. 

Bəs, “Neftçi”? “Ağ-qaralar”da oyanış mütləq olmalıdı. Çünki ardıcıl məğlubiyyətlər seriyası əvvəl-axır qırılmalıdı. Üstəlik, Araz Abdullayev, Jayro Rodriges, Rəhman Hacıyev kimi futbolçular üçün bu matç çağırış anı olmalıdı. Ambisiyaları, özünütəsdiq baxımından “Qarabağ” ən əlverişli rəqibdi. Elə klubun cari mövsüm transfer etdiyi legionerləri üçün də ölkə çempionuna qarşı görüş dönüş nöqtəsi ola bilər. 

Motivasiya baxımından “Neftçi” aşkar üstünlüyə sahib olacaqsa, psixoloji cəhətdən ağdamlılar olduqca rahatdı. Ancaq sabahkı matçda “motivasiya” “psixoloji durum”u üstələyə bilər. Əlbəttə, Elxan Abdullayevin üzərinə də çox yük düşəcək. Futbolçulara turnir cədvəlini unutdarmaq – onun ümdə vəzifəsi olmalıdı. Çünki belədə, Araz da, Jayro da adət etdikləri tərzdə futbol sərgiləyə biləcəklər. Belədə, komanda yoldaşları da liderlərin arxasınca gedəcək və 90 dəqiqənin tamamında “ağ-qaralar” sevinən tərəf olmaq üçün real şans qazancaqlar. 

Sonda bir xatırlatma yerinə düşər: top yumru, meydan düzdü. Elxan Abdullayev də məhz bu döyülmüş məsəli futbolçuların beyninə hopddurmalıdı. Axı, meydana çıxan hər futbolçunun 2 ayağı və bir başı var. Deməli, şans həmişə var. Yetər ki, inanıb, sonadək vuruşasan.

CEYHUN ƏLİYEV